ស្វាយរៀង៖កិច្ចប្រជុំបូកសរុបការងារបរិស្ថាន និងការរៀបចំផែនការសកម្មភាព ថវិកាសម្រាប់គ្រប់គ្រងសំរាម សំណល់រឹង ក្រុង ស្រុក
ថ្ងៃអង្គារ ១៣រោច ខែពិសាខ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៩ ខែឧសភា ឆ្នាំ២០២០
ឯកឧត្តម តូច ប៉ូលីវ៉ា អភិបាលរងខេត្តស្វាយរៀង តំណាងឯកឧត្ដម ម៉ែន វិបុល អភិបាលខេត្ត បានអញ្ជើញចូលរួមកិច្ចប្រជុំបូកសរុបការងារបរិស្ថាន និងការរៀបចំផែនការសកម្មភាព ថវិកាសម្រាប់គ្រប់គ្រងសំរាម សំណល់រឹង ក្រុង/ស្រុក ខេត្តស្វាយរៀង ក្រោមអធិបតីភាពលោកជំទាវ ព្រំ សុភី អនុរដ្ឋលេខាធិការក្រសួងបរិស្ថាន នៅសាលប្រជុំមន្ទីរបរិស្ថានខេត្ត។
ដោយមានការអញ្ជើញចូលរួមពី ឯកឧត្តម លោក លោកស្រី ប្រតិភូក្រសួងបរិស្ថាន លោក អភិបាល អភិបាលរង ក្រុង ស្រុក ទាំង៨ លោកប្រធានមន្ទីរបរិស្ថាន លោកប្រធានមន្ទីរសេដ្ឋកិច្ច និងហិរញ្ញវត្ថុ លោកអនុប្រធានមន្ទីរបរិស្ថាន និងមន្ត្រីរាជការក្រោមឱវាទមន្ទីរបរិស្ថានខេត្តស្វាយរៀង ។
នាកិច្ចប្រជុំនេះដែរ ឯកឧត្ដម អភិបាលរង បានផ្តោតសំខាន់នៃប្រភពធំៗ ចំនួន ៣ របស់បញ្ហាប្រឈម គឺ៖
១-កត្តាប្រជាពលរដ្ឋមិនចូលរួមសហការ ដោយមិនបានយល់ដឹងអំពីបញ្ហាទុកដាក់សម្រាម
២-កត្តាក្រុមហ៊ុនដឹកសម្រាមនៅមានកម្រិត ទាំងធនធានសម្ភារ មនុស្ស ការគ្រប់គ្រងដឹកនាំ
៣-កត្តាការដឹកនាំ គ្រប់គ្រង របស់រដ្ឋបាលក្រុង លើការងារគ្រប់គ្រងសំណល់រឹង ។
បន្ទាប់មកឯកឧត្ដមអភិបាលរង បានលើកឡើងបន្ថែមនូវចំនុច មួយចំនួនទៀតរួមមាន៖
-រៀបចំយន្តការគ្រប់គ្រងដឹកនាំ ក្នុងការប្រមូលសំរាម
-កំណត់មុខសញ្ញាជាអាទិភាពក្នុងការប្រមូលសម្រាម
-រៀបចំកាលវិភាគ សម្រាប់ប្រមូលសម្រាម
-រៀបចំផែនការសកម្មភាពប្រចាំឆ្នាំ លើការងារប្រមូលសម្រាម និងតម្លៃសេវាឲ្យបានត្រឹមត្រូវ
-ផ្សព្វផ្សាយអនុក្រឹត្យលេខ១១៣ អោយបានទូលំទូលាយ ដើម្បីងាយស្រួលចាត់វិធានការផាកពិន័យចំពោះជនខិលខូច បោះចោលសម្រាមពាសវាលពាសកាល
-បង្កើតដេប៉ូសម្រាប់ដាក់សម្រាម នៅតាមឃុំ សង្កាត់
-កំណត់តម្លៃសេវា ក្នុងការប្រមូលសម្រាម៕
