ក្រុងប៉ោយប៉ែ៖នៅព្រឹកថ្ងៃសុក្រ ១៥កើត ខែជេស្ឋ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០៥ ខែមិថុនា ឆ្នាំ២០២០នេះ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានដឹកនាំមន្ត្រីរដ្ឋបាលក្រុង និងមានវត្តមានអញ្ជើញចូលរួមជាកិត្តិយសរបស់លោក សាន ស៊ានហូ ប្រធានក្រុមប្រឹក្សាក្រុងប៉ោយប៉ែត បន្តចែកអំណោយមនុស្សធម៌សង្គ្រោះដ៏ថ្លៃថ្លារបស់ឯកឧត្តម ឧបនាយករដ្ឋមន្ត្រី កែ គឹមយ៉ាន និងលោកជំទាវ ឧកញ៉ា ហេមចិត្តាមហាឧបាសិកាពុទ្ធសាសនូបត្ថម្ភក៍ ម៉ៅ ម៉ាល័យ កែគឹមយ៉ាន និងឯកឧត្តម អ៊ំុ រាត្រី អភិបាល នៃគណៈអភិបាលខេត្តបន្ទាយមានជ័យ និងលោកជំទាវ ដល់កម្មករអូសរទេះ ពលរដ្ឋក្រីក្រ ជនងាយរងគ្រោះ និងជនពិការ ចំនួន ៨០គ្រួសារ ក្នុងស្ថានភាពបង្ការ និងទប់ស្កាត់នៃការរាតត្បាតនៃរលកទីពីរដោយវីរុសកូវីដ-១៩ (COVID-19)។
ថ្លែងទៅកាន់ពិធីចែកអំណោយនេះ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានថ្លែងអំណរគុណយ៉ាងជ្រាលជ្រៅបំផុតចំពោះអំណោយដ៏ថ្លៃថ្លារបស់ឯកឧត្តម ឧបនាយករដ្ឋមន្ត្រី កែ គឹមយ៉ាន និងលោកជំទាវ ឧកញ៉ា ហេមចិត្តាមហាឧបាសិកាពុទ្ធសាសនូបត្ថម្ភក៍ ម៉ៅ ម៉ាល័យ កែគឹមយ៉ាន និងឯកឧត្តម អ៊ំុ រាត្រី អភិបាល នៃគណៈអភិបាលខេត្តបន្ទាយមានជ័យ និងលោកជំទាវ ដែលមានសមានចិត្តសប្បុរសចូលរួមជាមួយនឹងសកម្មភាពមនុស្សធម៌របស់រដ្ឋបាលក្រុងប៉ោយប៉ែត ក្នុងកាលៈទេសៈនៃការរាតត្បាតជាសកលរបស់វីរុសកូវីដ-១៩ បណ្តាលឱ្យបងប្អូនប្រជាពលរដ្ឋមួយចំនួនក្នុងមូលដ្ឋានជួបការខ្វះខាតស្បៀងប្រចាំថ្ងៃយ៉ាងខ្លាំង។ ក្នុងឱកាសនោះ លោកអភិបាលក្រុង បានសង្កត់ធ្ងន់ថា ក្នុងនាមរាជរដ្ឋាភិបាលកម្ពុជា និងរដ្ឋបាលខេត្តបន្ទាយមានជ័យ និងក្នុងនាមរដ្ឋបាលក្រុងប៉ោយប៉ែត ខ្ញុំបាទ (គាត ហ៊ុល) តាំងចិត្តយ៉ាងមុតមាំថា “ដាច់ខាតមិនទុកចោលបងប្អូនប្រជាពលរដ្ឋណាម្នាក់ ដាច់ពោះស្លាប់ដោយសារអត់អាហារនោះឡើយ”។
លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត និងជាសមាជិកគណៈកម្មការប្រយុទ្ឋនឹងជំងឺកូវីដ-១៩ ខេត្តបន្ទាយមានជ័យ បានក្រើនរម្លឹកចំពោះបងប្អូនប្រជាពលរដ្ឋសូមកុំភ្លេចខ្លួនបាត់បង់នូវការប្រុងប្រយ័ត្នក្នុងការការពារខ្លួនពីការចម្លងនៃរលកទីពីរជំងឺកូវីដ-១៩ ដែលកត្តានេះគឺជាហានិភ័យខ្ពស់ក្នុងការបើកផ្លូវសម្រាប់ការរាតត្បាតនៃវីរុសកូវីដ-១៩ នៅក្នុងមូលដ្ឋានក្រុងប៉ោយប៉ែត ខេត្តបន្ទាយមានជ័យ។
លោកអភិបាលក្រុងប៉ោយប៉ែត បានសង្កត់ធ្ងន់ថា ក្នុងកាលៈទេសៈនេះគឺជាដំណាក់កាលផុយស្រួយបំផុត ដែលយើងទាំងអស់គ្នាចាំបាច់ត្រូវតែមានការប្រុងប្រយ័ត្នខ្ពស់ជាប់ជាប្រចាំ និងមិនត្រូវភ្លេចទេថា វីរុសកូវីដ-១៩ នៅតែមានចរាចរ និងអាចចម្លងពីមនុស្សម្នាក់ទៅមនុស្សម្នាក់ទៀតបានដោយងាយស្រួល និងលឿនជាទីបំផុតដោយមិនដឹងខ្លួនតាមផ្លូវធ្វើដំណើរ ទីដែលមានមនុស្សជួបជុំច្រើន ក្នុងផ្សារ និងការចល័តរបស់មនុស្ស ប្រសិនបើបុគ្គលម្នាក់ៗ មិនបានប្រុងប្រយ័ត្នការពារខ្លួនឱ្យបានខ្ជាប់ខ្ជួនទៅតាមការណែនាំរបស់ក្រសួងសុខាភិបាល និងបទបញ្ជារបស់រាជរដ្ឋាភិបាលកម្ពុជា។
លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានអំពាវនាវសូមឱ្យបងប្អូនប្រជាពលរដ្ឋមេត្តាបន្តប្រុងប្រយ័ត្នរលកទីពីរនៃការរាត្បាតជំងឺឆ្លងកូវីដ-១៩ កុំឱ្យមានវិប្បដិសារីកើតឡើងព្រោះតែការធ្វេសប្រហែសមើលស្រាលចំពោះស្ថានការណ៍បច្ចុប្បន្ន។ បើទោះបីជា ចំនួនអ្នកឆ្លងក្នុងប្រទេសយើងមានតិចមែន តែយើងត្រូវបង្កើនការយកចិត្តទុកដាក់ខ្ពស់នឹងត្រៀមទប់ស្កាត់គ្រប់ពេល ជាពិសេសនៅក្នុងរលកទីពីរនៃការងើបឡើងវិញនៃជំងឺឆ្លងរលាកផ្លូវដង្ហើមបង្កឡើងដោយវីរុសកូវីដ-១៩ ដ៏កាចសាហាវបំផុតនាពេលបច្ចុប្បន្ននេះ៕លោកចាន់ ពុធ
