ព្រះសីហនុ៖ព្រឹកថ្ងៃទី ១៧ ខែសីហាឆ្នាំ ២០១៩ គួចចំរើនអភិបាលខេត្តព្រះសីហនុអមដំណើរដោយមន្ត្រីជាច្រើនរូបទៀត បានអញ្ជើញចុះពិនិត្យមើលស្ថានភាពជាក់ស្តែងស្ពានមួយកន្លែងមានទីតាំងនៅភូមិ ១ សង្កាត់លេខ ១ ក្រុងព្រះសីហនុ ដែលត្រូវបានវាយប្រហារដោយជំនន់ទឹកភ្លៀងកាលពីប៉ុន្មានថ្ងៃនេះបណ្តាលអោយច្រោះដាច់គល់ស្ពានបង្កការលំបាកដល់ប្រជាជននិងសិស្សានុសិស្សឆ្លងកាត់។
ក្រោយចុះពិនិត្យជាក់ស្តែងឯកឧត្តម គួច ចំរើន បានបញ្ជាឲ្យមន្ត្រីជំនាញចុះសិក្សាស្ពាននេះឡើងវិញដើម្បីស្ថាបនាជូនប្រជាពលរដ្ឋធ្វើដំណើរឆ្លងកាត់បានស្រួល។
ឯកឧត្តម គួច ចំរើន ក៏បានសន្យាជាមួយប្រជាពលរដ្ឋនិងធ្វើការស្ថាបនាផ្លូវមួយខ្សែទៀតចាប់ពីចំណុចស្ពាននេះនៅភ្ជាប់នឹងផ្លូវជាតិលេខ ៤ ម្តុំរោងចក្រក្រោនផងដែរ។
ជាមួយនេះឯកឧត្តម ក៏បានណែនាំឲ្យមន្ត្រីជំនាញកោះអញ្ជើញម្ចាស់ទីតាំងសិប្បកម្មផលិតឥដ្ឋមួយកន្លែងក្បែរគល់ស្ពានដែលបានរំលោភមកលើអូរអោយទៅសាលាខេត្តដើម្បីធ្វើការដោះស្រាយ ដោយតម្រូវកាយចេញជាបន្ទាន់។
ឯកឧត្តម គួច ចំរើន បានបញ្ជាក់បន្ថែមថាប្រសិនបើជាស្ពានឈើដែលត្រូវបានភ្ជាប់ជាមួយនឹងស្ពានថ្មឆ្លងអូរនេះវាខូច ពលរដ្ឋលំបាកធ្វើដំណើរ អភិបាលខេត្តនឹងរៀបចំធ្វើស្ពានបាលេដើម្បីដោះស្រាយជូនប្រជាពលរដ្ឋបានឆ្លងសិន។
ឆ្លើយតបចំពោះការគិតគូររបស់ថ្នាក់ដឹកនាំខេត្តព្រះសីហនុ ពេលនេះ ក្រុមប្រជាពលរដ្ឋដែលរស់នៅតំបន់នោះបានសំដែងការអបអរសាទរនិងគាំទ្រចំពោះកិច្ចអន្តរាគមន៍នេះ។
សូមបញ្ជាក់ជូនថា ក្រោយការវាយប្រហារឲ្យដាច់គល់ស្ពាននៅចំណុចនេះ បច្ចុប្បន្នប្រជាពលរដ្ឋនិងអាជ្ញាធរមូលដ្ឋានបានធ្វើការជួសជុលដោយដាក់ឈើឆ្លងបណ្តោះអាសន្នសិន។
គួរបញ្ជាក់ថាបន្ទាប់ពីបានចុះពិនិត្យស្ពាននៅភូមិ១ សង្កាត់លេខ ១ អភិបាលខេត្តព្រះសីហនុក៏បានអញ្ជើញចុះពិនិត្យផ្លូវ ទីតាំងមួយចំនួនទៀតនៅក្នុងក្រុងព្រះសីហនុដែលបានរងការខូចខាតដោយសារតែជំនន់ទឹកភ្លៀងរយៈពេលកន្លងទៅនេះ។
ចំពោះមុខនេះនឹងធ្វើការជួសជុលកែលំអជាបឋមដើម្បីសម្រួលការធ្វើដំណើររបស់ប្រជាជន មុនគ្រោងជួសជុលដែលដែលជាកញ្ចប់ពិសេសរបស់រដ្ឋាភិបាលចំនួន២២ខ្សែនឹងត្រូវអនុវត្តនាថ្ងៃខាងមុខឆាប់ៗនេះ។
ដោយឡែកប្រព័ន្ធអូរប្រឡាយរំដោះទឹកភ្លៀងវិញ អភិបាលខេត្តថាក្រុមការងារគឺនៅតែបន្តធ្វើការស្តារនិងកែលម្អបានសរសើរដើម្បីបញ្ចៀសនូវការជន់លិចនៅពេលមានភ្លៀងធ្លាក់ម្ដង៕
