ស្វាយរៀង៖រសៀលថ្ងៃអង្គារ៍ ៩រោច ខែអាសាឍ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី ១៤ខែ កក្កដា ឆ្នាំ ២០២០ លោកស្រី សំ ថាវី អភិបាលរងស្រុក និងជាអនុប្រធានអនុសាខាកាកបាទក្រហមកម្ពុជាស្រុក បានដឹកនាំក្រុមការងារអនុសាខាកាកបាទក្រហមកម្ពុជាស្រុកចន្ទ្រា នាំយកសម្ភារៈនិងថវិកាចូលរួមរំលែកទុក្ខគ្រួសារសពចំនួន២គ្រួសារ នៅឃុំឃុំព្រៃគគីរ និងឃុំសំរោង ស្រុកចន្ទ្រា ។
១.សពលោកយាយ យក់ មិន អាយុ៨៤ឆ្នាំនៅភូមិចេកឃុំសំរោង ចាស់ជរាក្រីក្រ។
២.សពលោក គឹម លន់កុសល អាយុ២០ឆ្នាំ នៅភូមិត្រពាំងបុណ្យឃុំព្រៃគគីរស្រុកចន្ទ្រា ស្លាប់ដោយសារចងកអត្តឃាតខ្លួនឯង។
មានប្រសាសន៍នាឱកាសនោះ លោកស្រី សំ ថាវី អភិបាលរងស្រុក បានពាំនាំនូវការផ្ដាំផ្ញើសួរសុខទុក្ខពីសំណាក់លោក ថន ថាវុទ្ធា អភិបាលស្រុក និងជាប្រធានអនុសាខាកាកបាទក្រហមកម្ពុជាស្រុក ដែលជានិច្ចកាលលោកអភិបាលស្រុកតែងតែយកចិត្តទុកដាក់គិតគូរខ្ពស់បំផុត ចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ។
ជាពិសេសក្នុងពេលដែលពិភពលោកកំពុងព្រួយបារម្ភ និងប្រយុទ្ធប្រឆាំងនឹងជំងឺកូវីដ-១៩ សម្ដេចបានយកចិត្តទុក្ខដាក់ខ្ពស់បំផុតចំពោះបងប្អូនប្រជាពលរដ្ឋរងគ្រោះ និងងាយរងគ្រោះនៅមូលដ្ឋាន ព្រោះឥទ្ធិលជំងឺកូវីដ-១៩ បានបណ្ដាលឲ្យប៉ះពាល់ដល់សេដ្ឋកិច្ច និងជីវភាពរបស់បងប្អូនក្នុងការប្រកបរបរទទួលទានប្រចាំថ្ងៃ ។
លោកស្រីអភិបាលរងស្រុកក៏បានក្រើនរម្លឹកដល់ប្រជាពលរដ្ឋទាំងអស់ មិនត្រូវធ្វេសប្រហែសអំពីជំងឺកូវីដ ១៩ ដែលជាបញ្ហាប្រឈមរួមទូទាំងសកលលោកនាពេលនេះឡើយទោះបីចំនួនអ្នកឆ្លងនៅក្នុងប្រទេសយើងមានតិចក្តី តែយើងត្រូវបង្កើនការយកចិត្តទុកដាក់ខ្ពស់ និងត្រៀមទប់ស្កាត់គ្រប់ពេលវេលា ដោយត្រូវធ្វើអនាម័យឱ្យបានជាប្រចាំ ដើមី្បការពារអាយុជីវិតសម្រាប់ខ្លួនឯងផ្ទាល់ និង ក្រុមគ្រួសារកុំឱ្យមានឆ្លងមេរោគកូវីដ ១៩ សំខាន់ក្នុងការចូលរួមប្រយុទ្ធប្រឆាំងទប់ស្កាត់ជាមួយរាជរដ្ឋាភិបាលយើង ។
លោកស្រីអភិបាលរងស្រុកបានសូមសំណូមពរដល់បងប្អូនប្រជាពលរដ្ឋទាំងអស់ជាពិសេសគ្រួសារសពទាំងពីរ ត្រូវតែអនុវត្តឱ្យបានជាប្រចាំនូវសេចក្តីណែនាំរបស់ក្រសួងសុខាភិបាលគឺ ត្រូវដុសលាងសម្អាតដៃជាប្រចាំដោយទឹកសាប៊ូ អាល់កុល ឬជែល និងពាក់ម៉ាស់ឱ្យបានត្រឹមត្រូវ និង ត្រូវខ្ទប់មាត់ជាមួយក្រម៉ា ឬម៉ាស នៅពេលក្អក ឬកណ្តាស នៅក្នុងចំណោមក្រុមមនុស្សច្រើន ឬទីប្រជុំជននានាជាដើម ។
ម្យ៉ាងវិញទៀត ចូលរួមគោរពច្បាប់ចរាចរណ៍ផ្លូវគោកឱ្យបានខ្ជាប់ខ្ជួនបំផុត ដើម្បីការពារអាយុជីវិតខ្លួនឯង និងក្រុមគ្រួសារ សូមធ្វើការអប់រំកូនចៅឲ្យជៀសឆ្ងាយពីគ្រឿងញៀន និងខិតខំប្រកបមុខធ្វើស្រែចំការដាំដំណាំផ្សេងៗ។
សម្ភារៈត្រូវចូលរួមបុណ្យសពរួមមានក្នុង ១ គ្រួសារសពទទួលបាន អង្ករ ៥០គ.ក្រ មី ១ កេស ត្រីខ ១០ កំប៉ុង ទឹកត្រី ១ ទឹកស៊ីអ៊ីវ ១យូរ ថវិកា ៥០,០០០ រៀល។
ដោយឡែកក្រុមគ្រួសារសពលោក គឹម លន់កុសល ធ្វើអត្តឃាតចងកសម្លាប់ខ្លួនឯង លោក ថន ថាវុទ្ធា អភិបាលស្រុកចន្ទ្រា ឧបត្ថម្ភថវិកា៥០,០០០រៀល លោក ធឿន រដ្ឋាសមាជិកក្រុមការងារចុះជួយឃុំព្រៃគគីរ២០,០០០រៀល និងលោក អ៊ុំ ប៊ុនធឿន ក្រុមការងារចុះជួយឃុំព្រៃគគីរ ២០,០០០ រៀលសរុបថវិកាចំនួន១៩០,០០០រៀល៕
