ស្វាយរៀង៖ព្រឹកថ្ងៃចន្ទ៩កើត ខែអាសាឍ ឆ្នាំជូត ទោស័កព.ស២៥៦៤ ត្រូវនិងថ្ងៃទី២៩ ខែមិថុនា ឆ្នាំ២០២០ ឯកឧត្តម យិត ស៊ុន ណារ៉ា ប្រធានកិត្តិយសក្រុមការងារថ្នាក់កណ្តាលចុះជួយឃុំមេសរថ្ងក ឯកឧត្តម តែម ម៉ឺន ប្រធានក្រុមការងារថ្នាក់កណ្តាលចុះជួយឃុំមេសរថ្ងក និងលោក ថន ថាវុទ្ធា អភិបាលនៃគណៈអភិបាលស្រុកចន្ទ្រា បានអញ្ជើញដឹកនាំក្រុមការងារចុះជួយឃុំមេសរថ្ងកមកប្រគេនទៀនព្រះវស្សា និងទេយ្យវត្ថុដល់ព្រះសង្ឃ ដែលគង់ចាំព្រះវស្សា៣វត្ត គឺ វត្តចំបក់ធំ វត្តមេសរថ្ងក និងវត្តបារាយណ៍ ក្នុងឃុំមេសរថ្ងក។
ពិធីនេះត្រូវបានប្រារព្ធធ្វេីឡេីងនៅវត្ត ចំបក់ធំ ស្ថិតនៅភូមិដីក្រហម ឃុំមេសរថ្ងកស្រុកចន្ទ្រាខេត្តស្វាយរៀង។
មានប្រសាសន៍នៅក្នុងពិធីប្រគេនទៀនព្រះវស្សានិងទេយ្យវត្ថុដល់ព្រះសង្ឃនាពេលនោះ ឯកឧត្តម
យិត ស៊ុន ណារ៉ា ក៏បានពាំនាំការផ្តាំផ្ញើសួរសុខទុក្ខដោយក្តីនឹករលឹក ពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជានិង សម្តេចកិត្តិព្រឹទ្ធបណ្ឌិត ជាពិសេស ឯកឧត្តមនាយឧត្តមសេនីយ៍ ម៉ឹង សំផន ប្រធានក្រុមការងារថ្នាក់កណ្តាលចុះជួយស្រុកចន្ទ្រាជូនលោកយាយលោកតាពុទ្ធបរិសទ្ធ័ បងប្អូន ប្រជាពលរដ្ឋទាំងអស់ក្នុងឃុំមេសរថ្ងក ដោយសម្តេចទាំងទ្វេរ និងឯកឧត្តម មឹុង សំផន តែងតែគិតគូរជានិច្ចអំពីសុខទុក្ខ និងចំពោះជីវភាពប្រចាំថ្ងៃរបស់ ប្រជាពលរដ្ឋ។
ឯកឧត្តម យិត ស៊ុនណារ៉ា បានលេីកឡេីងថា បុណ្យចូលព្រះវស្សាគឺចាប់ផ្តើមពីថ្ងៃ១រោច ខែអាសាឍ ដល់ ថ្ងៃ១៥កើត ខែអស្សុជ មានរយៈពេល៣ខែ ដែលពុទ្ធបរិស័ទ្ធ បងប្អូនពលរដ្ឋខ្មែរយើង គោរព ប្រតិបត្តិជារៀងរហូតមក ។
ឯកឧត្តម យិន ស៊ុនណារ៉ា បានសង្កត់ធ្ងន់ថា ការប្រារព្ធធ្វើពិធីនេះបាន ដោយសារប្រទេសជាតិមានសុខសន្តិភាព ជាពិសេសបង្ហាញពីទឹកចិត្ត របស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត គោរពស្រឡាញ់ប្រតិបត្តិ ព្រះពុទ្ធសាសនា ដែលជាសាសនារបស់រដ្ឋ ដើម្បីថែរក្សាការពារវិស័យព្រះពុទ្ធសាសនា ឱ្យកាន់តែមានភាពរុងរឿងនិងរីកចំរើន។
ឆ្លៀតក្នុងឱកាសនោះដែរ ឯកឧត្តម យិន ស៊ុន ណារ៉ា ក៏បានសំណុំពរឱ្យប្រជាពលរដ្ឋគ្រប់រូប ត្រូវបន្តរក្សាការប្រុងប្រយ័ត្នខ្ពស់ក្នុងការបង្ការ និងការពារនូវការ ឆ្លងរីករាលដាលនៃជំងឺកូវីដ១៩ នៃរលកទី២ ដោយគោរព និងអនុវត្តឱ្យ បានខ្ជាប់ខ្ជួន នូវគោលការណ៍ រក្សាគម្លាតសង្គម និងវិធានការនានា តាមការនែនាំរបស់ក្រសួងសុខាភិបាល និងសូមឱ្យប្រជាពលរដ្ឋ ទាំងអស់គ្នា ត្រូវបង្កើនការផលិតផ្នែកកសិកម្ម តាមរយៈការដាំដុះ ការ ចិញ្ចឹមសត្វ ជាដើម ចំណែកឯអាជ្ញាធរត្រូវតែពង្រឹងឱ្យមានប្រសិទ្ធិភាព ។
សូមបញ្ជាក់ថា ទៀនព្រះវស្សានិងទេយ្យវត្ថុ របរបស់ឯកឧត្តម យិន ស៊ុនណារ៉ា និងឯកឧត្តម តែម មឺុន ព្រមទាំងក្រុមការងារដែលប្រគេនដល់ព្រះសង្ឃដែលគង់ចាំព្រះវស្សា ចំនួន០៣វត្ត ក្នុងឃុំមេសរថ្ងកស្រុកចន្រ្ទា ខេត្តស្វាយរៀង ក្នុង១វត្តទទួលបានទៀនព្រះវស្សាចំនួន២ដើមគូរ ប្រេងកាតចំនួន១៣០លីត្រ អង្ករចំនួន២០០គីឡូ មីចំនួន៥កេះ ត្រីខចំនួន០១កេះ ទឹកសុីអុីវចំនួន០៥យូ ទឹកត្រីចំនួន០៥យូ ទឹកបរិសុទ្ធចំនួន០៥កេះ ទឹកក្រូចចំនួន០៥កេះ ទឹកដោះគោចំនួន០១កេះ ស្កសរចំនួន០៥គីឡូក្រាម តែចំនួន០៤គីឡូក្រាមស្លាដកប្រគេនព្រះសង្ឃទាំង៣វត្ត៣៥ស្លាដកថវិកា៣០០០០រៀល ។
ឯកឧត្តម យិន ស៊ុនណារ៉ា ប្រធានកិត្តិយសក្រុមការងារថ្នាក់កណ្តាចុះជួយឃុំមេសរថ្ងក និងឯកឧត្តម តែ ម៉ឺន ប្រធានក្រុមការងារថ្នាក់កណ្តាលចុះជួយឃុំ មេសរថ្ងក បានចូលបច្ច័យកសាងវត្ត ទាំង៣វត្ត ក្នុង១វត្ត ២០០,០០០រៀលព្រមទាំងចែកជូនថវិកាដល់យាយជី តាជីចំនួន៣២នាក់ក្នុង១នាក់២០០០០រៀល កងកម្លាំងប្រជាការពារឃុំ២១នាក់ ក្នុង១នាក់១០០០០រៀលដែលបានចូលក្នុងកម្មវិធីនេះផងដែរ និងឧបត្ថម្ភសាលាឃុំ ៦,០០០,០០០រៀលសម្រាប់កសាងនិងដាក់លូមុខសាលាឃុំ៕
