ខេត្តកំពង់ចាម៖ ដើម្បីការពារជម្ងឺរាតត្បាតផ្សេងៗដែលតែងតែកើតមានឡេីង លេីសត្វពាហនៈ ក្នុងរដូវវស្សានេះ នាព្រឹកថ្ងៃទី៤ ខែសីហា ឆ្នាំ២០២០នេះ អាជ្ញាធរខេត្តកំពង់ចាម ក្រោមការរៀបចំរបស់មន្ទីរកសិកម្ម រុក្ខាប្រមាញ់ និងនេសាទ បានបើកយុទ្ធនាការចាក់ថ្នាំវ៉ាក់សាំងទប់ស្កាត់ជម្ងឺឆ្លងផ្សេងៗ ដល់សត្វគោក្របី នៅឃុំតុងរុង ស្រុកព្រៃឈរ ខេត្តកំពង់ចាម ដើម្បីការពារសត្វគោក្របី ដែលជាកម្លាំងអូសទាញយ៉ាងសំខាន់ របស់ប្រជាកសិករ ហើយការចាក់វ៉ាក់សាំងការពារជម្ងឺសារទឹក ជម្ងឺអ៊ុចក្តាម លេីសត្វគោក្របីជូនប្រជាពលរដ្ឋដោយគិតថ្លៃ ។
ឆ្លៀតក្នុងឱកាសនោះដែរ ឯកឧត្តម អ៊ុន ចាន់ដា អភិបាលខេត្តកំពង់ចាម បានធ្វេីការណែនាំដល់អាជ្ញាធរ គ្រប់លំដាប់ថ្នាក់ ត្រូវជួយផ្សព្វផ្សាយដល់ប្រជាពលរដ្ឋ ឲ្យបានចូលរួមជាមួយជំនាញ ដើម្បីចាក់ថ្នាំការពារទប់ស្កាត់នូវជម្ងឺឆ្លងដល់សត្វ និងជួយរាយការណ៍ អំពីស្ថានភាពជម្ងឺសត្វទៅកាន់ភ្នាក់ងារ សុខភាពសត្វភូមិ និងមន្ត្រីបសុព្យាបាល ប្រចាំស្រុក ហេីយត្រូវចូលរួមធ្វើការចាក់ថ្នាំការពារឲ្យបានទាន់ពេលវេលា ចៀសវាងបង្កឲ្យមានការឆ្លងជម្ងឺរីករាលដាលធ្ងន់ធ្ងរ ។
ជាមួយគ្នានោះ ឯកឧត្តមអភិបាលខេត្ត ក៏បានសំណូមពរដល់បងប្អូនប្រជាពលរដ្ឋ ឲ្យធ្វេីការសំអាតថែរក្សាបរិវេណជុំវិញលំនៅឋានរបស់ខ្លួន ដែលជាកន្លែងសត្វមូសបង្កាត់ពូជ ដេីម្បីការពារជំងឺឆ្លងផ្សេងៗ បេីមានជំងឺអ្វីកេីនឡេីង សូមប្រញាប់ប្រញាល់ទៅកាន់មន្ទីរពេទ្យជាបន្ទាន់ កុំបង្អង់យូររហូតឲ្យធ្លាក់ក្នុងសភាពធ្ងន់ធ្ងរ។
បេីយោងតាមលោកស៊ីម ថាវីរះ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ចាម បានឲ្យដឹងថា សម្រាប់ខេត្តកំពង់ចាម មានសត្វគោក្របីសរុបចំនួន២០៤.៨៦០ក្បាល ត្រូវបានចាក់វ៉ាក់សាំងការពារជម្ងឺហើយ ចំនួន១.០៨៧ក្បាល ដោយឡែកនៅក្នុងស្រុកព្រៃឈរ មានសត្វគោក្របីចំនួន៤៨.៣៩៥ក្បាល ចំពោះឃុំតុងរ៉ុងមានគោក្របីចំនួន១២៣៧ក្បាល ហើយត្រូវបានចាក់វ៉ាក់សាំងការពារជម្ងឺចំនួន៧៣៩ក្បាល ដែលយុទ្ធនាការចាក់វ៉ាក់សាំងនេះ តែងតែធ្វើឡេីងជាប្រចាំនារដូវទឹកឡើង ដោយមិនមានការតម្រូវឲ្យប្រជាពលរដ្ឋបង់ប្រាក់ឡេីយ ៕
