កំពង់ចាម៖ ឯកឧត្តម អ៊ុន ចាន់ដា ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ចាម បានដឹកនាំកិច្ចប្រជុំត្រួតពិនិត្យលទ្ធផលសកម្មភាពការងាររបស់សាខាកាកបាទក្រហមកម្ពុជាខេត្ត ប្រចាំឆមាសទី១ និងលេីកទិសដៅឆមាសទី២ ដែលបានធ្វើឡើងនាព្រឹកថ្ងៃទី២៣ ខែកក្កដា ឆ្នាំ២០២០ នៅស្នាក់ការសាខាកាកបាទក្រហមខេត្ត ដោយមានការអញ្ជើញចូលរួមពី លោកជំទាវ ប៉ាង ដានី អនុប្រធានអចិន្ត្រៃយ៍សាខា លោក លោកស្រី នាយកប្រតិបត្តិ លេខាធិការ ហិរញឹក និងសមាជិកគណៈកម្មាធិការសាខា ផងដែរ ។
ថ្លែងក្នុងកិច្ចប្រជុំនេះដែរ ឯកឧត្ដម អ៊ុន ចាន់ដា ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ចាម បានធ្វេីការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ សមាជិក សមាជិកា នៃសាខាកាកបាទក្រហមកម្ពុជាខេត្ត ដែលបានចូលរួមចំណែកយ៉ាងសំខាន់ ក្នុងវិស័យមនុស្សធម៌ នាពេលកន្លងមក ដោយបានគៀងគរជំនួយមកពីគ្រប់មជ្ឈដ្ឋាន ដេីម្បីជួយសង្រ្គោះដល់ប្រជាពលរដ្ឋក្រីក្រ ជនងាយរងគ្រោះ និងជនរងគ្រោះផ្សេងៗ ហើយឯកឧត្ដមប្រធាន ក៏បានធ្វើការសំណូមពរដល់ថ្នាក់ដឹកនាំ ក៏ដូចជាសមាជិកសាខាគ្រប់រូប ឲ្យមានការរួមចិត្តរួមគំនិតគ្នា ដេីម្បីទទួលបានភាពជោគជ័យក្នុងការត្រៀមលក្ខណៈរៀបចំផែនការ ដេីម្បីបម្រើដល់វិស័យមនុស្សធម៌បន្តទៅទៀត ។
ក្នុងកិច្ចប្រជុំនោះដែរ ឯកឧត្តមប្រធានសាខា ក៏បានធ្វេីការដោះស្រាយនូវបញ្ហាប្រឈមមួយចំនួន ដែលមានដូចជាការដោះស្រាយបញ្ហារៀបចំបន្ទប់ប្រជុំVideo Conference ការជ្រេីសរេីសបុគ្គលិកជំនាញIT ការរៀបចំវេចខ្ចប់សំភារៈប្រេីប្រាស់ឲ្យបានត្រឹមត្រូវមុននឹងបញ្ជូនទៅដល់ដៃជនរងគ្រោះ ការរៀបចំទុកដាក់ឯកសារផ្សេងៗឲ្យបានត្រឹមត្រូវ និងការជ្រើសរើសអ្នកស្ម័គ្រចិត្តភូមិ ដេីម្បីបម្រើដល់វិស័យមនុស្សធម៌នៅតាមមូលដ្ឋាននានាផងដែរ ៕
