បន្ទាយមានជ័យ-ក្រុងប៉ោយប៉ែត ៖ ស្ថិតក្នុងកាលៈទេសៈដ៏លំបាកនៃការរាតត្បាតរបស់វីរុសកូវីដ-១៩ (COVID-19) នៅទូទាំងប្រទេសកម្ពុជា និងសកល រដ្ឋបាលក្រុងប៉ោយប៉ែត និងអាជ្ញាធរសង្កាត់ទាំងបី រួមមាន សង្កាត់ប៉ោយប៉ែត សង្កាត់ផ្សារកណ្ដាល និងសង្កាត់និមិត្ត ក្រោមការដឹកនាំចុះ ផ្ទាល់ពី លោក គាត ហ៊ុល អភិបាលនៃគណៈអភិបាលក្រុងប៉ោយប៉ែត ព្រមទាំងមន្ត្រីក្រោមឱវាទទាំងអស់ បានរៀបចំយុទ្ធនាកា ចែកអំណោយមនុស្សធម៌ដល់ប្រជាពលរដ្ឋក្រីក្រ និងជនងាយរងគ្រោះ ក្នុងដំណាក់កាលទី១ នៅទូទាំងក្រុងប៉ោយប៉ែតសរុបចំនួន ៤,៨០០គ្រួសារ។ ហើយបច្ចុប្បន្ននេះ ការចែកអំណោយមនុស្សធម៌ដល់ប្រជាពលរដ្ឋជួបការខ្វះខាតខ្លាំងក្នុងជីវភាពក្នុងដំណាក់ការទី២ កំពុងបន្តធ្វើឡើងជាបន្តបន្ទាប់ដូចភ្លៀងរលឹម ក្នុងស្ថានភាពនៃការរីករាលដាលរបស់ជំងឺឧត្បាតវីរុសកូវីដ-១៩។
ជាកស្ដែង នៅរសៀលថ្ងៃអង្គារ ១៤ រោច ខែចេត្រ ឆ្នាំជូតទោស័ក ពុទ្ធសករាជ ២៥៦៣ត្រូវនឹងថ្ងៃទី២១ ខែមេសា ឆ្នាំ២០២០ថ្ងៃនេះ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានដឹកនាំមន្រ្តីក្រោមឱវាទសហការជាមួយអាជ្ញាធរសង្កាត់ប៉ោយប៉ែត និងសង្កាត់ផ្សារកណ្តាល បន្តចុះចែកអំណោយមនុស្សធម៌ដល់ប្រជាពលរដ្ឋក្រីក្រ ជនងាយរងគ្រោះ ជនពិការ និងប្រជាពលរដ្ឋទីទាល់ក្នុងជីវភាពប្រចាំថ្ងៃក្នុងស្ថានភាពនៃជំងឺឧត្បាតវីរុសកូរ៉ូណាប្រភេទថ្មី កូវីដ-១៩ (COVID-19)។
អំណោយមនុស្សធម៌ដែលបានចែកជូននារសៀលនេះ បានរៀបចំឡើងនៅសាលាសង្កាត់ផ្សារកណ្តាល ចំនួន ៣៧គ្រួសារ (ក្នុងនោះក្រុមគ្រួសារ លោក លី ហេង ម្ចាស់ ក្រុមហ៊ុនលក់ដីល្វែង លី ហេងគ្រុប ក៏បានចូលរួមជាមួយអាជ្ញាធរសង្កាត់ផ្សារកណ្ដាល ចំនួន ២០គ្រួសារ ម៉ាស២៥ប្រអប់ និងអាជ្ញាធរសង្កាត់ផ្សារកណ្តាល ចំនួន ១៧គ្រួសារ ។
ក្រោយពីបញ្ចប់ការចែកអំណោយនៅសង្កាត់ផ្សារកណ្ដាល លោក គាត ហ៊ុល អភិបាល នៃគណៈអភិបាលក្រុង បន្តដឹកនាំក្រុមការងារ មកសាលាក្រុងប៉ោយប៉ែត ចែកអំណោយជូនប្រជាពលរដ្ឋ ចំនួន ៨០គ្រួសារ មកពីសង្កាត់ប៉ោយប៉ែត ដោយក្នុងមួយគ្រួសារទទួលបានអង្ករខ្សាយចំនួន ១០គីឡូក្រាម និងមី ចំនួន ១០កញ្ចប់។
ក្នុងឱកាសនោះ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានមានមតិសំណេះសំណាល និងសួរសុខទុក្ខចំពោះបងប្អូនប្រជាពលរដ្ឋដែលបានអញ្ជើញមកទទួលអំណោយមនុស្សធម៌នាពេលនេះ ។
ជាមួយគ្នានេះផងដែរ លោកអភិបាលក្រុង បានថ្លែងអំណរគុណយ៉ាងជ្រាលជ្រៅចំពោះអំណោយសប្បុរសធម៌ដ៏ថ្លៃថ្លារបស់ឯកឧត្តម ឧបនាយករដ្ឋមន្ត្រី កែ គឹមយ៉ាន និងលោកជំទាវ ឧកញ៉ា ហេមចិត្តាមហាឧបាសិកាពុទ្ធសាសនូបត្ថម្ភក៍ ម៉ៅ ម៉ាល័យ កែគឹមយ៉ាន និង សប្បុរសជនទាំងអស់ដែលបានចូលរួមបរិច្ចាគជូនរដ្ឋបាលក្រុងប៉ោយប៉ែត ដើម្បីបម្រើឱ្យការងារមនុស្សធម៌នាពេលនេះ។
ទន្ទឹមគ្នានេះ លោក គាត ហ៊ុល ក៏បានក្រើនរម្លឹកដល់បងប្អូនប្រជាពលរដ្ឋពីវិធានការដើម្បីការពារជំងឺឆ្លងនានា និងជំងឺរលាកសួតដោយវីរុសកូរ៉ូណាប្រភេទថ្មី (COVID-19) និងប្រការត្រូវធ្វើ និងប្រការមិនត្រូវធ្វើក្នុងការបង្ការ និងទប់ស្កាត់ការរីករាលដាលនៃជំងឺកូវីដ-១៩។
លោកអភិបាលក្រុងប៉ោយប៉ែត បានសង្កត់ធ្ងន់ថា សូមបងប្អូនប្រជាពលរដ្ឋទាំងអស់គ្នា ត្រូវប្រកាន់ខ្ជាប់នូវសារក្រេីនរម្លឹករបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជូនចំពោះប្រជាជនទូទៅ បន្តចូលរួមការពារ និងទប់ស្កាត់ការចម្លងវីរុសកូវីដ-១៩ សូមកុំភ្លេចខ្លួនឱ្យសោះ ទោះបីពេលនេះ ប្រទេសយើងគ្មានការដាក់បម្រាមហាមឃាត់តឹងតែងក្នុងការធ្វើដំណើរពីខេត្តមួយទៅកាន់ខេត្តមួយក្តី បងប្អូនប្រជាពលរដ្ឋត្រូវតែមានការប្រុងប្រយ័ត្នយកចិត្តទុកដាក់ចំពោះសុវត្ថិភាពសុខភាពជាប្រចាំ ហើយត្រូវចងចាំគ្រប់ពេលថា ជំងឺឆ្លងកូវីដ-១៩ គឺជាជំងឺឆ្លងរាត្បាតដ៏កាចសាហាវបំផុត ដែលក្នុងតែមួយពព្រិចភ្នែកប៉ុណ្ណោះ វាអាចបង្កវិនាសកម្មបានយ៉ាងឆាប់រហ័សបំផុត។
មកទល់ពេលនេះ គ្មានថ្នាំលេប ឬចាក់ព្យាបាលនៅឡើយទេ។ សូមបងប្អូនប្រជាពលរដ្ឋយកជាប់ជាមួយនូវម៉ាស ទឹកអាល់កុល ឬជែលសម្លាប់មេរោគ ហើយឧស្សាហ៍ដុសលាងសម្អាតដៃជាប្រចាំ។ សូមកុំឱ្យមានការសោកស្តាយធ្លាក់មកលើខ្លួនយើង និងក្រុមគ្រួសារយើងឱ្យសោះ ដោយសារតែការធ្វេសប្រហែស និងមើលស្រាល ជំងឺឆ្លងកូវីដ-១៩។ យើងចូលរួមទប់ស្កាត់ការឆ្លងរាលដាលមេរោគកូវីដ-១៩ ដោយស្តាប់តាមការណែនាំរបស់ក្រសួងសុខាភិបាល។
ថ្លែងក្នុងពិធីចែកអំណោយមនុស្សធម៌នេះដែរ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានសម្តែងការកោតសរសើរខ្ពស់ចំពោះមន្រ្តីក្រោមឱវាទទាំងអស់ ក៏ដូចជា កងកម្លាំងប្រដាប់អាវុធទាំងបីប្រភេទ ស្ថាប័នពាក់ព័ន្ធនានា អាជ្ញាធរសង្កាត់ទាំង៣ ក្រុមការងារភូមិ និងកម្លាំងប្រជាការពារភូមិដែលបានខិតខំបំពេញភារកិច្ចបានយ៉ាងខ្ជាប់ខ្ជួនបម្រើប្រជាពលរដ្ឋគ្រប់កាលៈទេសៈទាំងអស់ក្នុងស្ថានភាពដ៏លំបាកនៃយុទ្ធនាការប្រយុទ្ធប្រឆាំងនឹងជំងឺកូវីដ-១៩ នាពេលបច្ចុប្បន្ននេះ ៕ដោយ៖លោកចាន់ ពុធ 
