បន្ទាយមានជ័យ៖នៅព្រឹកថ្ងៃពុធ ៥រោច ខែជេស្ឋ ឆ្នាំជូត ទោស័ក ព.ស.២៥៦៤ ត្រូវនឹង ថ្ងៃទី១០ ខែមិថុនា ឆ្នាំ២០២០នេះ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត ដឹកនាំមន្ត្រីរដ្ឋបាលក្រុង កងកម្លាំងប្រដាប់អាវុធ និងអាជ្ញាធរសង្កាត់ប៉ោយប៉ែត អង្គភាពភូមិ កម្លាំងប្រជាការពារភូមិចុះផ្សព្វផ្សាយអប់រំ និងទប់ស្កាត់ការចរាចរជាបណ្តោះអាសន្ន និងស្នើសុំដល់បងប្អូនអាជីវករបញ្ឈប់ការលក់ប្រភេទស្រាថ្នាំចិនសែ “តាំងគួយ” និងប្រភេទស្រាស្រដៀងគ្នា ដល់អតិថិជនរបស់ខ្លួនជាបណ្តោះអាសន្នសិន មូលហេតុដោយស្រាប្រភេទនេះជាដើមចមនៃការបំពុលស្លាប់មនុស្ស ២នាក់ ក្នុងស្រុកមង្គលបូរី និងចំនួន ៣នាក់ផ្សេងទៀតបានស្លាប់នៅក្នុងស្រុកម៉ាឡៃ ខេត្តបន្ទាយមានជ័យ។
សកម្មភាពចុះអប់រំផ្សព្វផ្សាយ និងហាមឃាត់ទីតាំងលក់ស្រាយីហោ តាំង គួយ (ស្រាចិនសែ) ជាបណ្តោះអាសន្ននេះ បានធ្វើឡើងនៅក្នុងផ្សារត្រី និងផ្សារថ្មី ប៉ោយប៉ែត និងតាមដេប៉ូលក់ស្រាជុំវិញផ្សារ ស្ថិតក្នុងសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
ក្នុងឱកាសនោះ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត និងមន្ត្រីរដ្ឋបាលក្រុង រួមនឹងអាជ្ញាធរសង្កាត់ប៉ោយប៉ែត បានអំពាវនាវដល់បងប្អូនអាជីវករបញ្ឈប់ការលក់យីហោស្រាប្រភេទខាងលើជាបណ្តោះអាសន្ន និងសូមឱ្យបងប្អូនប្រជាពលរដ្ឋដែលធ្លាប់ទទួលទានស្រាប្រភេទនេះត្រូវបញ្ឈប់ជាបន្ទាន់ ព្រោះអាចបង្កគ្រោះថ្នាក់ដល់អាយុជីវិតខ្លួន និងក្រុមគ្រួសារ ដោយរង់ចាំក្រសួង និងស្ថាប័នជំនាញធ្វើការពិសោធន៍ឱ្យបានត្រឹមត្រូវជាមុនសិន មុននឹងលក់ ឬទិញយកទៅពិសា។
សូមជម្រាបថា ករណីពុលស្រាថ្នាំចិនសែ “តាំងគួយ” បានបណ្តាលឱ្យបុរសចំនួន ២នាក់បានបាត់បង់ជីវិត (រស់នៅក្នុងឃុំចំណោម ១នាក់ និងឃុំបន្ទាយនាង ១នាក់) និង ៥នាក់ផ្សេងទៀតកំពុងសង្គ្រោះនៅមន្ទីរពេទ្យមិត្តភាពខ្មែរ-ជប៉ុន ស្រុកមង្គលបូរី (រស់នៅក្នុងឃុំចំណោម ៣នាក់ និងឃុំបន្ទាយនាង ២នាក់)។
ហេតុការដ៏អាក្រក់នេះបានកើតឡើងកាលពីល្ងាចថ្ងៃទី០៩ ខែមិថុនា ឆ្នាំ២០២០ ស្ថិតនៅក្នុងឃុំចំណោម និងឃុំបន្ទាយនាង ស្រុកមង្គលបូរី ខេត្តបន្ទាយមានជ័យ។
ជាមួយគ្នានេះ ប្រជាពលរដ្ឋ ចំនួន ៣នាក់ បានស្លាប់ និងចំនួន ១១នាក់ផ្សេងទៀត កំពុងសង្គ្រោះដោយសារពុលស្រាថ្នាំចិនសែខាងលើ។ ហេតុការណ៍នេះ បានកើតឡើងនៅថ្ងៃទី០៩ ខែមិថុនា ឆ្នាំ២០២០ នៅក្នុងស្រុកម៉ាឡៃ ខេត្តបន្ទាយមានជ័យ។
ព័ត៌មានបឋមពីសមត្ថកិច្ច បានឱ្យដឹងថា បច្ចុប្បន្ននេះអ្នកពុលស្រាថ្នាំ ១១នាក់ កំពុងសម្រាកព្យាបាលនៅមន្ទីរពេទ្យបង្អែកស្រុកម៉ាឡៃ ខេត្តបន្ទាយមានជ័យ៕លោក ចាន់ ពុធ
