ព្រៃវែង ៖ នៅព្រឹកថ្ងៃសៅរ៍ ១០រោច ខែពិសាខ ឆ្នាំជូត ទោស័ក ពុទ្ធសករាជ២៥៦៤ ត្រូវនឹងថ្ងៃទី១៦ ខែឧសភា ឆ្នាំ២០២០នេះ នៅទីស្នាក់ការគណបក្សប្រជាជនកម្ពុជា ស្រុកពាមជរ ខេត្តព្រៃវែង បានរៀបចំពិធីប្រកាស តែងតាំងមន្រ្តីគណបក្សស្រុក និងកែសម្រួលបំពេញបន្ថែមសមាសភាពក្រុមការងារគណបក្សចុះមូលដ្ឋានតាមបណ្ដាឃុំ ក្នុងស្រុកពាមជរ ខេត្តព្រៃវែង ក្រោមអធិបតីភាព ឯកឧត្តម ស្បោង សារ៉ាត់ ប្រធានគណៈកម្មាធិការបក្ស ខេត្តព្រៃវែង ឯកឧត្តម យុទ្ធ ភូថង ប្រធានក្រុមការងារគណបក្សប្រជាជនកម្ពុជា ចុះជួយស្រុកពាមជរ រួមនឹងសមាជិកសមាជិកាបក្សស្រុកជាច្រើនរូបទៀត។
ឯកឧត្តម ចាន់ ដេត សមាជិកអចិន្រ្តៃយ៍គណៈកម្មាធិការគណបក្សខេត្ត និងជាអនុប្រធានគណៈចាត់តាំងគណៈកម្មាធិការបក្សខេត្ត បានអានទាំងស្រុងនូវសេចក្តីសម្រេចរបស់គណអចិន្ត្រៃយ៍គណបក្ស ស្តីពីការតែងតាំងមន្រ្តីគណបក្សប្រជាជនកម្ពុជា ស្រុកពាមជរ ខេត្តព្រៃវែង គឺឯកឧត្តម ប៉ែន នួន ត្រូវបានសម្រេចតែងតាំងជាប្រធានក្រុមការងារគណបក្សប្រជាជនកម្ពុជា ឃុំកំពង់ប្រាសាទ។
ឯកឧត្តម ប៉ែន នួន ដែលត្រូវតែងតាំង ជាប្រធានក្រុមការងារគណបក្សប្រជាជនកម្ពុជា ឃុំកំពង់ប្រាសាទ បានសន្យា និងប្តេជ្ញាយ៉ាងមុតមាំថា នឹងប្រឹងប្រែងអនុវត្តតួនាទីឲ្យបានល្អ ដើម្បីបម្រើប្រជាជន ជួយដោះស្រាយបញ្ហានានា ដែលកើតមានឡើងចំពោះប្រជាជនក្នុងមូលដ្ឋាន អោយស្របតាមគោលនយោបាយរបស់គណបក្ស គោលបំណងគឺ កាត់បន្ថយភាពក្រីក្រជូនបងប្អូនប្រជាពលរដ្ឋ អោយមានភាពល្អប្រសើរ ។
ឯកឧត្តម ស្បោង សារ៉ាត់ ប្រធានគណៈកម្មាធិការបក្ស ខេត្តព្រៃវែង មានប្រសាសន៍ថា នេះ គឺជាការសម្រេចរបស់គណអចិន្ត្រៃយ៍គណបក្ស តាមរយ:ការស្នើសុំតែងតាំងរបស់គណអចិន្រ្តៃយ៍គណបក្សខេត្ត។ ការស្នើសុំតែងតាំងរបស់គណអចិន្រ្តៃយ៍គណបក្សខេត្តនេះ លុះត្រាតែមន្រ្តីរូបនេះមានលក្ខណៈសម្បត្តិសមរម្យ មានសមត្ថភាពគ្រប់គ្រាន់ សក្តិសម និងទទួលបានការតែងតាំងនេះ។
ក្រោយពីតែងតាំងឯកឧត្តម ប៉ែន នួន ជាប្រធានក្រុមការងារគណបក្សប្រជាជនកម្ពុជា ឃុំកំពង់ប្រាសាទ រួចមក ឯកឧត្តមប្រធានគណៈកម្មាធិការបក្ស ខេត្តព្រៃវែង មានសេចក្តីសង្ឃឹមយ៉ាងខ្លាំងថា ឯកឧត្តម ប៉ែន នួន នឹងយកអស់កម្លាំងកាយ កម្លាំងចិត្ត និងឆន្ទៈដ៏មុះមុត ដើម្បីបម្រើរសេវាជូនប្រជាជនបានកាន់តែល្អប្រសើរ និងកាត់បន្ថយភាពក្រីក្របានយ៉ាងលឿន ស្របតាមគោលនយោបាយរបស់រាជរដ្ឋាភិបាល និងគណបក្សប្រជាជនកម្ពុជា៕
