តាកែវ៖សាខាកាំកុងត្រូលខេត្តតាកែវ ដឹកនាំមន្ត្រីជំនាញចុះពិនិត្យ ចំណីអាហារ គ្រឿងឧបភោគ បរិភោគ កំពុងដាក់លក់នៅផ្សារត្រពាំងអណ្ដើក ស្រុកត្រាំកក់ នាព្រឹកថ្ងៃចន្ទ ១២ កើត ខែស្រាពណ៍ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី១២ ខែសីហា ឆ្នាំ២០១៩ ។
លោក ប៉ោ លាងគង់ ប្រធានសាខាកាំកុងត្រូលខេត្តតាកែវ សហការជាមួយមន្ទីរពាណិជ្ជកម្មខេត្ត រួមជាមួយនឹងមន្ត្រីជំនាញ នៃសាខាកាំកុងត្រូលខេត្ត បានចុះត្រួត ពិនិត្យចំណីអាហារ នឹងគ្រឿងឧបភោគបរិភោគ ដែលកំពុងដាក់លក់នៅផ្សារត្រពាំងអណ្ដើក ឃុំត្រពាំងក្រញូង ស្រុកត្រាំកក់ ខេត្តតាកែវ។
បើយោងតាមការបញ្ជាក់ពី លោក ប៉ោ លាងគង់ ប្រធានសាខាកាំកុងត្រូលខេត្តតាកែវ បានឲ្យដឹងថា ចំណីអាហារ និងមុខទំនិញមួយចំនួន ដែលកំពុងដាក់លក់នៅក្នុងផ្សារត្រពាំងអណ្ដើកនេះ ត្រូវបានមន្រ្តីជំនាញពិនិត្យ នឹងធ្វើតេស្តបឋម ប៉ុន្តែជាលទ្ធផល គឺពុំមានការរកឃើញនូវសារធាតុគីមីណាមួយនៅលើមុខទាំងនោះទេ។
ឆ្លៀតក្នុងឱកាសនោះដែរ លោកប្រធានសាខាកាំកុងត្រូលខេត្ត រួមជាមួយមន្រ្តីជំនាញ ក៏បានណែនាំដល់អាជីវករ អំពីអនាម័យនៃការដាក់តាំងលក់ម្ហូបអាហារ ត្រូវពិនិត្យផលិតផលរបស់ខ្លួនជាប្រចាំ និងជ្រើសរើសផលិតផលដែលមានស្លាកសញ្ញាត្រឹមត្រូវមកដាក់តាំងលក់ ជៀសវាងដាក់លក់ទំនិញដែលមានចម្លងមេរោគ ខូចគុណភាព ឬទំនិញក្លែងក្លាយ ដែលធ្វើឱ្យប៉ះពាល់ដល់សុខភាពប្រជាពលរដ្ឋ ដែលជាអ្នកបរិភោគ ៕
