កំពង់ចាម៖ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម នារសៀលថ្ងៃទី២៩ ខែកក្កដា ឆ្នាំ២០១៩នេះ បានអញ្ជើញចុះសួរសុខទុក្ខ លោក សយ ជា អាយុ៤៩ឆ្នាំ រស់នៅភូមិព្រះអណ្ដូង ឃុំព្រះអណ្ដូង ស្រុកស្ទឹងត្រង់ ខេត្តកំពង់ចាម ដោយលោក សូយ ជា មកសម្រាកព្យាបាលនៅមន្ទីរពេទ្យខេត្តកំពង់ចាមដោយសារជំងឺគ្រួសក្នុងបំពង់នោម ។
ឆ្លៀតក្នុងឱកាសនោះ ឯកឧត្តម អ៊ុន ចាន់ដា អភិបាលខេត្តកំពង់ចាម បានផ្ដាំផ្ញើដល់វេជ្ជបណ្ឌិតត្រូវខិតខំយកចិត្តទុកដាក់ចំពោះបងប្អូនប្រជាពលរដ្ឋដែលមកទទួលសេវាព្យាបាល នៅក្នុងមន្ទីរពេទ្យខេត្ត ជាពិសេសបងប្អូនប្រជាពលរដ្ឋមួយចំនួនដែលមានប័ណ្ណ បសស ផងដែរ។
បន្ទាប់ពីបានសួរសុខទុក្ខបងប្អូនប្រជាពលរដ្ឋដែលសំរាកព្យាបាលនៅមន្ទីរពេទ្យខេត្តកំពង់ចាមរួចមក ឯកឧត្តមអ៊ុនចាន់ដា ក៏បានអញ្ជើញទៅពិនិត្យ ការដ្ឋានជួសជុលផ្លូវ នៅសង្កាត់បឹងកុកខេត្តកំពង់ចាម ។
ព្រមទាំងពិនិត្យមើលផ្លូវដែលជាសំណើរបស់បងប្អូនប្រជាពលរដ្ឋប្រវែង២៥០ម៉ែត្រ ដោយស្នើសុំ ជាផ្លូវប៊េតុង ។
ឆ្លើយតបទៅនឹងសំណើរបស់បងប្អូនប្រជាពលរដ្ឋ ឯកឧត្តម អ៊ុន ចាន់ដា ក៏បានទទួលយកសំណើនោះ ព្រមទាំងចាត់ឲ្យមន្ត្រីជំនាញដើម្បីសិក្សា ផ្លូវនេះថាអាចប្រើថវិកាឃុំ ក្នុងឆ្នាំ២០២០ខាងមុខនេះ ៕
