កំពង់ចាម៖នារសៀលថ្ងៃទី៣០ ខែកក្កដា ឆ្នាំ២០២០ លោកឧត្តមសេនីយ៍ទោ ឯម កុសល ស្នងការនគរបាលខេត្ត បានដឹកនាំប្រជុំផ្សព្វផ្សាយ ប្រកាសស្តីពីការផ្ទេរភារកិច្ចក្នុងកាផ្តល់សៀវភៅស្នាក់នៅ និងសៀវភៅគ្រួសារ និងចាត់ក្រុមការងារចល័តផ្ដល់អត្ដសញ្ញាណប័ណ្ណសញ្ជាតិខ្មែរ នៅប្រចាំការផ្ដល់សេវានៅការិយាល័យច្រកចេញ-ចូលតែមួយរដ្ឋបាល ក្រុង-ស្រុក-ខណ្ឌ។
ពិធីនេះ ប្រព្រឹត្តទៅនៅសាលប្រជុំធំ នៃស្នងការដ្ឋាននគរបាលខេត្តកំពង់ចាម និងដោយមានការចូលរួមពី លោក លោកស្រី ស្នងការរង លោក លោកស្រី នាយ នាយរងការិយាល័យ រហូតដល់មន្រ្តី នៃផែនការងារអត្តសញ្ញាណកម្ម លោក លោកស្រី អធិការ អធិការរង រហូតដល់មន្រ្តីទទួលការងារអត្តសញ្ញណកម្ម នៃអធិការដ្ឋាននគរបាលស្រុក ក្រុង ទាំង១០ លោកនាយប៉ុស្តិ៍នគរបាលរដ្ឋបាលទាំង១០៩ សរុបអ្នកចូលរួមមានចំនួន ២៣២នាក់ ។
ក្នុងឱកាសនោះដែរ លោកឧត្តមសេនីយ៍ស្នងការ បាននាំយកថវិកាមួយចំនួនរបស់ ឯកឧត្តម នាយឧត្តមសេនីយ៍ សន្តិបណ្ឌិត អគ្គស្នងការនគរបាលជាតិ ឧបត្ថម្ភដល់ លោកអធិការ អធិការរង រហូតដល់មន្ត្រី និងលោកនាយប៉ុស្តិ៍ទាំង១០៩ ផងដែរ ៕
