ខេត្តព្រះវិហារ៖ មនុស្សប្រុសស្រី ៤នាក់ បានរងរបួសធ្ងន់ និងស្រាល ក្រោយជួបគ្រោះថ្នាក់ចរាចរណ៍ ក្រឡាប់រថយន្តហេតុការណ៍នេះកើតឡើងម៉ោង៣ និង៣០នាទីរសៀល ថ្ងៃទី៣០កក្កដាឆ្នាំ២០២០ នៅលើដងផ្លូវជាតិលេខ៦២ ត្រង់ចំណុចតាកឹង ខាងត្បូងជិតខ្ទមអ្នកតា ស្ថិតក្នុងភូមិសាស្ត្រ ភូមិថ្នល់បែក ឃុំថ្មី ស្រុកគូលែន ខេត្តព្រះវិហារ ។
អធិការនគរបាលស្រុកគូលែន លោកវរៈសេនីយ៍ទោ ឡាញ់លីវ សៀវឡេង បានប្រាប់អោយដឹងថា នៅក្នុងហេតុការគ្រោះថ្នាក់ចរាចរណ៍នោះ បានបណ្តាលអោយមនុស្សប្រុសស្រី ៤នាក់ រងរបួស ក្នុងនោះ អ្នកបើកបរម្នាក់ និងអ្នករួមដំណើរ ៣នាក់ ដែលត្រូវជាម្តាយ កូន និងប្រពន្ធ គឺ ១. ឈ្មោះ មុំ សុផាន់ណា ភេទប្រុស អាយុ៣០ឆ្នាំ ជាអ្នកបើកបរ , ២. ឈិន ឡុងស៊ីម ភេទស្រី អាយុ២៧ឆ្នាំ ត្រូវជាប្រពន្ធអ្នកបើកបរ , ៣. រឿម វិចិត្រា ភេទស្រី អាយុ៨ខែ ត្រូវជាកូនអ្នកបើកបរ និង ៤. ឈ្មោះ គឹម ឡុង ភេទស្រី អាយុ៥០ឆ្នាំ ត្រូវជាម្ដាយក្មេកតៃកុងរថយន្ត ជនរងគ្រោះទាំង ៤នាក់ រស់នៅភូមិទឹកក្រហម ឃុំទឹកក្រហម ស្រុកជាំក្សាន្ត ខេត្តព្រះវិហារ។
លោកអធិការស្រុកគូលែន បានបន្តអោយដឹងទៀតថា ជនរងគ្រោះជិះរថយន្តប្រភេទ កាមរីស្វិត ពណ៌ស ពាក់ស្លាកលេខ ច-8072 ភព២ បើកបរក្នុងទិសដៅពីជើងមកត្បូង (ដឹកប្រពន្ធមកកាន់មន្ទីរពេទ្យ)។
ហើយមូលហេតុដែលនាំអោយ កើតឡើងនៃគ្រោះថ្នាក់ចរាចរណ៍ គឺដោយ សាររថយន្តជាប់ហ្វ្រាំង រួចក៏បានបោកធ្លាក់ទៅម្ខាងផ្លូវ ធ្វើអោយមនុស្សនៅក្នុងរថយន្តនោះរងរបួស រីឯ រថយន្តរងការខូចខាត ប៉ុន្តែ មិនបានបង្កការគ្រោះថ្នាក់ដល់អ្នកដទៃនោះឡើយ។
លោកបន្តថា ក្រោយហេតុ ការណ៍គ្រោះថ្នាក់ កម្លាំងអធិការនគរបាលស្រុក រួមនឹងមន្ត្រីប៉ុស្តិ៍នគរបាលរដ្ឋបាលបានច ទៅជួយអន្តរាគមន៍ភ្មាមៗចំពោះអ្នករងរបួស ត្រូវបានរថយន្តសង្គ្រោះ របស់ស្នងការដ្ឋាននគរបាលខេត្តព្រះវិហារ ដឹកយកទៅមន្ទីរពេទ្យបង្អេក ១៦មករា ខេត្តព្រះវិហារ ។
លោក ឡាញ់លីវ សៀវឡេង បានបញ្ជាក់អោយដឹងថា ខណៈនេះជនរងគ្រោះ បានធូរស្រាលវិញហើយ ក្រោយការជួយព្យាបាលយ៉ាងយកចិត្តទុកដាក់ ពីក្រុមគ្រូពេទ្យបង្អែកខេត្ត ហើយក៏បានមកទទួលយក រថយន្តពីប៉ុស្តិ៍នគរបាលរដ្ឋបាលថ្មី ទៅជួសជុល និងទុកប្រើប្រាស់ប្រចាំថ្ងៃ នៅក្នុងគ្រួសារវិញហើយដែរ ៕
