ភ្នំពេញ៖ លោក សុខ ពេញវុធ អភិបាល នៃគណៈអភិបាលខណ្ឌដូនពេញ បានដឹកនាំក្រុមការងារ ចុះដោះស្រាយបញ្ហាជូនប្រជាពលរដ្ឋ ដែលរងផលប៉ះពាល់ពីការដ្ឋានសំណង់ អគារអគ្គនាយកដ្ឋានគយ និងរដ្ឋាករ ដែលបានធ្វើឱ្យស្ទះលូរំដោះទឹកនៅផ្លូវលេខ៥១ សង្កាត់ផ្សារថ្មីទី១ ខណ្ឌដូនពេញ។
ការចុះដោះស្រាយបញ្ហាខាងលើ ត្រូវបានធ្វើឡើង នៅព្រឹកថ្ងៃអាទិត្យ ១១កើត ខែស្រាពណ៌ ឆ្នាំកុរ ឯកស័ក ពស២៥៦៣ ត្រូវនឹងថ្ងៃទី១១ ខែសីហា ឆ្នាំ២០១៩ ស្ថិតនៅក្នុងសង្កាត់ផ្សារថ្មីទី១ ខណ្ឌដូនពេញ។
ដោយក្នុងនោះ ជំហ៊ានទី១ លោកអភិបាល បានឱ្យឡានបូមលូបូមរំដោះទឹក នៅលើផ្លូវខាងលើជាមុនសិន។ ហើយជំហ៊ានទី២ ឱ្យការិយាល័យសាធារណការ សិក្សារកមូលហេតុដែលបង្កឱ្យស្ទះលូ និងរកវិធានការដោះស្រាយ និងជំហ៊ានបន្ទាប់ឱ្យក្រុមហ៊ុនជុសជុលផ្លូវនេះឡើងវិញ។
ជាមួុយគ្នានោះ ក៏បានឱ្យក្រុមការងារ និងតំណាងក្រុមហ៊ុនម៉ៅការសាងសង់ សុំទោសបងប្អូនប្រជាពលរដ្ឋ និងជម្រាបអំពីដំណោះស្រាយរបស់រដ្ឋបាលខណ្ឌ ដើម្បីដោះស្រាយបញ្ហាខាងលើផងដែរ៕
