ខេត្ដស្វាយរៀង៖ ប្រជាពលរដ្ឋរស់នៅភូមិកំពោតប្រស់ សង្កាត់ច្រកម្ទេស ក្រុងបាវិត ខេត្ដស្វាយរៀង បានប្រាប់មកអង្គភាពសារព័ត៌មានយើងថា ក្រុមហ៑ុន សុខ គន្ធាដែលបានទទួលម៉ៅការ សាងសង់ផ្លូវបេតុងអាមេស្ថិតក្នុងកំពោតប្រស់ សង្កាត់ច្រកម្ទេស ក្រុងបាវិត ខេត្ដស្វាយរៀង មិនត្រឹមត្រូវតាមលក្ខណៈស្តង់ដា និងខុសបច្ចេកទេស ដោយ ដែកមិនគ្រប់លី កម្រាស់ មិនគ្រប់ទំហំ ម៉ែត្រ ចំណែកឯទំហំទទឹងផ្លូវវិញកន្លែងខ្លះគ្រប់ទំហំម៉ែត្រនិងកន្លែងខ្លះទៀតមិនគ្រប់ទំហំម៉ែត្រ ។
ពលរដ្ឋលើកជាចំឆ្ងល់ថា តើលក្ខណៈនៃការសាងសង់ផ្លូវបេតុងអាមេ ខាងបច្ចេកទេសគេតម្រូវឲ្យសាងសង់របៀបនេះ ឬយ៉ាងណា សូមអាជ្ញាធរពាក់ព័ន្ធទាំងអស់ មេត្តាជួយត្រួតពិនិត្យផង។
សូមបញ្ជាក់ផងដែរថាកិច្ចសន្យានៃការដេញថ្លៃ កែរលម្អផ្លូវដីក្រាលបេតុងអាមេ
ដែលមានទទឹង ៤.៥ម៉ែត្រ និងកម្រាស់ ០.១៥ម៉ែត្រ ។
តែធាតុពិតជាក់ស្ដែងពលរដ្ឋថា ការធ្វើផ្លូវបេតុងអាមេនេះគឺមិនបានគ្រប់ទំហំទៅតាមកិច្ចសន្យាដែលដាក់ដេញថ្លៃតាមគម្រោងនោះទេ។
គម្រោងដាក់ដេញថ្លៃកែរលម្អផ្លូវដីក្រាលមេតុងអាមេប្រវែងសរុប៨០០ម៉ែត្រ ដែលមានទទឹង៤.៥ម៉ែត្រ កម្រាស់០.១៥ម៉ែត្រ ក្នុងការដាក់ដេញថ្លៃ មានក្រុមហ៊ុនចំនួន៦ក្រុមហ៊ុន បានចូលដាក់ដេញថ្លៃ ហើយការចូលដាក់ដេញថ្លៃនោះ គឺបានដេញបញ្ចុះតម្លៃទាប ដោយគម្រោងប៉ាន់ស្មាន មានតម្លៃ ៤២៩,៤១២, ៦៧០ រៀល ( បួនរយម្ភៃប្រាំបួនលាន បួនរយដប់ពីរពាន់ ប្រាំមួយរយចិតសិបរៀលគត់) ហើយតម្លៃដែលដេញថ្លៃបាន ក្នុងតម្លៃទាបជាងគេ អាចទទួលយកបានគឺ៖១៤២.៤០០.០០០ រៀល របស់ក្រុមហ៊ុន សុខ គន្ធា ជាអ្នកទទួលការសាងសង់ ។
ជុំវិញករណីនេះដែរអង្គភាពសារព័ត៌មានយើងបានទំនាក់ទំនងសុំការបំភ្លឺពីលោកចៅសង្កាត់ច្រកម្ទេសនៅថ្ងៃទី១៤ខែសីហាឆ្នាំ២០២៣នេះ លោកបានប្រាប់មកអង្គភាពសារព័ត៌មានយើងថា លោកបានទទួលព័ត៌មាននេះដែរហើយលោកក៏ឲ្យមន្ត្រីរបស់លោកចុះទៅត្រួតពិនិត្យជុំវិញករណីនេះផងដែរ ហើយក្នុងនោះដែរក៏មានមន្ត្រីបច្ចេកទេសខេត្តចុះទៅត្រួតពិនិត្យផងដែរ។
លោកបានបន្ដថា ផ្លូវដែលកំពុងសាងសង់នេះមានប្រវែងសរុបចំនួន ១៥០០ ម៉ែត្រ ក្នុងនោះការដាក់ដេញថ្លៃមានប្រវែង ៨០០ ម៉ែត្រហើយបន្តគម្រោងនៃការសាងសង់មានប្រវែង៧០០ម៉ែត្របន្ថែមទៀត ។
ទោះជាយ៉ាងណាក្ដីពលរដ្ឋស្នើរសុំអោយមន្ត្រីជំនាញចុះត្រួតពិនិត្យ និងតាមដានអោយបានជាប់ជាប្រចាំផង ដើម្បីកុំអោយក្រុមហ៊ុនដែលទទួលបានគម្រោងធ្វើមិនបាន និងធ្វើមិនត្រូវតាមស្តង់ដាបច្ចេកទេស និងមិនមានគុណភាព តាមកិច្ចសន្យានៃគម្រោង។
ពលដ្ឋរស្នើរដល់ម្ចាស់គម្រោងនិងមន្ត្រីបច្ចេកទេស មន្ត្រីលទ្ធកម្មមេត្តាបង្កើតគណកម្មការវាយតម្លៃគុណភាពផ្លូវឲ្យបានម៉ត់ចត់ត្រូវតាមស្តង់ដានៃគម្រោង ជៀសវាងផ្លូវគ្មានគុណភាព ធ្វើហើយធ្វើទៀត ជួសជុលហើយផ្លូវខូចដដែលៗ ៕
