ភ្នំពេញ៖កម្លាំងប៉ុស្តិ៍រដ្ឋបាលភ្នំពេញថ្មី បានធ្វើការឃាត់ខ្លួនជនសង្ស័យម្នាក់ ករណីលួចឆក់យកកាបូប នៅចំណុចតាមផ្លូវ១៩២៨ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រួម មធ្យោបាយម៉ូតូ០២គ្រឿងនៅថ្ងៃទី២៨ខែកក្កដាឆ្នាំ២០១៩ វេលាម៉ោង ១១ និង៣០នាទី ។
ប្រភពពីសមត្ថកិច្ចបានអោយដឹងថាជនសង្ស័យម្នាក់មានឈ្មោះ ពៅ សុខវឌ្ឍនា ភេទប្រុស អាយុ១៧ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅភូមិបាយ៉ាប សង្កាត់ភ្នំពេញថ្មី ខណ្ឌសែនសុខ (មានសារធាតុញៀន) ។
ចំណែកឯជនរងគ្រោះ មិនស្គាល់អត្តសញ្ញាណ (ទៅបាត់ក្រោយកើតហេតុ) ។
សម្ភារៈបាត់បង់ ៖ គ្មាន។
សម្ភារៈបន្សល់ទុកមាន ម៉ូតូ០១គ្រឿងម៉ាកស្កុបពី ពណ៌ស ផលិតឆ្នាំ២០១៨ ពាក់ស្លាកលេខភ្នំពេញ1GK-2192 របស់ជនសង្ស័យ ។
សមត្ថកិច្ចបានបន្ដថា មុនពេលកើតហេតុ ជនរងគ្រោះជាជនបរទេសបានជិះម៉ូតូកង់បី ធ្វើដំណើរតាមផ្លូវ១៩២៨ ដល់ចំណុចកើតហេតុខាងលើ ស្រាប់តែមានជនសង្ស័យម្នាក់ ជិះម៉ូតូម្នាក់ឯងមកជិតម៉ូតូកង់បី រួចធ្វើសកម្មភាពឆក់យកកាបូបពីជនរងគ្រោះតែឆក់មិនបានសម្រេច ហើយជនសង្ស័យបានជិះម៉ូតូគេចខ្លួន តែត្រូវប្រជាពលរដ្ឋធ្វើដំណើរតាមផ្លូវឃើញស្រែកថាចោរៗ ដល់ចំណុចផ្លូវ១០០៣ បានជួបជាមួយកម្លាំងល្បាតប៉ុស្តិ៍ភ្នំពេញថ្មី ឃើញហេតុការណ៍ ធ្វើការដេញតាមចាប់បានជនសង្ស័យខាងលើ យកមកធ្វើការសាសួរនៅអធិការដ្ឋាននគរបាលខណ្ឌសែនសុខតែម្តង ចំណែកជនរងគ្រោះជាជនបរទេស មិនស្គាល់អត្តសញ្ញាណ ទៅបាត់ក្រោយកើតហេតុ ។
បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីអនុវត្តតាមនិតិវិធី ៕
