កំពង់ចាម៖ប្រជាពលរដ្ឋដែលរស់នៅតំបន់ប្រសាទនគរបាជ័យ បានបញ្ចេញស្នាមញញឹមសប្បាយរីករាយប្រកបដោយភាពស្និទ្ធស្នាល ខណៈដែលឯកឧត្តម អ៊ុន ចាន់ដាអភិបាលខេត្តកំពង់ចាម រួមដំណើរជាមួយអភិបាលរងខេត្ត ថ្នាក់ដឹកនាំមន្ទីរ អង្គភាព ពាក់ព័ន្ធ និងអាជ្ញាធរមូលដ្ឋាន នាព្រឹកថ្ងៃទី១៧ ខែកក្កដា ឆ្នាំ២០២០នេះ បានអញ្ជើញចុះពិនិត្យសមិទ្ធផលថ្មីស្រឡាងមួយកន្លែង គឺការស្ថាបនាផ្លូវបេតុង ១ខ្សែ ដែលមានប្រវែង ១.៧១០ម៉ែត្រ និងទទឹង ៦ម៉ែត្រ ព័ទ្ធជុំវិញប្រាសាទនគរបាជ័យ ស្ថិតនៅក្នុងឃុំអំពិល ស្រុកកំពង់សៀម ខេត្តកំពង់ចាម ដេីម្បីត្រៀមរៀបចំដាំកូនឈេីប្រមាណជា៤០០ដេីម នៅអមសងខាងផ្លូវនោះផងដែរ ។
មន្ត្រីសាលាខេត្តបានឲ្យដឹងថា គម្រោងសាងសង់ផ្លូវបេតុង ១ខ្សែនេះ គឺប្រើប្រាស់កញ្ចប់ថវិកា របស់រដ្ឋបាលខេត្តឆ្នាំ២០២០ ដើម្បីឆ្លើយតបទៅនឹងសេក្ដីត្រូវការរបស់ប្រជាពលរដ្ឋ នៅក្នុងមូលដ្ឋាន សម្រាប់ធ្វើដំណើរឆ្លងកាត់ និងការដឹកកសិផលផ្សេងៗ ទៅកាន់ទីផ្សារ ។ ម្យ៉ាងទៀត ផ្លូវនេះ ក៏ជាខ្សែក្រវ៉ាត់ព័ទ្ធជុំវិញប្រាសាទបុរាណ របស់ខេត្តកំពង់ចាម ក្នុងការជួយសម្រួល ដល់ភ្ញៀវទេសចរណ៍ជាតិ និងអន្តរជាតិ ធ្វើដំណើរមកទស្សនាកំសាន្ត នៅរមណីដ្ឋានប្រវត្តិសាស្ត្រនេះ ដោយបច្ចុប្បន្ន ក្រុមហ៊ុនទទួលការបានសាងសង់គម្រោងនេះសម្រេចប្រមាណជា៩៩%ហើយ គឺនៅចាក់ដីបំពេញប្រអប់សងខាងផ្លូវតែប៉ុណ្ណោះ ។ ជាមួយគ្នានោះ ឯកឧត្ដមអភិបាលខេត្ត ក៏បានណែនាំដល់មន្ទីរកសិកម្ម រុក្ខាប្រមាញ់ និងនេសាទខេត្ត ឲ្យត្រៀមរៀបចំកូនក្ងោកប្រមាណជា៤០០ដេីម សម្រាប់ដាំនៅអមសងខាងផ្លូវនោះផងដែរ។
គួរបញ្ជាក់ផងដែរថា ក្នុងដំណើរអញ្ជើញចុះពិនិត្យផ្លូវមួយខ្សែខាងលេីនេះដែរ ឯកឧត្ដម អ៊ុន ចាន់ដា អភិបាលខេត្តកំពង់ចាម រួមនឹងប្រតិភូអមដំណើរ ក៏បានឆ្លៀតឱកាសជួបសំណេះសំណាលជាមួយបងប្អូនប្រជាពលរដ្ឋ ក៏ដូចជាអាជីវករលក់ដូរនៅផ្សារក្បែរនោះ ប្រកបដោយភាពស្និទ្ធស្នាល និងស្នាមញញឹមសប្បាយរីករាយ ព្រមទាំងជួយទិញនូវបន្លែត្រីសាច់មួយចំនួនផងដែរ ៕
