កំពង់ចាម៖ លោកឧកញ៉ា សុខ សុខា និងលោកជំទាវ រួមជាមួយពុទ្ធបរិស័ទជិតឆ្ងាយ ប្រារព្ធពីធី កាន់បិណ្ឌទី៥ នៅវត្តភ្នំព្រះវិហារ ដែលស្ថិតនៅភូមិភ្នំព្រះវិហារ ឃុំតាំងក្រសាំង ស្រុកបាធាយ ខេត្ដកំពង់ចាម។ ការប្រារព្ធពីធីកាន់បិណ្ឌទី៥ នៅវត្តភ្នំព្រះវិហារ ធ្វេីឡេីងថ្ងៃពុធ ៥ រោច ខែភទ្របទ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី១៨ ខែកញ្ញា ឆ្នាំ២០១៩។
លោកឧកញ៉ា សុខ សុខា និងលោក ជំទាវ ព្រមទាំងបុត្រ រួមជាមួយ ឯកឧត្តម លោកជំទាវ លោក លោកស្រី ពុទ្ធបរិស័ទនិងប្រជាពលរដ្ឋ ជិតឆ្ងាយ បានអញ្ជើញចូលរួមក្នុងពិធីសូត្រមន្ត រាប់បាត្រ កាន់បិណ្ឌទី៥ នៅវត្តភ្នំព្រះវិហារ បានប្រគេនទេយ្យវត្ថុ សំភារៈបរិក្ខា និង បច្ច័យមួយចំនួនកសាងនៅទីវត្តអារាម ជួនពុទ្ធបរិស័ទ ប្រគេនព្រះសង្ឃ កុមារ៉ា កុមារីសរុបទឹកប្រាក់ចំនួន៥០០០ដុល្លា។
សូមរំលឹកថា ពិធីបុណ្យភ្ជុំបិណ្ឌ ជាពិធីបុណ្យមួយដែលធំជាងគេ នៅក្នុងចំណោមពិធីបុណ្យទាំងអស់ ចំពោះអ្នកកាន់ព្រះពុទ្ធសាសនា។ ពិធីនេះ មានរយៈពេល១៥ថ្ងៃ ដោយចាប់ពីថ្ងៃ១រោច ដល់ថ្ងៃ១៥រោច ខែភទ្របុត្រ ដែលជាថ្ងៃបុណ្យភ្ជុំបិណ្ឌ។
ពិធីបុណ្យកាន់បិណ្ឌ ភ្ជុំបិណ្ឌឆ្នាំ២០១៩នេះ នឹងប្រព្រឹត្តទៅចាប់ពីថ្ងៃ១រោច ដល់ថ្ងៃ ១៤រោច ខែភទ្របទ ត្រូវនឹងថ្ងៃទី១៤ ដល់ថ្ងៃទី ២៧ ខែកញ្ញា ឆ្នាំ២០១៩។
ទំនៀមទំលាប់ប្រពៃណីខ្មែរ គឺមនុស្សគ្រប់រូបត្រូវតាំងចិត្តបំពេញសេចក្ដីល្អ នឹងមានភាពកត្តញ្ញូ ដឹងគុណនឹកឃើញដល់ឪពុកម្ដាយ សាច់ញ្ញាត្តិ និងសាច់សារលោហិត ៧សន្ដានដែលធា្លប់មានគុណលើខ្លួន ទាំងអ្នកលាចាកលោកទៅហើយ និងអ្នកដែលនៅរស់។
ពិធីបុណ្យកាន់បិណ្ឌនៃបុណ្យភ្ជុំបិណ្ឌ គឺជាឱកាសឲ្យសាច់ញាតិទាំងឡាយដែលនៅផ្សេងៗគ្នា មកជួបជុំគ្នា បង្កើនឲ្យមានសាមគ្គីភាពគ្នា នឹងបណ្ដុះស្មារតីឲ្យមនុស្សលះបង់សេចក្ដីអាក្រក់គ្រប់យ៉ាងធ្វើល្អដើម្បីសង្គមជាតិរីកចំរើន។ រីឯ ឯកសារកត់ត្រាពីប្រវត្តិបុណ្យរបស់ខ្មែរ បង្ហាញថា ការប្រារព្ធពិធីបុណ្យនេះ គឺដើម្បីបួងសួង ឧទ្ទិសមគ្គផល កុសលផលបុណ្យ ទៅដល់ពពួកប្រែតអសុរកាយ។
ប្រជាពលរដ្ឋ មានជំនឿថា អ្នកមានគុណ បុព្វការីជន ឬសាច់ញាតិរបស់ពួកគេទាំងអស់ ដែលបានសាងបាបកាលពីនៅមានជីវិតរស់នៅ ហើយពេលចែកឋានទៅ មិនដឹងចាប់ជាតិជាអ្វី ឬមានបាបទៅកើតជាប្រេត នឹងឡើងមកទទួលកុសលផលបុណ្យនេះ ពីពួកគេ នៅពេលពពួកប្រេតទាំងនោះ ត្រូវបានគេដោះលែងឲ្យមានសេរីភាពរយៈពេល១៥ថ្ងៃ៕
