ក្រុងប៉ោយប៉ែត ៖ នៅព្រឹក ថ្ងៃអង្គារ ១ កើត ខែស្រាពណ៍ ឆ្នាំជូតទោស័ក ពុទ្ធសករាជ ២៥៦៤ត្រូវនឹងថ្ងៃទី២១ ខែកក្កដា ឆ្នាំ២០២០ នេះ ឯកឧត្ដម គឹង វណ្ណៈ អភិបាលរង នៃគណៈអភិបាលខេត្តបន្ទាយមានជ័យ និង លោក គាត ហ៊ុល អភិបាល នៃគណៈ អភិបាលក្រុងប៉ោយប៉ែត អមដំណើរ ដោយ លោក លោក ស្រី អភិបាលរង ក្រុមការងារ និងមានការចូលរួម ពី ក្រុម គ្រូពេទ្យ ជំនាញ អញ្ជើញចុះ សួរសុខទុក្ខ ជួបសំណេះ សំណាល សួរនាំអាការៈ បងប្អូន ប្រជាពលរដ្ឋ ដែលកំពុង សម្រាក់ព្យាបាល ជំងឺ នៅមណ្ឌលសុខភាពសង្កាត់ប៉ោយប៉ែត ។
ក្នុងឱកាសចុះ ជួបសំណេះសំណាល អ្នកជំងឺ នាថ្ងៃនេះ ឯកឧត្ដម គឹង វណ្ណៈ អភិបាលរង នៃគណៈអភិបាលខេត្តបន្ទាយមានជ័យ ក៏បានឧបត្ថម្ភ ថវិការ ចំនួន ១០០,០០០រៀលក្នុងម្នាក់ ដល់អ្នកជំងឺសរុប១១នាក់ ។
សូមបញ្ជាក់ថា អ្នកជំងឺទាំងអស់ មាន អាការៈ ៖
១ • គ្រុនក្តៅ
២ • កន្ទួលក្រហមលើស្បែក
៣ • ឈឺសាច់ដុំ
៤ • ឈឺសន្លាក់ដៃជើង
#ប៉ុន្តែមិនមានបងប្អូនប្រជាពលរដ្ឋមួយរូបណាប្រកាច់ នោះទេ មិនដូច ការបង្ហោះ ក្នុងសង្គមហ្វេសប៊ុក របស់ បុគ្គលមួយចំនួន នោះទេ នេះបើយោងតាមការបញ្ជាក់របស់ ក្រុមវេជ្ជបណ្ឌិត កំពុងតាមដាន និង មើលថែ បងប្អូនប្រជាពលរដ្ឋ ។
ដោយឡែក ព្រឹកថ្ងៃនេះដែល មន្ទីរសុខាភិបាលខេត្តបន្ទាយមានជ័យ ក្រុមឆ្លើយតបបន្ទាន់(RRT) និង កម្មវិធីផ្តល់ថ្នាំបង្ការ សហការជាមួយអាជ្ញាធរមូលដ្ឋានបន្តចុះអន្តរាគមន៍ ស្រាវជ្រាវ និង បូមឈាមអ្នកសង្ស័យដែលមានគ្រុនក្តៅ កន្ទួលក្រហមលើស្បែក មានឈឺសាច់ដុំ នឹង ឈឺសន្លាក់ដៃជើងចំនួន ៩២ នាក់ (ស្រី៥១នាក់) នៅភូមិក្បាលកោះ ភូមិប៉ោយប៉ែត និងភូមិព្រៃគប់ សង្កាត់ប៉ោយប៉ែត។ ក្នុងនោះ មានអ្នកជម្ងឺចំនួន១១ នាក់(ស្រី៤នាក់)បានអនុញ្ញាតអោយសម្រាកតាមដាន និងព្យាបាល នៅមន្ទីរពេទ្យបង្អែកប៉ោយប៉ែត។ មកដល់ម៉ោង ១១:៣០ នាទី នាថ្ងៃនេះ សុខភាពអ្នកជម្ងឺធូរស្បើយជា។
ក្រុមការងារបានបូមឈាមអ្នកសង្ស័យដើម្បីរកមើល ៖
១ • ជំងឺគ្រុនឈីក (Chikungunya)
២ • ជំងឺស្អូច រឺកញ្ជ្រិល (Measles or Rubella)
៣ • យកសំណាករកមេរោគជំងឺកូវីដ១៩ ។
សន្និដ្ឋានបឋម៖
ជារួមបញ្ហាជម្ងឺដែលកើតឡើងខាងលើអាចជា : ករណីគ្រុនក្តៅមានកន្ទួល និងឈឺសន្លាក់ គឺសង្ស័យ ជំងឺគ្រុនឈីក (Chikungunya)រឺ អាចជា ជំងឺស្អូច រឺកញ្ជ្រិល (Measles or Rubella) ។
ការអន្តរាគមន៍បន្ទាន់:
– ផ្តល់ការអប់រំសុខភាពអំពី អនាម័យបរិស្ថាន អនាម័យខ្លួនប្រាណ សុវត្ថិភាពចំណីអាហារ និង វិធីបង្ការជំងឺ ឆ្លងផ្សេងៗ
– បំផុសអោយមានការចូលរួមសម្អាតបរិស្ថាន និងបំបាត់ជំរកមូសខ្លា
– ការបាញ់ថ្នាំ សម្លាប់ជម្រកមូសខ្លានៅភូមិ គោលដៅ និងទីសាធារណៈ។
មន្ទីរសុខាភិបាលខេត្ត បន្តការខិតខំ ចុះស្រាវជ្រាវ និង អន្តរាគមន៍រាល់បញ្ហាសុខភាពដែលអាចកើតឡើងជាយថាហេតុ ក្នុងមូលដ្ឋានដោយសហការជាមួយអាជ្ញាធរមូលដ្ឋាន និង សូមអំពាវនាវ អោយប្រជាពលរដ្ឋដែលមានបញ្ហាសុខភាពមកទទួលសេវានៅមណ្ឌលសុខភាព និង មន្ទីរពេទ្យបង្អែកដែលនៅជិតផ្ទះបំផុត។ ម្យ៉ាងទៀត នៅពេលទទួលលទ្ធផលនៃការវិភាគឈាម ដោយវិទ្យាស្ថានប៉ាស្ទ័រ ឫ វិទ្យាស្ថានស្រាវជ្រាវសុខភាពសាធារណ មន្ទីរសុខាភិបាលខេត្ត និងផ្តល់ព័តមានជូនសាធារណជនជ្រាប ជាព័តមាន។ ដោយ ចាន់ពុធ
