ភ្នំពេញ៖ជនជាតិចិនម្នាក់ប្រឹងរត់អោយគេឯងជួយទាំងមានស្នាមរបួសជាច្រើនកន្លែង និងមានឈាមហូរស្រោចពេញខ្លួនរកអោយគេឯងជួយ ក្រោយពីជនជាតិចិនមួយក្រុមបាននាំគ្នាដេញវាយតាមផ្លូវចាប់ក្រៀកយកដបវាយបែកក្បាល និង ចាក់ត្រូវជាច្រើនកន្លែង។
កាលពីវេលាម៉ោង១០និង៣០នាទីព្រឹកថ្ងៃទី០៥ ខែមិថុនា ឆ្នាំ២០១៩ នៅចំណុចរបងខាងក្រោយស្ថានទូតរុស្ស៊ី ក្នុងសង្កាត់ទន្លេបាសាក់ ខណ្ឌចំការមន ។
តាមប្រជាពលរដ្ឋដែរនៅកន្លែងកេីតហេតុបានប្រាប់ឱ្យដឹងថា មុនពេលកើតហេតុគេបានឃើញបុរសជនជាតិចិនចំនួន២នាក់នាំគ្នារត់ដេញតាមវាយបុរសជាជនជាតិចិនដូចគ្នាម្នាក់ នៅតាមផ្លូវដោយមិនមានអ្នកណាម្នាក់បានដឹងថា ពួកគេឈ្លោះគ្នា និងដេញគ្នាមកពីទីណាឡើយ ។
លុះមកដល់ក្បែរហាងមួយកន្លែងពួកគេក៏តាមទាន់ និងចាប់បានដោយមានម្នាក់ចាប់ក្រៀកជាប់ និងម្នាក់ទៀតបានយកដបមួយទៅវាយសំពងលើក្បាល បណ្តាលអោយបែកហូរឈាម និងធ្វើអោយដបមួយនោះបែក ហើយក៏យកវាទៅចាក់ទៅលើភ្លៅ និងដងខ្លួនជនរងគ្រោះគ្មានត្រាប្រណី បណ្តាលអោយរងរបួសពេញខ្លួនប្រាណបន្ថែមទៀត ។
ប្រជាពលរដ្ឋបានបញ្ជាក់ទៀតថាក្រោយពីក្រុមជនជាតិចិនទាំង២នាំគ្នាវាយ និងចាក់ទៅលើបុរសរងគ្រោះជាជនជាតិចិនម្នាក់ បណ្តាលអោយរងរបួសយ៉ាងធ្ងន់ធ្ងររួចហើយ ពួកគេក៏បានទូរស័ព្ទហៅបក្សពួកជាជនជាតិចិនម្នាក់ទៀត បើករថយន្តម៉ាកហាយឡែនឌ័រ ពណ៌ក្រហម ពាក់ស្លាកលេខភ្នំពេញ 2S-8007មួយគ្រឿងមកដល់ និងនាំគ្នាលើកជនរងគ្រោះ ដាក់លើរថយន្ត ។ តែត្រូវបានជនជាតិចិនជនរងគ្រោះរើរត់ទាំងខ្លួនមានស្នាមរបួស និងឈាមហូរស្រោចពេញខ្លួនប្រាណ ក្នុងបំណងរកអោយគេឯងជួយមកដល់ខាងក្រោយស្ថានទូតរុស្ស៊ីនេះ និងធ្វើអោយមានការភ្ញាក់ផ្អើលកើតឡើងតែម្តង រួចហើយក្រុមជនជាតិចិនជាជនដៃដល់ទាំង៣នាក់ក៏បាននាំគ្នាឡើងជិះរថយន្តម៉ាកហាយឡែនឌ័រមួយគ្រឿងនោះរត់គេចខ្លួនពីកន្លែងកើតហេតុបាត់ស្រមោលអស់ ។
ក្រោយពេលកើតហេតុ កម្លាំងមានសមត្ថកិច្ចមូលដ្ឋានខណ្ឌចំការមនក៏បានចុះមកដល់កន្លែងកើតហេតុ ដោយបានឃើញបុរសជនជាតិចិនរងគ្រោះរងរបួសធ្ងន់ធ្ងរពេកក៏បានហៅរថយន្តសាមុយរបស់មន្ទីរពេទ្យមិត្តភាពខ្មែរសូវៀតមកដឹកយកទៅសង្គ្រោះ ហើយក៏កំពុងតែធ្វើការស្រាវជ្រាវរកចាប់ខ្លួនក្រុមជនដៃដល់ជាជនជាតិចិនទាំង៣នាក់ ដើម្បីយកមកធ្វើការផ្តន្ទាទោសទៅតាមផ្លូវច្បាប់ជាបន្តទៅទៀតផងដែរ៕ដោយ៖លោកសំនៀង
