អគារសាលាបឋមសិក្សា ២ខ្នង ១០បន្ទប់ និងសមិទ្ធិផលនានា នៅក្នុងបរិវេណសាលាបឋមសិក្សាវត្តស្លា ស្ថិតនៅក្នុងភូមិពោនកក ឃុំឈើទាល ស្រុស្វាយជ្រុំ ខេត្តស្វាយរៀង ជាអំណោយរបស់ឯកឧត្តម ចៅ ភិរិទ្ធ ប្រធានក្រុមការងារចុះ មូលដ្ឋានឃុំឈើទាល និងសមាគម រ៉ូតារី អ៊ិនទ័រណេត្យូណល់ ក្លឹប កូរ៉េ (Rotary International Club Korea ) ដែលបានចំណាយថវិកាសាងសង់អស់ជាង១០ម៉ឺនដុល្លារ ត្រូវបានសម្ពោធដាក់ឱ្យប្រើប្រាស់ជាផ្លូវការនៅ ព្រឹកថ្ងៃសុក្រ ១០រោច ខែទុតិយាសាឍ ឆ្នាំថោះ បញ្ចស័កព.ស.២៥៦៧ ត្រូវនឹងថ្ងៃទី១១ ខែសីហា ឆ្នាំ២០២៣ ក្រោមវត្តមានសម្តេចកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនងជាមួយរដ្ឋសភា–ព្រឹទ្ធសភា និងអធិការកិច្ច ។
លោក ហែម សារិទ្ធ អភិបាលនៃគណៈអភិបាលស្រុកស្វាយជ្រំ បានបញ្ជាក់អំពីប្រវត្តរបស់ (សាលាបឋមសិក្សាវត្តស្លា) ដែលមានទីតាំងស្ថិតនៅភូមិពោនកក ឃុំឈើទាលមានឈ្មោះដើមហៅថា (សាលាឧបសម្ព័ន្ធវត្តស្លា )ដែលបានសាងសង់ឡើងកាលពីឆ្នាំ2016 សាងសង់នៅលើដីវត្តស្លា ដែលមានចំនួន 4 ភូមិគឺ ភូមិពូនកក ភូមិសំរោង ភូមិចេកនិងភូមិសង្កែ មានប្រជាពលរដ្ឋរស់នៅជុំវិញចំនួន 434 គ្រួសារ
ដោយមើលឃើញចក្ខុវិស័យវែកឆ្ងាយរបស់ក្រសួងអប់រំ គួបផ្សំមានកើនឡើងរបស់កូនៗជាសិស្សានុសិស្សនៅក្នុងមូលដ្ឋាននិងដើម្បីកាត់បន្ថយការធ្វើដំណើរឆ្ងាយពីផ្ទះទៅសាលារៀន ទើបព្រះតេជគុណ យិន មូន ព្រះគ្រូចៅអធិការវត្តស្លាបច្ចុប្បន្នបានសូគត់ហើយ លោកអាចារ្យ. អ៊ុក ណាត ប្រធានគណៈកម្មការវត្តនិងគណៈកម្មការអាចារ្យវត្តស្លារួមជាមួយមាតាបិតាសិស្សទាំងបួនភូមិលោក ហាស់ សារឿនតំណាងឲ្យសហគមន៍បានផ្ដួចផ្ដើម ហើយឯកភាពព្រមព្រៀងបរិច្ចាគដីវត្តមួយកន្លែងនេះដែលមានទំហំ2,925 ម៉ែត្រការ៉េ សម្រាប់សាងសង់សាលា។
លោកបានបញ្ជាក់បន្ថែមថា នៅពេលនោះដឹកនាំដោយលោកគ្រូ លោកគ្រូចម្រើន. លោកគ្រូ ឡោ វៃ. អ្នកគ្រូ ញឹមរតនា. និងមានការគាំទ្រយ៉ាងពេញទំហឹងពីសំណាក់ព្រះគ្រូចៅអធិការវត្ត លោកគ្រូអាចារ្យ សហគមន៍ ប្រជាពលរដ្ឋសប្បុរសជនជិតឆ្ងាយមាតាបិតាសិស្សបានខិតខំចូលរួមយ៉ាងសស្រាក់ស្រាំទាំងកម្លាំងកាយស្មារតីសម្ភារៈ និងថវិកាដើម្បីកសាងអាគារសិក្សាបានមួយខ្នងមាន 3 បន្ទប់ សង់អំពីកូនឈើនិងឬស្សី ដំបូលប្រក់ស័ង្កសី ចំណាយថវិកាប្រមាណជាង 3 លានរៀល ។ ហើយសាលានេះស្ថិតនៅជាសាលាឧបសម្ព័ន្ធ សាលាបឋមសិក្សាឈើទាល ក្រោយមកទទួលបានអាគារសិក្សាថ្មមួយខ្នងមានមួយបន្ទប់ទៀតដែលឧបត្ថម្ភដោយគម្រោងទ្រទ្រង់វិស័យអប់រំរបស់ក្រសួងអប់រំសម្រាប់មតេយ្យសហគមន៍ នៅឆ្នាំសិក្សា 2016 -2017 សាលាបានទទួលកុមារចូលរៀនមានចំនួន 3 កម្រិតថ្នាក់បឋមនិងមតេយ្យមួយថ្នាក់ មានសិស្សសរុប 191នាក់និងគ្រូមានចំនួន 4 នាក់ស្រីម្នាក់ មានត្រឹមថ្នាក់តេយ្យដល់ថ្នាក់ទី៣ ហើយសាលាឧបសម្ព័ន្ធវត្តស្លាត្រូវបានក្រសួងអប់រំយុវជននិងកីឡាប្រកាសផ្ដាច់សាលាឧបសម្ព័ន្ធវត្តស្លាមកជាសាលាបឋមសិក្សាវត្តស្លាជាផ្លូវការកាលពីថ្ងៃថ្ងៃទី 2 ខែវិច្ឆិកាឆ្នាំ 2018 រហូតមក។
នៅក្នុងឱកាសនោះសម្តេចកិត្តិសង្គហបណ្ឌិតបានថ្លែងពាំនាំនូវការផ្តាំផ្ញើសាកសួរសុខទុក្ខពី សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ផ្ញើជូនថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ប្រជាពលរដ្ឋ លោកគ្រូ អ្នកគ្រូ និងសិស្សានុសិស្ស ដែលមានបានចូលរួមក្នុងពិធីសម្ពោធនាពេលនេះ ដោយក្តីនឹករលឹក និងការគិតគូអំពីសុខទុក្ខ ប្រជាពលរដ្ឋទូទាំងប្រទេស។
សម្តេចកិត្តិសង្គហបណ្ឌិត បានថ្លែងប្រាប់ប្រជាពលរដ្ឋ លោកគ្រូ អ្នកគ្រូ សិស្សានុសិស្ស ពីតម្លៃនៃសុខសន្តិភាពដែលមានសព្វថ្ងៃក្រោមការដឹកនាំដ៍ឈ្លាសវៃរបស់សម្តេចតេជោ ហ៊ុន សែន ទើបធ្វើឱ្យប្រទេសជាតិយើង មានការអភិវឌ្ឍរីកចម្រើនលើគ្រប់វិស័យគ្រន់តំបន់ តាំងពីទីប្រជុំជនរហូតដល់តំបន់ដាច់ស្រយ៉ាលនៅតាមព្រំដែន។ ប្រសិនបើគ្មានសុខសន្តិភាពទេ ក៏គ្មានវត្តមានសមាគម រ៉ូតារី អ៊ិនទ័រណេត្យូណល់ ក្លឹប កូរ៉េ Rotary International Club Kore មានឱកាសចូលរួមអភិវឌ្ឍ កសាងសមិទ្ធិផលនានា ជូនបងប្អូនប្រជាពលរដ្ឋយើងដែរ។
សម្តេចកិត្តិសង្គហបណ្ឌិត បានថ្លែងអំណរគុណ ចំពោះសមាគម រ៉ូតារី អ៊ិនទ័រណេត្យូណល់ ក្លឹប កូរ៉េ Rotary International Club Kore ក្រុមការងារចុះ មូលដ្ឋានឃុំឈើទាល អាជ្ញាធរខេត្តគ្រប់លំដាប់ថ្នាក់នៃខេត្តស្វាយរៀង ដែលបានជួយសហការគ្នាកសាងអគារសាលាបឋមសិក្សាវត្តស្លានេះឡើង។ សម្តេចបានអំពាវសូមឱ្យចូលរួមថែរក្សាអគារ សាលាបឋម សិក្សានេះ ជាប្រយោជន៍ឱ្យការប្រើប្រាស់បានយូរអង្វែង និងបានណែនាំដល់សិស្សានុសិស្ស ត្រូវខិតខំរៀនសូត្រ ដើម្បីអនាគតខ្លួនឯង ក្រុមគ្រួសារ និងសង្គមជាតិ ពិសេសត្រូវចៀសឱ្យឆ្ងាយពីគ្រឿងញៀន និងល្បែងអបាយមុខគ្រប់ប្រភេទ៕
