ភ្នំពេញ៖ដោយមើលឃើញពីតម្រូវប្រើប្រាស់ផ្លូវ និងដោយមានការសម្របសម្រួលពីសំណាក់លោក ហែម ដារិទ្ធិ អភិបាលខណ្ឌពោធិ៍សែនជ័យ ទើបនៅព្រឹកថ្ងៃទី៥ ខែឧសភា ឆ្នាំ២០២០ ក្រុមប្រឹក្សាភិបាលរដ្ឋាករស្វ័យតក្រុងភ្នំពេញ បានយល់ព្រមបរិច្ចាកដី ដែលជាដីកម្មសិទ្ធិរបស់រដ្ឋាករទឹក ជូនបងប្អូនប្រជាពលរដ្ឋ នៅភូមិត្រពាំងថ្លឹងទី១ សង្កាត់ចោមចៅទី១ ធ្វើការអភិវឌ្ឍពង្រីកផ្លូវដើម្បីប្រើប្រាស់បានទាំងអស់គ្នា។
ជាក់ស្តែង ថ្ងៃទី៥ ខែឧសភា ឆ្នាំ២០២០ ចាប់ពីម៉ោង៨៖០០នាទីព្រឹក រហូតដល់ល្ងាច លោក កង វង ចៅសង្កាត់ចោមចៅទី១ បានដឹកនាំមន្ត្រីសង្កាត់ លោកស្រីមេភូមិ ដាក់គ្រឿងចាក់ឈូសឆាយផ្លូវ ដើម្បីឲ្យបងប្អូនប្រជាពលរដ្ឋ ក្នុងភូមិងាយស្រួលធ្វើដំណើរជាងមុន ក្នុងនោះដែរ រដ្ឋាករស្វយ័តក្រុងភ្នំពេញ បានបរិច្ចាកដី របស់រដ្ឋស្របច្បាប់ជូនប្រជាពលរដ្ឋ ដើម្បីបង្ករភាពងាយស្រួល ក្នុងការធ្វើដំណើរ នៅក្នុងភូមិ ដែលមានទទឹង២,៤០ម៉ែត្រ បណ្តោយ៣៥ម៉ែត្រ។
គួរំលឹកថា កំណាត់ផ្លូវលំ១ខ្សែ ប្រវែង ៥៥៤ម៉ែត្រ ទទឹង៥ម៉ែត្រ នៅភូមិត្រពាំថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ ត្រូវបានបើកការដ្ឋានជួសជុល ពីផ្លូវដីឱ្យទៅជាផ្លូវបេតុង គ្មានសរសៃដែក នាព្រឹកថ្ងៃទី១១ ខែតុលានេះ ក្រោមអធិបតីភាពលោក ហែម ដារិទ្ធ អភិបាលខណ្ឌ ដោយប្រើប្រាស់ថវិកា គំរោងមូលនិធិអភិវឌ្ឍន៍សង្កាត់ ឆ្នាំ២០១៩។
លោក កង វង ចៅសង្កាត់ចោមចៅទី១ បានឱ្យដឹងថា នៅក្នុងមូលដ្ឋានសង្កាត់ចោមចៅទី១ មានផ្លូវលំប្រភេទផ្លូវដីបែបនេះ ជាច្រើនខ្សែដែលមិនទាន់បានជួសជុលកែលម្អ។ ជាមួយនេះ ដោយសារតែថវិកា គំរោងមូលនិធិប្រចាំឆ្នាំមានកម្រិត សង្កាត់បានជ្រើសរើសផ្លូវណា ដែលជួបការលំបាកខ្លាំង លើកជាគម្រោងអាទិភាព ដាក់សុំការជួសជុលជាបន្ទាន់ ចំណែកផ្លូវផ្សេងៗទៀត នឹងដំណើរការពេលក្រោយតាមលទ្ធភាព។
ក្នុងឳកាសនោះដែរ លោក កង វង ចៅសង្កាត់ ក៏បានថ្លែងអំណរគុណដល់ថ្នាក់ដឹកនាំគ្រប់លំដាប់ថ្នាក់ ដែលបានជួយសំរួល ក៏សូមអរគុណ លោកប្រធាន អគ្គនាយក រដ្ឋាករទឹកស្វយ័តក្រុងភ្នំពេញ ដែលបានអនុញ្ញាត ហើយខ្ញុំបាទ កង វង ចៅសង្កាត់ សូមអរគុណ លោក ហែម ដារិទ្ធិ អភិបាលខណ្ឌពោធិ៍សែនជ័យ ដែលលោកបានខិតខំជួយដោះស្រាយ នៅភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញនេះ៕ 
