ភ្នំពេញ៖ កម្លាំងប៉ុស្តិ៍រដ្ឋបាលភ្នំពេញថ្មី បានធ្វើការឃាត់ខ្លួនជនសង្ស័យម្នាក់ ករណីលួចយកខោអាវ នៅចំណុចក្នុងផ្សារអីអន២ ហាងអាន់ឌឺអាម័រ ផ្លូវ១០០៣ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ នៅថ្ងៃទី៣១ខែកក្កដាឆ្នាំ២០១៩ វេលាម៉ោង ១០ និង៣០នាទី។
ប្រភពពីសមត្ថកិច្ចបានអោយដឹងថាជនសង្ស័យ ម្នាក់មាន ឈ្មោះ THEODOROU KONSTANTINOS ភេទប្រុស អាយុ៤២ឆ្នាំ ជនជាតិក្រិច មុខរបរមិនពិតប្រាកដ ស្នាក់នៅបន្ទប់ជួល ផ្លូវលំ ភូមិបន្លាស្អិត សង្កាត់ឃ្មួញ ខណ្ឌសែនសុខ (គ្មានសារធាតុញៀន) កាន់លិខិតឆ្លងដែនលេខ AN3080213 ។
ចំណែកឯជនរងគ្រោះមាន ឈ្មោះ មាស បូរី ភេទប្រុស អាយុ២៦ឆ្នាំ ជនជាតិខ្មែរ មុខរបរបុគ្គលិកក្រុមហ៊ុនវ៉ល់ម៉ាកខេម ស្នាក់នៅផ្ទះលេខ៧ ផ្លូវបេតុង ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ។
សម្ភារៈបន្សល់ទុករួមមាន ខោជើងវែងចំនួន០១ , ខោជើងខ្លីចំនួន២ , អាវយឺតដៃខ្លីចំនួន០១ ប្រគល់ឲ្យជនរងគ្រោះវិញ និង (ទូរសព្ទ័ដៃ០១គ្រឿង ម៉ាកហូវៃ និងលិខិតឆ្លងដែន០១ របស់ជនសង្ស័យ )។
សមត្ថកិច្ចបានបន្ដថា នៅមុនពេលកើតហេតុ ជនសង្ស័យបានចូលក្នុងហាងលក់សំលៀកបំពាក់ខាងលើ រួចបានធ្វើសកម្មភាពលួចយកសំលៀកបំពាក់ ក្នុងហាងហាងអាន់ឌឺអាម័រ ក្នុងផ្សារអីអន២ បន្ទាប់មកជនរងគ្រោះឃើញ ក៍បានធ្វើការឃាត់នាំខ្លួនជនសង្ស័យ ប្រគល់ឲ្យសមត្ថកិច្ចប៉ុស្តិ៍រដ្ឋបាលភ្នំពេញថ្មីធ្វើការសាកសួរ រួចជនរងគ្រោះបានដាក់ពាក្យបណ្តឹងចោទប្រកាន់ជនសង្ស័យតែម្តង ។
បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីអនុវត្តតាមនិតិវិធី ៕
