កំពង់ចាម៖ គម្រោងមូលនិធិឃុំ-សង្កាត់ ឆ្នាំ២០២០ របស់គណៈកម្មការជាតិសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ ក្នុងការជួសជុល និងសាងសង់ផ្លូវនៅតាមមូលដ្ឋាន ត្រូវបានដាក់ឲ្យដំណើរការដេញថ្លៃ ចំនួន១០គម្រោង ស្មើនឹង៨ឃុំ ដែលបានធ្វេីឡើងព្រឹកថ្ងៃទី៨ ខែមិថុនា ឆ្នាំ២០២០ នៅសាលាស្រុកព្រៃឈរ ក្រោមវត្តមាន លោកឡោ ចាន់លី អភិបាលស្រុក និងលោកអុំ ប៉ុណ្ណាកា នាយករងទីចាត់ការផែនការនិងវិនិយោគខេត្តកំពង់ចាម ដោយមានការចូលរួមពី អភិបាលរងស្រុក គណៈកម្មការម្ចាស់លទ្ធកម្ម និងតំណាងក្រុមហ៊ុន អ្នកទទួលការ ជាច្រើនរូបផងដែរ។
ឆ្លៀតក្នុងឱកាសនោះដែរ លោក ឡោ ចាន់លី អភិបាលស្រុកព្រៃឈរ បានធ្វើការណែនាំជំរុញដល់គណៈកម្មការលទ្ធកម្ម និងក្រុមហ៊ុន អ្នកទទួលការទាំងអស់ ត្រូវអនុវត្តគម្រោងឲ្យមានតម្លាភាព និងធ្វើការសាងសង់ឲ្យត្រូវតាមបទដ្ឋានលក្ខណៈបច្ចេកទេស ប្រយោជន៍ដល់ការប្រើប្រាស់បានយូរអង្វែងផងដែរ។
គួរបញ្ជាក់ផងដែរថា គម្រោងដែលបានដាក់ឲ្យដេញថ្លៃខាងលើនេះ គឺមានផ្លូវចំនួន១០ខ្សែ ដែលត្រូវស្ថាបនា ជូនប្រជាពលរដ្ឋសម្រាប់ប្រើប្រាស់ ក្នុងនោះមាន
១-នៅឃុំល្វា មាន២គម្រោង គឺសាងសង់ផ្លូវបេតុងអាមេ ប្រវែងជាង២០០ម៉ែត្រ នៅភូមិតាំងគោក និងជួសជុលផ្លូវក្រាលក្រួសក្រហម ប្រវែងជាង១០០០ម៉ែត្រ នៅភូមិស្តុកអន្ទង់-ភូមិល្វា។
២-នៅឃុំជ្រៃវៀន មាន២គម្រោង សាងសង់ផ្លូវបេតុងអាមេ ប្រវែងជាង៤០០ម៉ែត្រ នៅភូមិត្រពាំងទូក និងជួសជុលផ្លូវក្រាលកំទេចថ្ម ប្រវែងជាង៨០០ម៉ែត្រ នៅភូមិខ្វិតតូច-ភូមិក្លែងពណ៌។
៣-ឃុំខ្វិតធំ មាន១គម្រោង សាងសង់ផ្លូវបេតុងអាមប្រវែងជាង៣០០ម៉ែត្រ នៅភូមិតាង៉ាល។
៤-ឃុំត្រពាំងព្រះ មាន១គម្រោង សាងសង់ផ្លូវបេតុងអាមេ ប្រវែងជាង៦០០ម៉ែត្រ នៅភូមិគូរ។
៥-ឃុំព្រៃឈរ មាន១គម្រោង សាងសង់ផ្លូវបេតុងអាមេ ប្រវែងជាង២០០ម៉ែត្រ នៅភូមិសេកយំ។
៦-ឃុំសំរោង មាន១គម្រោង សាងសង់ផ្លូវបេតុងអាមេ ប្រវែងជាង៣០០ម៉ែត្រ នៅ ភូមិសូដី។
៧-ឃុំបារាយណ៍ មាន១គម្រោង សាងសង់ផ្លូវបេតុងអាមេ ប្រវែងជាង៤០០ម៉ែត្រ នៅភូមិលាងខ្សាច់។
និង៨-ឃុំតុងរ៉ុង មាន១គម្រោង សាងសង់ផ្លូវបេតុងអាមេ ប្រវែងជិត៤០០ម៉ែត្រ នៅភូមិផ្ទះខ្ពស់។
ជាមួយគ្នានោះ ប្រធានគណៈកម្មាការម្ចាស់លទ្ធកម្មឃុំទាំង៨ឃុំ បានធ្វើការប្រកាសទទួលយកទាំង១០គម្រោង ព្រមទាំងបានធ្វើការផ្តាំផ្ញើរដល់ក្រុមហ៊ុនអ្នកទទួលការទាំងអស់ ត្រូវអនុវត្តន៍ការងារសាងសង់ផ្លូវ ឲ្យមានគុណភាពល្អ និងត្រូវតាមស្តង់ដារ លក្ខណៈបច្ចេកទេស ប្រយោជន៍ដល់ការប្រើប្រាស់ របស់ប្រជាពលរដ្ឋ ដែលកំពុងតែទន្ទឹងរង់ចាំ ផងដែរ ៕
