ភ្នំពេញ៖ មានការភ្ញាក់ផ្អើលទាំងព្រឹកមួយបានកើតឡើង ដោយប្រជាពលរដ្ឋបានប្រទះឃើញស្ត្រីម្នាក់ដេកស្លាប់នៅចំណុចផ្ទះធ្វើតុទូ ផ្អើលសមត្ថកិច្ចចុះមកធ្វើការពិនិត្យ ហេតុការណ៍នេះកើតឡើងនៅម៉ោង ៦និង៣០នាទីព្រឹក ថ្ងៃទី៥ ខែកក្កដា ឆ្នាំ២០១៩ នៅចំណុចផ្ទះធ្វើតុទូ ទីតាំងគ្មានលេខ ផ្លូវលេខ១០៣ស្ទួន ក្រុមទី២៥ ភូមិ៤ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
សមត្ថកិច្ចបានឲ្យដឹងថា សពជនរងគ្រោះមានឈ្មោះ ឈាង ស្រីនី ភេទស្រី អាយុ២៨ឆ្នាំ មុខរបរនៅផ្ទះ ស្នាក់នៅ ផ្លូវលេខ១០៣ស្ទួន ក្រុមទី២៥ ភូមិ៤ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ចំណែកម្ចាស់ផ្ទះធ្វើតុទូមានឈ្មោះ ហាក់ យូ ភេទប្រុស អាយុ៣១ឆ្នាំ មុខរបរមេជាងធ្វើតុទូ។
ប្រភពព័ត៌មានបានឲ្យដឹងថា មុនពេលកើតហេតុ កាលពីវេលាម៉ោង៧យប់ថ្ងៃទី៤ ខែកក្កដា ឆ្នាំ២០១៩ ជនរងគ្រោះបានត្អូញប្រាប់គេឯងថា មិនស្រួលខ្លួន ចេះតែអស់កម្លាំង ព្រោះទើបតែសម្រាលកូនបាន៩ខែ ពេលនោះប្តីជនរងគ្រោះបានជិះម៉ូតូឌុបប្រពន្ធទៅពេទ្យម៉ាប់។ លុះដល់ព្រឹកកើតហេតុស្រាប់តែប្រទះឃើញដេកស្លាប់តែម្តង។
ក្រោយកើតហេតុសមត្ថកិច្ចបានចុះទៅធ្វើកោសល្យវិច័យទៅលើសាកសពបានឲ្យដឹងថា ពិតជាស្លាប់ដោយសារខ្យល់គ គាំងបេះដូង និងបានប្រគល់សពឲ្យសាច់ញាតិធ្វើបុណ្យតាមប្រពៃណី៕
