បន្ទាយមានជ័យ-ក្រុងប៉ោយប៉ែត ៖ ដោយអនុវត្តតាមគោលការណ៍របស់រាជរដ្ឋាភិបាល អាជ្ញាធរគ្រប់លំដាប់ថ្នាក់ បានចុះធ្វើសកម្មភាពអប់រំផ្សេព្វផ្សាយអំពីមេរោគឆ្លងកូរ៉ូណា និងវិធានការទប់ស្កាត់នៃជំងឺនេះ ជូនដល់បងប្អូនប្រជាពលរដ្ឋនៅទូទាំងប្រទេស ដើម្បីបង្ការកុំអោយរីករាលដាលតទៅទៀត ។
ជាក់ស្តែងនៅព្រឹកថ្ងៃចន្ទ ៦ កើត ខែពិសាខ ឆ្នាំជូត
ទោស័ក ពុទ្ធសករាជ ២៥៦៣ត្រូវនឹងថ្ងៃទី២៧ ខែមេសា ឆ្នាំ២០២០ នេះ លោក គាត ហ៊ុល អភិបាលនៃគណៈអភិបាលក្រុងប៉ោយប៉ែត បានដឹកនាំមន្ត្រីរដ្ឋបាលក្រុង អាជ្ញាធរសង្កាត់ មេភូមិ អនុភូមិ កម្លាំងប្រជាការពារ កម្លាំងអធិការនគរបាលក្រុង និង កម្លាំងកងរាជអាវុធហត្ថមូលដ្ឋានក្រុងប៉ោយប៉ែត ចុះអប់រំ និងផ្សព្វផ្សាយ ការទប់ស្កាត់ការរីករាលដាលនៃ ជំងឺកូវីដ១៩ និងចែកម៉ាស់ដល់បងប្អូន អាជីវករ ប្រជាពលរដ្ឋ ក្រុមម៉ូតូឌុប ដែលមិនមានម៉ាស់ពាក់ នៅតាមបណ្ដាលផ្សារ ទីប្រជុំជន ក្នុងក្រុងប៉ោយប៉ែត ដោយបែងចែក ជា៣ក្រុម ៕ ដោយ៖ លោកចាន់ពុធ
