បន្ទាយមានជ័យ៖ នៅវេលាម៉ោង១២ និង០៥នាទី រំលងអាធ្រាត ថ្ងៃទី០៥ ខែ០៥ ឆ្នាំ២០២០ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោក វរសេនីយ៍ត្រី នួន នីណារ៉ូ មេបញ្ជារកងរាជអាវុធហត្ថក្រុង បានចុះល្បាតការពារសន្តិសុខសណ្ដាប់ធ្នាប់ក្នុងភូមិសាស្រ្តក្រុង រហូតដលល់ម៉ោង០៣ និង ០០ នាទីទៀបភ្លឺ នៅចំណុចវត្តថ្មី ស្ថិតក្នុងភូមិបាលិលេយ្យ សង្កាត់/ក្រុងប៉ោយប៉ែត ខេត្តបន្ទាយមានជ័យ ។
បានប្រទះឃើញបុរសម្នាក់ឈរតាមផ្លូវ ដោយមានការសង្ស័យកម្លាំងសមត្ថកិច្ចបានធ្វើការសួរនាំ ហើយបុរសឈ្មោះ ចក់ លីន ឆ្លើយថា ខ្លួនគេឈរមើលផ្លូវឱ្យមិត្តភ័ក្រគេ ប្រើប្រាស់គ្រឿងញៀន។ ដូច្នេះកម្លាំងបានធ្វើប្រតិបត្តិការឃាត់ខ្លួនបាន ជនសង្ស័យចំនួន០១នាក់ទៀត ឈ្មោះ ង៉ែត ជឺយ ហៅ អាកណ្ដុរ និងបានដកហូតវត្ថុតាង កាំបិតចំនួន០៧ដើម ហើយបញ្ជូនមកមូលដ្ឋាន កងរាជអាវុធហត្ថ ក្រុង ដើម្បីសាកសួរ។
លោក វរសេនីយ៍ត្រី នួន នីណារ៉ូ បានឱ្យដឹងថា តាមចម្លើយសារភាពរបស់ជនសង្ស័យទាំង០២នាក់ ឆ្លើយសារភាពថា ពួកគេកន្លងមកធ្លាប់ប្រើប្រាស់គ្រឿងពិតប្រាកដមែន ហើយកាំបិតទាំងអស់នេះពួកគេដាក់តាមខ្លួន ដើម្បីការពារក្រែងមានក្រុមផ្សេងទៀត មករករឿងពួកគេ។ ក្រោយពីបានចម្លើយសារភាព និងមានវត្ថុតាងហើយនោះ កម្លាំងជំនាញព្រហ្មទណ្ឌ អ.ហ ក្រុង បានកសាងសំណុំរឿងបញ្ជូនមកបញ្ជាការដ្ឋាន អ.ហ ខេត្តចាត់ការបន្ត។
ជនសង្ស័យទាំង០២នាក់ និងវត្ថុតាង ត្រូវបានកម្លាំងជំនាញការិយាល័យបទល្មើសព្រហ្មទណ្ឌ កងរាជអាវុធហត្ថ ខេត្តបញ្ជូន ទៅសាលាដំបូងខេត្តចាត់ការតាមនីតិវិធីហើយ៕ 
