ភ្នំពេញ៖រថយន្តកុងទីន័រមួយគ្រឿង បានបេីកបោះពួយ ក្នុងល្បឿនលឿន ហេីយបួងចង្កូតបត់ឆ្វេងទាំងលឿនស្លេវ និងមិនបន្ថយល្បឿន ទេីបធ្វេីឲ្យរថយន្តផ្អៀងម្ខាងរហូតក្រឡាប់ផ្ងារជើងទទឹងផ្លូវតែម្ដង ធ្លាក់ទូកុងទីន័រអូសថ្នល់តែម្ដង តែមិនបណ្ដាលឲ្យមានមនុស្សរងរបួសនោះទេ នៅលេីផ្លូវថៃហ្គ័រ កែងផ្លូវជាតិលេខ១ សង្កាត់ព្រែកឯង ខណ្ឌច្បារអំពៅ កាលពីវេលាម៉ោងជាង០៣ទាបភ្លឺ ឈានចូលថ្ងៃចន្ទ ទី០៥ ខែសីហា ឆ្នាំ២០១៩នេះ។
តាមសមត្ថកិច្ចបានប្រាប់អោយដឹងថា នៅមុនកើតហេតុ គេឃើញរថយន្តសណ្ដោងកុងទីន័រខាងលើ មានក្បាលពណ៌ខៀវចាស់ ពាក់ស្លាកលេខភ្នំពេញ 3C-0795 និងកន្ទុយកុងតឺន័រ ស្លាកលេខភ្នំពេញ 4A-0461 បានធ្វើដំណើរតាមបណ្ដោយផ្លូវជាតិលេខ១ ទិសដៅពីកើតមកលិច ក្នុងល្បឿនលឿន ខណៈមកដល់ចំណុចផ្លូវថៃហ្គរ ក៏បួងចង្កូតមកខាងឆ្វេងដៃយ៉ាងលឿន និងមិនបន្ថយល្បឿនទៀតនោះ ក៏បណ្ដាលឲ្យរថយន្តផ្អៀងម្ខាង រហូតក្រឡាប់ផ្ងារជើងឡើងច្រង៉ាងទទឹងផ្លូវតែម្ដង ធ្វើឲ្យធ្លាក់ទូកុងតឺន័រអូសថ្នល់ខូចថ្នល់កៅស៊ូអស់ជាច្រេីនកន្លែង ចំណែករថយន្ត និងសម្ភារៈមួយចំនួនរងការខូចខាតយ៉ាងដំណំ។
អ្នកបេីកបរមានឈ្មោះ ខុន ខេន បានរត់គេចខ្លួនបាត់ស្រមោលហេីយ មុនសមត្ថកិច្ចចុះមកដល់ នេះបេីតាមកាតសម្គាល់ខ្លួនអ្នកបេីកបររអោយក្រុមហ៊ុនដឹកកុងទីន័រ S-N និងID-F05 ដែលបន្សល់នៅកន្លែងកេីតហេតុ។
ក្រោយមកសមត្ថកិច្ចមូលដ្ឋានបានចុះមកដល់រួចហៅឡានស្ទូច មកទាញអែបចិញ្ចេីមផ្លូវសិន ដេីម្បីទាក់ទងទៅសមត្ថកិច្ចជំនាញ ឲ្យមកធ្វើការវាស់វែងយករថយន្តបង្កទៅ រក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដេីម្បីរងចាំដោះស្រាយតាមនីតិវិធី៕ ដោយ៖ម៉េង
