ភ្នំពេញ៖ អធិការដ្ឋាននគរបាលខណ្ឌសែនសុខ នៅព្រឹកថ្ងៃទី២៦ កក្កដា ឆ្នាំ២០១៩នេះ បានធ្វើការបំភ្លឺលើករណីគ្រោះថ្នាក់ចរាចរកើតឡើង ១លើក រវាងរថយន្តនិងរ៉ឺម៉កកង់បី កាលពីថ្ងៃទី៧ ខែកក្កដា ឆ្នាំ២០១៩ នៅចំណុចផ្លូវ១០១៩ សង្កាត់ឃ្មួញ ខណ្ឌសែនសុខ ដែលភាគីខាងរឺម៉កកង់បី បានបង្ហោះឲ្យជួយរកយុត្តិធម៍។
យោងតាមខ្លឹមសារ បានសរសេរថា សូមគោរពរាយការណ៍ជូន លោកអភិបាល នៃគណៈអភិបាលខណ្ឌសែនសុខ មេត្តាជ្រាបថា អធិកា រដ្ឋាននគរបាលខណ្ឌសែនសុខ សូមបំភ្លឺលើករណីគ្រោះថ្នាក់ចរាចរកើតឡើង១លើក រវាងរថយន្តនិងរ៉ឺម៉កកង់បី កាលពីថ្ងៃទី៧ ខែកក្កដា ឆ្នាំ២០១៩ នៅចំណុច ផ្លូវ១០១៩ សង្កាត់ឃ្មួញ ខណ្ឌសែនសុខ ដែលភាគីខាងរឺម៉កកង់បីបានបង្ហោះឲ្យជួយរកយុត្តិធម៍ ។
ចំពោះករណីខាងលើនេះ ក្រោយពីកើតហេតុ អធិការដ្ឋាននគរបាលខណ្ឌសែនសុខ បានយករថយន្តនិងរ៉ឺម៉កកង់បី មករក្សាទុកនៅអធិការដ្ឋាននគរបាលខណ្ឌសែនសុខ ដោយភាគីបង្កខាងរថយន្តបានរត់គេចខ្លួន ទន្ទឹមនោះដែរ កម្លាំងជំនាញផ្នែកចរាចរ បានធ្វើការស្រាវជ្រាវរកជនបង្ក តាមរយៈលេខរថយន្ត ដែលមានម្ចាស់ឈ្មោះ ជូ ចន្ថា មានទីលំនៅផ្ទះលេខ ៤៤៦ ផ្លូវម៉ៅសេងទង់ សង្កាត់ទឹកល្អក់១ ខណ្ឌទួលគោក និងបានចាត់វិធានការ កោះអញ្ជើញភាគីបង្កខាងរថយន្ត តែត្រូវបាននគរបាលមណ្ឌល លោក ឯល សាវុធ បញ្ជាក់ថា ឈ្មោះ ជូ ចន្ថា ពុំមានទីលំនៅផ្ទះលេខ ៤៤៦ ផ្លូវម៉ៅសេងទង់ សង្កាត់ទឹកល្អក់២ ខណ្ឌទួលគោកទេ។
បច្ចុប្បន្ន អធិការដ្ឋាននគរបាលខណ្ឌសែនសុខ កសាងសំណុំរឿង បញ្ជូនទៅការិយាល័យចរាចរផ្លូវគោក រាជធានីភ្នំពេញ ដើម្បីអនុវត្តតាមនីតិបន្ត៕
