(ភ្នំពេញ)៖ ទីបំផុត! លោកឧកញ៉ា ហូរ ចំរើនដែលគេស្គាល់ថាជា ជនជាប់ចោទ លំដាប់ VIP និងមានសំណុំរឿងគេប្ដឹងជាច្រើននៅសាលាដំបូងរាជធានីភ្នំពេញនោះ ត្រូវសភាស៊ើបសួរ នៃសាលាឧទ្ធរណ៍ បដិសេធបណ្ដឹងសុំនៅក្រៅឃុំ។
ការសម្រេចមិនអនុញ្ញាតឲ្យលោកឧកញ៉ា VIP ហូរ ចំរើន នៅក្រៅឃុំជាបណ្ដោះអាសន្ន បានធ្វើឡើងនៅក្នុងព្រឹកថ្ងៃទី១៥ ខែកក្កដា ឆ្នាំ២០២០ នេះ ដោយមានលោក លាង សំណាត់ ជាប្រធានក្រុមប្រឹក្សាជំនុំជម្រះ និងមានលោក ង៉ែត សារ៉ាត់ ជាតំណាងមហាអយ្យការ។
សូមជម្រាបជូនថា ជនជាប់ចោទជា ឧកញ៉ា លំដាប់ VIP ហូរ ចំរើន តែងតែត្រូវមន្ត្រីពន្ធនាគារនាំខ្លួនទៅតុលាការដោយប្រើរថយន្ដទំនើបផ្ទាល់ខ្លួន ក្នុងសម្លៀកបំពាក់ ដាក់អាវក្នុងខោ (ទ្រនុយ) ដោយមានអាវធំពាក់ពីខាងលើ ស្បែកជើងប៊ូរលើបរលោង យ៉ាងសង្ហា និងមានរថយន្ដកងអង្គរក្សប្រដាប់អាវុធគ្រប់ដៃ ហែរហមអមដំណើរ ដើម្បីរក្សាសន្ដិសុខជូនលោកឧកញ៉ា។
មន្ត្រីពន្ធនាគារព្រៃស បានបង្ហើបថា ជនជាប់ចោទឧកញ៉ា VIP ហូរ ចំរើន បានសុំប្តូរពីគុកព្រៃស ទៅដេកនៅគុក PJ វិញ ប៉ុន្ដែជាក់ស្ដែងជនជាប់ចោទបច្ចុប្បន្ន កំពុងតែដេកយ៉ាងរំភើយក្រោមហេតុផលមានជំងឺ នៅក្នុងបន្ទប់លំដាប់ VIP នៅមន្ទីរពេទ្យខ្មែរ-សូវៀត (ពេទ្យរុស្ស៊ី) ដោយមានកងអង្គរក្សជាច្រើននាក់បំពាក់ដោយអាវុធចាំយាមកាមយ៉ាងម៉ឺងម៉ាត់។ ចំណែកមន្ត្រីពន្ធនាគារ គ្រាន់តែអង្គុយយាម និងមើលគេចេញចូលជូបលោកឧកញ៉ា ហូរ ចំរើន ដោយចំហរមាត់តែប៉ុណ្ណោះ។
ចំពោះករណី ប្រើប្រាស់រថយន្ដផ្ទាល់ខ្លួន និងកងអង្គរក្សការពារ របស់លោក ឧកញ៉ា ហូរ ចំរើន នេះ អ្នកសារព័ត៌មាន ព្យាយាម សុំការបញ្ជាក់ពីលោក នុត សវនា អ្នកនាំពាក្យអគ្គនាយកដ្ឋានពន្ធនាគារ ដែរតែទូរស័ព្ទរបស់លោកហៅចូល មិនមានអ្នកទទួល។
ប្រភពដដែល ធ្លាប់ខ្សឹបទៀតថា កាលពីអំឡុងជាប់ឃុំនៅក្នុងគុកព្រៃស ជារើយៗ ជនជាប់ចោទ ឧកញ៉ា VIP ហូរ ចំរើន តែងប្រើលុយខ្ទង់ ១០០០ដុល្លារដើម្បីជាថ្នូរនឹងការចេញលំហែនៅក្រៅពន្ធនាគារ និងសម្រាកនៅខាងក្រៅ។
សូមជម្រាបថា លោកឧកញ៉ា ហូរ ចំរើន កំពុងជាប់បណ្តឹងឆបោកប្រាក់ ចំនួន ៣ករណី ក្នុងទំហំទឹកប្រាក់ប្រមាណជា ២០០លានដុល្លារ ដែលពាក់ព័ន្ធ គម្រោងវិនិយោគ កសាង មន្ទីរពេទ្យ សាលារៀន នៅក្នុងក្រុងតាខ្មៅ ខេត្តកណ្ដាល របស់ ក្រុមហ៊ុន ចិន ដែលមាន បុរសជនជាតិចិន ឈ្មោះ ហាន់ គឿក ជាដើមបណ្ដឹង។
គួរបញ្ជាក់ថា ឧកញ៉ា ហូរ ចំរើន ធ្លាប់ត្រូវបាន តុលាការ ផ្តន្ទាទោស ដាក់គុក ១៨ខែ ព្រោះរឿង បាញ់គំរាមសម្លាប់ប្រពន្ធ។
គួររម្លឹកថា ឧកញ៉ា ផ្កាយ៣ យោធា ហូរ ចំរើន ត្រូវបាននគរបាល ការិយាល័យព្រហ្មទណ្ឌកម្រិតស្រាល នៃនាយកដ្ឋានព្រហ្មទណ្ឌ ក្រសួងមហាផ្ទៃ ឃាត់ខ្លួនកាលពីរសៀលថ្ងៃទី១៥ ខែឧសភា ឆ្នាំ២០១៨កន្លងទៅ ពាក់ព័ន្ធ ករណី បាញ់បោះ ជិត ១០គ្រាប់ គំរាម លោកផ្កាយ២ យិន គា ដែលជាប៉ាៗក្មេក ផ្អើលសមត្ថកិច្ចមូលដ្ឋាន កាលពីថ្ងៃទី២១ ខែមេសា ឆ្នាំ២០១៨ កន្លងទៅនៅចំណុច ផ្ទះវីឡាមួយកន្លែង ស្ថិតនៅភូមិព្រៃស សង្កាត់ព្រៃស ខណ្ឌដង្កោ រាជធានីភ្នំពេញ៕
