ភ្នំពេញ៖កម្លាំងគណៈបញ្ជាការឯកភាព រដ្ឋបាលខណ្ឌដូនពេញ ដឹកនាំដោយលោក សុខ ពេញវុធ អភិបាល នៃគណៈអភិបាលខណ្ឌដូនពេញ និងកម្លាំងគណៈបញ្ជាការឯកភាពរដ្ឋបាលស្រុកល្វាឯម ខេត្តកណ្ដាលដឹកនាំដោយ លោកអភិបាលស្រុកល្វាឯម បានជួបប្រជុំពិភាក្សាគ្នា និងបានឯកភាពគ្នាដាក់ទីតាំងទីបញ្ជាការស្រាលមួយ ដើម្បីធ្វើការត្រួតពិនិត្យលំហូរនៃការចេញ-ចូលធ្វើដំណើររបស់បងប្អូនប្រជាពលរដ្ឋពីស្រុកមករាជធានីភ្នំពេញ និងពីរាជធានីភ្នំពេញ ទៅស្រុក ដើម្បីចូលរួមបង្ការនិង ទប់ស្កាត់ការរីករាលដាលនៃជំងឺកូវិដ-១៩(COVID-19)។
នៅព្រឹកថ្ងៃសុក្រ ៣រោច ខែចេត្រឆ្នាំកុរ ឯកស័ក ពុទ្ធសករាជ២៥៦៣ ត្រូវនឹងថ្ងៃទី១០ ខែមេសា ឆ្នាំ២០២០ លោក សុខ ពេញវុធ អភិបាល នៃគណៈអភិបាលខណ្ឌដូនពេញ បានអញ្ជើញជួបពិភាក្សាជាមួយ លោក អភិបាល នៃគណៈអភិបាលស្រុកល្វាឯម នៃខេត្តកណ្ដាល ដើម្បីព្រមព្រៀងឯកភាពគ្នាដាក់ទីបញ្ជាការត្រួតពិនិត្យមួយនៅចំណុចកំពង់ចម្លងភ្នំពេញ-អរិយក្សត្រ ក្នុងការត្រួតពិនិត្យការធ្វើដំណើរចេញចូលរបស់បងប្អូនប្រជាពលរដ្ឋទូទៅ ពីរាជធានីភ្នំពេញ ទៅស្រុកល្វាឯម និងពីស្រុកល្វាឯម ខេត្តកណ្ដាល មករាជធានីភ្នំពេញ ដើម្បីចូលរួមបង្ការ និងទប់ស្កាត់ការរីករាលដាលនៃជំងឺកូវីដ១៩ ព្រមទាំងអនុវត្តតាមបទបញ្ជាលេខ ០២ប.ប របស់រាជរដ្ឋាភិបាល ស្ដីពីការដាក់កំហិតលើការធ្វើដំណើរក្នុងប្រទេសក្នុងគោលដៅបង្ការ និងទប់ស្កាត់ការរាតត្បាត នៃជំងឺកូវីដ១៩ និង សេចក្តីណែនាំលេខ ០០៥/២០ស.ណ.ន របស់រដ្ឋបាលរាជធានីភ្នំពេញ ។
ក្នុងនោះគណៈបញ្ជាការទាំងពីរបានឯកភាពគ្នាបង្កលក្ខណៈដល់បងប្អូនប្រជាពលរដ្ឋធ្វើដំណើរចេញ-ចូល ដូចខាងក្រោម៖
១-បង្កើតទីបញ្ជាការស្រាលមួយ ដើម្បីត្រួតពិនិត្យលំហូរនៃការចេញ-ចូលរបស់បងប្អូនប្រជាពលរដ្ឋ មន្ត្រីរាជការ បុគ្គលិក កម្មករ និយោជិត និងកងកម្លាំងប្រដាប់អាវុធ ។
២-ឯកភាពគ្នាដោយអនុញ្ញាតឱ្យអាជ្ញាធរមានសមត្ថកិច្ចទាំងពីរចេញលិខិតបញ្ជាក់នានាជូនដល់ មន្ត្រីរាជការ បុគ្គលិក កម្មករ និយោជិត និងកងកម្លាំងប្រដាប់អាវុធ ដែលមានភារកិច្ចចេញ-ចូលពីរាជធានីភ្នំពេញទៅស្រុក និងពីស្រុកមករាជធានីភ្នំពេញ ដើម្បីបំពេញភារកិច្ច ។
៣-ទីបញ្ជាការនេះបំពេញការងារចាប់ពីម៉ោង ០៤,០០នាទីទៀបភ្លឺរហូតដល់ម៉ោង ២០,០០នាទីយប់ ក្នុងករណីចាំបាច់ នឹងត្រូវធ្វើការពន្យារពេលតាមស្ថានភាពជាក់ស្ដែង ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋ ៕
