ភ្នំពេញ៖ នៅសាលាខណ្ឌកំបូល ព្រឹកថ្ងៃទី ៣ ខែកក្កដា ឆ្នាំ២០១៩នេះ មានរៀបចំពិធីប្រកាស់ទទួលស្គាល់ លោក ប៉ុក បញ្ញាធិ ជាប្រធាន ការិយាល័យរៀបចំដែនដីនគរូបនីយកម្មសំណង់ និងភូមិបាល ខណ្ឌកំបូលរួមនឹងអនុប្រធាន និងមន្រ្តី មួយចំនួនទៀត ។
លោក ឃឹម ស៊ុនសូដា អភិបាលខណ្ឌកំបូល បានស្វាគមន៍ចំពោះវត្តមាន មន្រ្តីថ្មី និងក្រុមការងារទាំងអស់ ដែលត្រូវបានចាត់តាំងឱ្យមកបំពេញការងារ ក្នុងខណ្ឌកំបូល ដែលជាខណ្ឌមួយទើបបង្កើតថ្មី តែទោះបីយ៉ាងនេះក្តី អស់លោកគឺសុទ្ធតែជាមន្រ្តីចាស់ ធ្លាប់មានជំនាញ បទពិសោធន៍ការងារពីកន្លែងផ្សេងៗមកជាច្រើនឆ្នាំ ដែលសង្ឃឹមថា នឹងអាចជួយបំពេញការងាររបស់មូលដ្ឋានថ្មីនេះ ឱ្យដំណើរការល្អ ប្រកបដោយភាពរលូន ។
លោកអភិបាលខណ្ឌបញ្ចាក់ថា ក្នុងស្ថានភាពកណ្តាលទីក្រុងភ្នំពេញ កាន់តែចង្អៀត មនុស្សមួយចំនួន បានងាកមកតំបន់ជាយក្រុង ដែលកំពុងមានសក្តានុពលទាក់ទាញ ពិសេសវិស័យអចលនៈទ្រព្យ និងដីធ្លី ដូចនេះបន្តិចទៀត ទីនេះនឹងក្លាយជាទីប្រជុំជនធំ មិនចាញ់កណ្តាលទីក្រុងប៉ុន្មានឡើយ ។
លោកអភិបាលខណ្ឌរូបនេះ ស្នើអោយមន្ត្រីក្រោមឪវាទទាំងអស់ មានសាមគ្គីភាពផ្ទៃក្នុងល្អ និងកិច្ចសហការល្អ ក្នុងការបង្ខិតសេវាសាធារណៈជូនប្រជាពលរដ្ឋអោយមានប្រសិទ្ធភាពខ្ពស់។
ជាមួយគ្នានោះដែរ ឯកឧត្តម សារិន វណ្ណា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានីភ្នំពេញ បានលើកឡើងថា ពីមុនការប្រតិបត្តិការងារ ត្រូវប្រើរយៈពេលយូរទើបសំរេចលទ្ធផល តែបច្ចុប្បន្ននេះ ដោយប្រព័ន្ធបច្ចេកវិទ្យាទំនើប ការវាស់វែងកំណត់ព្រំដីធ្លី ប្រើពេលតែ ៥ ទៅ ១០នាទី ប៉ុណ្ណោះគឺបង្ហាញលទ្ធតែម្តង ហើយកិច្ចការនេះ វាកាន់តែប្រសើថែមទៀត ព្រោះមន្រ្ទីរ បានទំលាក់ឧបករណ៍ដែលពាក់ព័ន្ធនឹងកិច្ចប្រតិបត្តិការប្រចាំថ្ងៃ មកដល់មូលដ្ឋាននេះគ្រប់គ្រាន់អស់ហើយ ហើយបងប្អូនក៍សុទ្ធតែជាអ្នកមានសមត្ថភាពខ្ពស់ៗ ដែលអាចប្រើប្រាស់បានមិនពិបាកទេ ។
ឯកឧត្តម បានផ្តាំផ្ញើដល់មន្រ្តីទាំងអស់ ត្រូវមានការទំនាក់ទំនង សហការល្អជាមួយអាជ្ញាធរដែនដី ពិសេសធ្វើការឱ្យស៊ីសង្វាក់គ្នា ទាំងខ្សែ បណ្តាយ និងខ្សែទទឹង ។
ឯកឧត្តម សង្កត់ធ្ងន់ថា ៖ សូមធ្វើខ្លួនឱ្យទៅជាមន្រ្តីល្អ មន្រ្តីស្អាតស្អំ បំពេញការងារដោយភាពស្មោះត្រង់ ចៀសវាងការប្រព្រឹទ្ធអំពើពុករលួយ ស៊ុំគ្រលំ បន្លំ ក្លែងឯកសារ និងយកកំរៃលើសកំណត់ ក្នុងករណីដែលបងប្អូនប្រព្រឹទ្ធអំពើណាមួយផ្ទុយពីច្បាប់ នោះនឹងទទួលខុសត្រូវដោយខ្លួនឯង អង្គភាព និងមូលដ្ឋាន មិនអាចអស់លោកបាឡើយ ៕
សូមបញ្ជាក់ថា ៖ ក្រសួងរៀបចំដែនដី នគរូបនីយកម្ម និងសំណង់ បានបែងចែកការទទួលខុសត្រូវការងារសំណង់មាន ៣កម្រិត ដូចខាងក្រោម ៖
១/ កម្រិតសំណង់ទំហំ ៥០០ម៉ែត្រការ៉េចុះក្រោម ( សមត្ថកិច្ចទទួលខុសត្រូវ និងមានសិទ្ធិចេញលិខិតអនុញ្ញាតសាងសង់គឺរដ្ឋបាលក្រុង-ស្រុក-ខណ្ឌ )។
២/ កម្រិតសំណង់ទំហំចាប់ពី ៥០០ម៉ែត្រការ៉េឡើងដល់ ទំហំ៣.០០០ម៉ែត្រការ៉េ ( សមត្ថកិច្ចទទួលខុសត្រូវ និងមានសិទ្ធិចេញលិខិតអនុញ្ញាតសាងសង់គឺរដ្ឋបាលខេត្ត-រាជធានី )។
៣/ កម្រិតសំណង់ទំហំ៣.០០០ម៉ែត្រការ៉េឡើង ( សមត្ថកិច្ចទទួលខុសត្រូវ និងមានសិទ្ធិចេញលិខិតអនុញ្ញាតសាងសង់គឺក្រសួងរៀបចំដែនដី នគរូបនីយកម្ម និងសំណង់ )៕
