កំពង់ចាម៖ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានដឹកនាំកិច្ចប្រជុំមួយ ដេីម្បីរៀបចំសណ្តាប់ធ្នាប់ផ្សារផ្អាវ ស្ថិតនៅក្នុងឃុំផ្អាវ ស្រុកបាធាយ ដែលបានធ្វេីឡើងនៅសាលាខេត្តកំពង់ចាម នាព្រឹកថ្ងៃទី២៤ ខែកក្កដា ឆ្នាំ២០២០ ដោយមានចូលរួមពីសំណាក់ពី ឯកឧត្តមអភិបាលរងខេត្ត ថ្នាក់ដឹកនាំមន្ទីរអង្គភាពពាក់ព័ន្ធ អាជ្ញាធរស្រុកបាធាយ និងគណៈអាជីវករផ្សារផ្អាវផងដែរ ។
គួរបញ្ចាក់ផងដែរថា នៅផ្សារផ្អាវ មានអាជីវករមួយចំនួន បានដាក់តាំងទំនិញ លើចិញ្ចើមផ្លូវ និងលក់ដូរតាមផ្លូវ ដែលនាំឲ្យបាត់សណ្តាប់ធ្នាប់ កកស្ទះចរាចរណ៍ជាប្រចាំ និងបានបង្កការំខានដល់ប្រជាពលរដ្ឋ ដែលរស់នៅជិតខាង ក៏ដូចជាអ្នកដំណើរដែលឆ្លងកាត់តំបន់នោះ។
ដោយឃើញនូវបញ្ហានេះ ឯកឧត្តមអភិបាលខេត្ត បានដឹកនាំប្រជុំដើម្បីដោះស្រាយ ការលក់ដូរអនាធិបតេយ្យរបស់អាជីវករមួយចំនួន និងរៀបចំសណ្តាប់ធ្នាប់នៅជុំវិញផ្សារផ្អាវ ឲ្យមានរបៀបរៀបរយ និងលុបបំបាត់ការលក់ដូរគ្មានសណ្តាប់ធ្នាប់ ការលក់ដូររំលោភលើចំណីថ្នល់ និងផ្លូវថ្នល់សាធារណៈពីសំណាក់បងប្អូនអាជីវករមួយចំនួនផងដែរ ៕
