ភ្នំពេញ៖ក្រុមអាជីវករ តាមរាជធានីខេត្តមួយចំនួន បានរួមគ្នាផ្តិតមេដៃបានចំនួន៥៦៥នាក់ តាមរយៈសមាគមផ្គត់ផ្គង់ជ្រូកកម្ពុជា បានស្នើសុំលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និង នេសាទ ចាត់វិធានការទប់ស្កាត់ការផ្ទេរសិទ្ធិនាំសត្វជ្រូករស់ពីថៃ និង បន្ថូរបន្ថយថ្លៃដើម ក្នុងគោលដៅផ្តាច់មុខ ។
តាមប្រភពព័ត៌មានពីក្រុមអាជីវករ បានអោយដឹងថា បច្ចុប្បន្ននេះ មានក្រុមហ៊ុនចំនួន៧ ដែលបានទទួលការអនុញ្ញាតពីក្រសួងកសិកម្ម តែលោកឧកញ៉ា លឹម សុផល បានកាន់កាប់ផ្តាច់មុខចំនួន៦ក្រុមហ៊ុន ទៅហើយ ។
យោងតាមលិខិតមួយច្បាប់ កាលពីថ្ងៃទី២០ ខែមេសា ឆ្នាំ២០២០ ដែលបានដាក់ចូលដល់ក្រសួងកសិកម្ម នៅថ្ងៃទី២៣ ខែមេសា ឆ្នាំ២០២០ , សមាគមផ្គង់ផ្គត់ជ្រូកកម្ពុជា បានជម្រាបជូនលោករដ្ឋមន្ត្រីក្រសួងកសិកម្ម ថា បន្ទាប់ពីក្រុមហ៊ុនមួយចំនួនបានទទួលលិខិតអនុញ្ញាតពីក្រសួងកសិកម្ម ដើម្បីនាំចូលសត្វជ្រូករស់ពីប្រទេសថៃ សមាគម សង្កេតឃើញថា ក្រុមហ៊ុនមួយចំនួនបានផ្ទេរសិទ្ធិនាំចូលសត្វជ្រូករស់ពីប្រទេសថៃទៅអោយអាជីវករម្នាក់ទៀត (ឧកញ៉ា លឹម សុផល) ដែលដើរប្រមូលយកសិទ្ធិនាំចូល ដើម្បីគ្រប់គ្រងការនាំចូលសត្វជ្រូករស់តែម្នាក់ឯង ដែលផ្ទុយពីគោលការណ៍របស់ក្រសួង ដែលធ្លាប់បានណែនាំកន្លងមក ។
សមាគមផ្គង់ផ្គត់ជ្រូកកម្ពុជា អះអាងប្រាប់លោករដ្ឋមន្ត្រីក្រសួងកសិកម្ម ទៀតថា សមាគមពិនិត្យឃើញថា ក្រសួងមិនបានបន្តអនុញ្ញាតអោយក្រុមហ៊ុនមួយចំនួនដែលធ្លាប់នាំសត្វជ្រូកពីប្រទេសថៃកន្លងមក តែបែរជាបន្តការអនុញ្ញាតអោយក្រុមហ៊ុនថ្មីៗទៅវិញ ។
ករណីនេះ ធ្វើអោយទីផ្សារសត្វជ្រូកមិនមានស្ថេរភាពល្អ ហើយអាចធ្វើអោយបុគ្គលមួយចំនួនក្តោបក្តាប់ទីផ្សារសត្វជ្រូកផ្តាច់មុខតែម្នាក់ឯងក្នុងប្រទេសកម្ពុជា ហើយបណ្តាលអោយសត្វជ្រូលឡើងថ្លៃខុសប្រក្រតីនៅលើទីផ្សារ និង ធ្វើអោយបាត់បង់ឱកាសនៃការប្រកួតប្រជែងតម្លៃនៅក្នុងទីផ្សារសេរី ដែលធ្វើអោយមានផលប៉ះពាល់មួយចំណែកធំដល់ប្រជាជនកម្ពុជា ។
ជាមួយគ្នានេះ សមាគមផ្គង់ផ្គត់ជ្រូកកម្ពុជា ស្នើសុំរដ្ឋមន្ត្រីក្រសួងកសិកម្ម មេត្តាទប់ស្កាត់នូវការផ្ទេរសិទ្ធិនាំចូលសត្វជ្រូករស់ពីប្រទេសថៃតាមគ្រប់រូបភាពនិងស្នើសុំអោយក្រសួងមិនទទួលស្គាល់គ្រប់ទម្រង់នៃការផ្ទេរនូវសិទ្ធិលិខិតអនុញ្ញាត ឬ អាជ្ញាប័ណ្ណនៃការនាំចូលណាមួយឡើយ ដើម្បីធានាបាននូវនិរន្តរភាពនៃការប្រកួតប្រជែងតម្លៃ ដោយស្មើភាពនិងស្មោះត្រង់ និង ជាប្រយោជន៍របស់ប្រជាពលរដ្ឋ ។
ទោះបីយ៉ាងណា បញ្ហានេះ កាលពីថ្ងៃទី៣០ ខែមេសា ឆ្នាំ២០២០ លោក ស្រី វុឌ្ឍី អគ្គលេខាធិការនៃក្រសួងកសិកម្ម រុក្ខាប្រមាញ់ និង នេសាទ បានឆ្លើយតបលិខិតរបស់សមាគមផ្គង់ផ្គត់ជ្រូកកម្ពុជា រួចរាល់ហើយដែរ ។
ទន្ទឹមនេះ តាមប្រភពព័ត៌មានពីក្រុមអាជីវករ គឺ ក្រុមហ៊ុនទាំង៧រួមមាន ៖ លឹម ស៊ីវម៊ី , អិមអីម អេហ្គ្រីខលឈ័រ , ហ្វាញ ខេមបូឌា , ចាន់ធូ មានជ័យ អ៊ីមផតអិចផត , អង្គរ សុខ សែន ជ័យ និង ៣ ធីអេច ។
ទាំង៦ក្រុមហ៊ុននេះ មានម្ចាស់តែមួយប៉ុណ្ណោះ គឺ ឧកញ៉ា លឹម សុផល ។ ម្យ៉ាងវិញទៀតនោះពួកគាត់ប្រឈមនឹងអត់ការងារធ្វេីផងដែរ។
ដោយឡែក ក្រុមហ៊ុនទី៧ មានឈ្មោះ ដានី ដេងអ៊ីម ផតអិចផត ផ្សេង។
សូមបញ្ចាក់ថាកាលពីអំឡុងខែកញ្ញាឆ្នាំ២០១៩ក្រុមហ៊ុនជឺ ប៊ុនថន ឯ.កត្រូវបានបិតទាំងស្រុងផងដែរព្រោះថាក្រសួងកសិកម្មរុក្ខាប្រមាញ់និងនេសាទមិនបន្ដអាជ្ញាប័ណ្ណឲ្យនេះបេីតាមការអះអាងពីម្ចាស់ក្រុមហ៊ុន៕
