ភ្នំពេញ ៖ បុរសម្នាក់ ដែលអះអាងថា ខ្លួនជាមន្រ្តីសមត្ថកិច្ច បានបើករថយន្ត Lexuis មិនប្រយ័ត្ន ជ្រុលទៅបុករថយន្តដឹកទំនិញដែលចតចោលលើចិញ្ចើមផ្លូវ បណ្តាលឱ្យរងការខូចខាតផ្នែកខាងមុខយ៉ាងដំណំ នៅវេលាម៉ោង១០និង៣០នាទីយប់ ថ្ងៃទី២៩ ខែឧសភា ឆ្នាំ២០២០ នៅតាមបណ្តោយផ្លូវបេតុងលេខ៣៨សេ ភូមិទ្រ្ទា២ សង្កាត់ស្ទឹងមានជ័យ១ ខណ្ឌមានជ័យ។
យោងតាមប្រភពពីកន្លែងកើតហេតុ បានឱ្យដឹងថា រថយន្តដែលរងការខូចខាតនោះ ម៉ាក Lexuis RX330 ពណ៌ស ស្លាកលេខ ភ្នំពេញ2AW-0575 នៅក្នុងរថយន្តមានឯកសណ្ឋានកងរាជអាវុធហត្ថស័ក្តិ៣ ដែលមានឈ្មោះ វ៉ាន់ សុភី។ ចំណែកឯរថយន្តដឹកទំនិញ ម៉ាក HYUANDAI ពណ៌ស ស្លាកលេខ 3D-5552 ចតចោលនៅលើចិញ្ចើមផ្លូវ។
តាមការរៀបរាប់ពីបុរសដែលជាអ្នកបើករថយន្ត Lexuis RX330 ខាងលើ បានឱ្យដឹងថា មុនពេលកើតហេតុ គាត់បើករថយន្តក្នុងទិសដៅពីលិចទៅកើត ក្នុងល្បឿនល្មមដែល ពេលមកដល់ចំណុចកើតហេតុ ដោយសារតែផ្លូវមានសភាពងងឹតផង នឹងរាងធ្លាក់ភ្នែកផងមើលមិនទាន់ក៏ជ្រុលទៅបុករថយន្តហុីយ៉ាន់ដាយពីក្រោយពេញទំហឹងតែម្តង បណ្ដាលឱ្យរថយន្តបង្កខូចខាតផ្នែកខាងមុខ តែមិនបណ្តាលឱ្យមានអុនករងរបួសនោះទេ។
ចំណេកឯរថយន្តដឹកទំនិញនោះ រងការខូចខាតផ្នែកខាងក្រោយបន្តិចបន្តួចតែប៉ុណ្ណោះ។
ក្រោយពេលកើតហេតុ សមត្ថកិច្ចមូលដ្ឋានប៉ុស្តិ៍នគរបាលស្ទឹងមាន១ បានចុះទៅដល់កន្លែងកើតហេតុភ្លាមៗ នឹងបានធ្វើការសម្របសម្រួលដោយភាគីខាងរថយន្តដឹកទំនិញ ព្រមជួយថ្លៃខូចខាតទៅឲ្យរថយន្ត Lexuis ចំនួន៣៥០ដុល្លារ ដើម្បីបញ្ចប់រឿងនៅកន្លែងកើតហេតុ៕
