ក្រុងប៉ោយប៉ែត ៖ ដោយ គិតគូ ពីសុខទុក្ខ ប្រជាពលរដ្ឋក្នុងភូមិសាស្ត្រ លោក គាត ហ៊ុល អភិបាលនៃគណៈអភិបាលក្រុងប៉ោយប៉ែត បានណែនាំដល់អាជ្ញាធរមូលដ្ឋានគ្រប់លំដាប់ថ្នាក់ ត្រូវយកចិត្តទុក្ខដាក់ ដល់ បងប្អូនប្រជាពលរដ្ឋ ដែលមានជីវភាពខ្វះខាត ក្នុងស្ថានភាពនៃការរាតត្បាតដោយវីរុសកូវីដ-១៩ កំពង់ធ្វើអោយសេដ្ឋកិច្ចធ្លាក់ចុះ ទោះតិចតួចក្ដី តែជាទឹកចិត្តចែករំលែក របស់អាជ្ញាធរក្រុងប៉ោយប៉ែត ។
ដូច្នេះហើយ អាជ្ញាធរសង្កាត់និមិត្ត ដែលមាន លោក ហ៊ុល សំអូន ជាចៅសង្កាត់ បានបន្តចែកអំណោយមនុស្សធម៌ដល់ពលរដ្ឋដែលមានជីវភាពខ្វះខាត ជនងាយរងគ្រោះ និងជនពិការ ចំនួន១៥៧គ្រួសារ ក្នុងស្ថានភាពនៃការរាតត្បាតដោយវីរុសកូវីដ-១៩ នៅរសៀលថ្ងៃអង្គារ ៧កើតខែពិសាខឆ្នាំជូតទោស័កពុទ្ធសករាជ ២៥៦៣ ត្រូវនឹងថ្ងៃទី ២៨ ខែមេសាឆ្នាំ ២០២០ នេះ ក្រោមអធិបតីភាពលោក គាត ហ៊ុល អភិបាល នៃគណៈអភិបាលក្រុងប៉ោយប៉ែត និងមានការអញ្ជើញចូលរួមអមដំណើរ លោក កែវ តារារស្មី អភិបាលរង នៃគណៈអភិបាលក្រុងប៉ោយប៉ែត លោក គង់ សុខ សមាជិកក្រុមប្រឹក្សាក្រុង លោក ញឹម ផឿង នាយករដ្ឋបាលក្រុង លោក ស៊ូ បាន មន្ត្រីការិយាល័យគ្រប់គ្រងធនធានមនុស្សក្រុង លោក ហ៊ុល សំអូន ចៅសង្កាត់ នៃសង្កាត់និមិត្ត លោក លោកស្រី ជាចៅសង្កាត់រង សមាជិកក្រុមប្រឹក្សាសង្កាត់ នៃសង្កាត់និមិត្ដ រួមនឹងមេភូមិនិងកម្លាំងប្រជាការពារភូមិជាច្រើននាក់ ។
នៅក្នុងឱកាសចែកអំណោយមនុស្សធម៌នេះ ក្រុមការងារសង្កាត់និមិត្ត និងកម្លាំងប្រជាការពារភូមិ បានធ្វើការចែកម៉ាសជូនបងប្អូនប្រជាពលរដ្ឋទាំងអស់ដែលបានមកទទួលអំណោយយ៉ាងយកចិត្តទុកដាក់ ក្នុងន័យបង្ការ និងទប់ស្កាត់ការចម្លងជំងឺឧត្បាត កូវីដ-១៩ (COVID-19)។ ពិធីនេះ បានរៀបចំឡើងនៅសាលាសង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត និងជាសមាជិកគណៈកម្មការប្រយុទ្ឋនឹងជំងឺកូវីដ-១៩ ខេត្តបន្ទាយមានជ័យ បានក្រើនរម្លឹកចំពោះការបាត់បង់នូវការប្រុងប្រយ័ត្នក្នុងការការពារខ្លួនពីការចម្លងជំងឺកូវីដ-១៩ ដែលកត្តានេះគឺជាហានិភ័យខ្ពស់ក្នុងការបើកផ្លូវសម្រាប់ការរាតត្បាតនៃវីរុសកូវីដ-១៩ នៅក្នុងមូលដ្ឋានក្រុងប៉ោយប៉ែត ខេត្តបន្ទាយមានជ័យ ។ ដោយ លោកចាន់ពុធ
