បន្ទាយមានជ័យ ៖នៅតាមច្រកតំបន់បឹងត្រកួន ស្រុកថ្មពួក ខេត្តបន្ទាយមានជ័យ បច្ចុប្បន្ននេះលោក ញឹក ប៊ុនលេខ ប្រធានការិយាល័យគយច្រកទ្វារតំបន់បឹងត្រកួន ឃុបឃិតឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់កាន់តែច្រើនដោយគ្មានញញើតអ្វីទាំងអស់។
ប្រភពបានឲ្យដឹងទៀតថា ការដែលលោក ញឹក ប៊ុនលេខ ហ៊ានធ្វើអ្វីៗតាមអំពើចិត្ត គឺដោយសារមានការសម្របសម្រួលពីសំណាក់មន្ត្រីគយធំៗនៅក្នុងខេត្តបន្ទាយមានជ័យ ផងដែរទើបអ្វីៗអាចប្រព្រឹត្តទៅដោយរលូនដូចសព្វថ្ងៃនេះ។
ម្យ៉ាងទៀតលោក ញឹក ប៊ុនលេខ អាងមានខ្នងបង្អែករឹងមាំនៅក្នុងអគ្គនាយកដ្ឋានគយនិងរដ្ឋាករកម្ពុជា ក៏ដូចជានៅក្នុងក្រសួងសេដ្ឋកិច្ចនិងហិរញ្ញវត្ថុ ទើបមិនញញើតក្នុងការប្រមូលលុយតាមរបៀបពុករលួយ។
ប្រភពពីមន្ត្រីគយក្នុងខេត្តបន្ទាយមានជ័យ ដែលស្និទ្ធនឹងលោក ញឹក ប៊ុនលេខ បានបង្ហើបឲ្យដឹងថា បើទោះបីកន្លងមកលោក ញឹក ប៊ុនលេខ ប្រើតួនាទីនិងអំណាចឃុបឃិតឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់តាមអំពើចិត្តក៏ដោយ ក៏លោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា ធ្វើមិនដឹងមិនឮអ្វីទាំងអស់។
ដូច្នេះហើយទើបលោក ញឹក ប៊ុនលេខ កាន់តែបានចិត្តនិងមានអំណាចធំធេងក្នុងការប្រមូលលុយតាមរបៀបពុករលួយ ហើយឈ្មួញនាំចូលទំនិញតាមច្រកទ្វារតំបន់បឹងត្រកួន បង់ពន្ធត្រឹម៣៥ទៅ៤០ភាគរយប៉ុណ្ណោះ។
ជាងនេះទៅទៀតក្រុមហ៊ុនដែលនាំចូលជ្រូកតាមច្រកតំបន់បឹងត្រកួន ត្រូវបានលោក ញឹក ប៊ុនលេខ ឃុបឃិតបន្លំតួលេខចំនួនជ្រូកដែលនាំចូលផងដែរ ដូចដែលបណ្ដាញព័ត៌មាននានាចុះផ្សាយជាបន្តបន្ទាប់រួចទៅហើយ។
ថ្មីៗនេះមន្ត្រីនៅច្រកតំបន់បឹងត្រកួន មួយចំនួនបានបង្ហើបឲ្យដឹងថា លោក ញឹក ប៊ុនលេខ នៅតែបន្តឃុបឃិតបើកដៃឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់កាន់តែច្រើនឡើងៗ។
ជាមួយគ្នានេះលោក ញឹក ប៊ុនលេខ ក៏បានឃុបឃិតជាមួយសមត្ថកិច្ចដទៃទៀតបើកដៃឲ្យឈ្មួញដឹកជញ្ជូនធ្យូងចេញទៅស្រុកសៀម តាមច្រកបឹងត្រកួន យ៉ាងពេញបន្ទុកផងដែរដើម្បីជាថ្នូរនឹងផលប្រយោជន៍ផ្ទាល់ខ្លួន។
ដូច្នេះលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មិនគួរមើលរំលងរឿងអាស្រូវពុករលួយនិងទង្វើមិនប្រក្រតីរបស់លោក ញឹក ប៊ុនលេខ ប្រធានការិយាល័យគយច្រកបឹងត្រកួន តទៅទៀតឡើយ។
ដោយហេតុថា ក្រោយពេលរក្សាបានតំណែងជាប្រធានការិយាល័យគយច្រកបឹងត្រកួន យ៉ាងរឹងមាំគឺលោក ញឹក ប៊ុនលេខ ប្រើតួនាទីនិងអំណាចរបស់ខ្លួនដោយគ្មានញញើតអ្វីទាំងអស់ ហើយលោក គុណ ញឹម ដែលជាមេគយធំ មិនចាត់វិធានការទប់ស្កាត់អំពើពុករលួយរបស់លោក ញឹក ប៊ុនលេខ នៅឡើយទេ។
ជុំវិញករណីខាងលេីអង្គភាពមិនអាចសុំការបំភ្លឺពីលោក ញឹក ប៊ុនលេខនិងលោក គុណ ញឹម បានទេព្រោះគ្មានលេខទួរសព្ទ័អង្គភាពយេីងនិងធ្វេីការផ្សាយបន្ដបេីមានបកស្រាយបំភ្លឺពីលោក ញឹក ប៊ុនលេខនិងលោក គុណ ញឹម ដេីម្បីបញ្ជាក់ពីភាពស្អាតស្អំរបស់លោកនិងអោយមហាជនជ្រាបច្បាស់ផងដែរ៕
