ភ្នំពេញ ៖ សំណង់អាជីវករចិនមួយកន្លែង ស្ថិតនៅតាមផ្លូវសហព័ន្ធរុស្សី ភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ មិនត្រឹមតែសាងសង់រំលោភមកលើចំណីផ្លូវប៉ុណ្ណោះទេ ថែមទាំងមិនសុំច្បាប់ទៀត ត្រូវបានអាជ្ញាធរសង្កាត់ចោមចៅទី៣ ដឹកនាំដោយ លោក វ៉ា សាវឿន ដែលជាចៅសង្កាត់ ក្រោមការអនុញាតិពី លោក ហែម ដារិទ្ធ អភិបាល នៃគណៈអភិបាល ខណ្ឌពោធិ៍សែនជ័យ ចុះផ្អាកជាបណ្តោះអាសន្ន រង់ចាំជំនាញចុះត្រួតពិនិត្យ និងឲ្យសុំច្បាប់ ឲ្យបានត្រឹមត្រូវជាមុនសិន។
អាជ្ញាធរបានឲ្យដឹងថា ទីតាំងខាងលើ អាជីវករចិន បានជួល ពីឧកញ៉ា វិញ ហួរ មកបើកការដ្ឋានសំណង់ សង់ថ្មី ធ្វើជាតូបលក់ដូរទំនិញ ក៏ប៉ុន្តែ ការសាងសង់ របស់ក្រុមហ៊ុនចិនខាងលើនេះ មិនមានច្បាប់អនុញាតិ ហើយ ថែមទាំងសាងសង់រំលោភមកលើចំណីផ្លូវសាធារណៈ ទើបនៅព្រឹកថ្ងៃទី៥ ខែកក្កដា ឆ្នាំ២០១៩ កម្លាំងអាជ្ញាធរ ចុះទៅផ្អាកសកម្មភាពសាងសង់ជា បណ្តោះអាសន្នរង់ចាំ ជំនាញចុះត្រួតពិនិត្យ។
មេជាងកម្មករ សំណង់ខាងលើ បានឲ្យដឹងថា គាត់មិនដឹងថា ថៅកែចិន បានសុំច្បាប់ ឬមិនទាន់នោះទេ ពួកគាត់ ធ្វើជាកម្មករស៊ីថ្ងៃទេ ហើយសំណង់នោះទៀតសោត ថៅកែចិន ឲ្យសង់ជាតូប ជុំវិញ អាគារចាស់មានស្រាប់ សរុបចំនួន២៩តូប ធ្វើជាតូបលក់ដូរ របស់អាជីវករចិន។
ទោះជាយ៉ាងណាក្តី សំណង់ខាងលើត្រូវបានផ្អាកជាបណ្តោះអាសន្ន រងចាំជំនាញចុះពិនិត្យ និងឲ្យម្ចាស់សំណង់សុំច្បាប់ជាមុនសិន៕
