ខេត្តបន្នាយមានជ័យ ៖នាព្រឹកថ្ងៃពុធ ១រោច ខែស្រាពណ៍ ឆ្នាំជូត ទោស័ក ព.ស.២៥៦៤ ត្រូវនឹង ថ្ងៃទី០៥ ខែសីហា ឆ្នាំ២០២០នេះ លោក ហុក វណ្ណៈ ប្រធានក្រុមហ៊ុន ហុក វណ្ណៈ អចលនទ្រព្យ និងលោកស្រី ឈួយ សុគន្ធា ជាភរិយា និងក្រុមគ្រួសារ ព្រមទាំងសមាជិក សមាជិកានៃក្រុមហ៊ុន ប្រេនហ្រ្វេនស៊ីប (ផ្គត់ផ្គង់គ្រឿងមីហឹរ និងភីហ្សាគ្រប់ប្រភេទ) និងក្រុមហ៊ុនបេតុងលាយស្រេច ប៊ីស៊ីស៊ី (BCC Concrete) រួមនឹងមិត្តភក្តិ ដៃគូវិនិយោគ បានចូលរួមសហការគ្នាបរិច្ចាគថវិកាផ្ទាល់ខ្លួនបញ្ជាទិញស្បៀងអាហារជាគ្រឿងឧបភោគនិងគ្រឿងបរិភោគ (អង្ករ, មី, ត្រីខកំប៉ុង) រួមនឹងថវិកា រៀបចំពិធីចែកជូនប្រជាពលរដ្ឋជួបការខ្វះខាតខ្លាំងក្នុងជីវភាព ជនងាយរងគ្រោះ ជនពិការ និងចាស់ជរា ចំនួនជិត ៣០០គ្រួសារ មកពីភូមិមួយចំនួនក្នុងសង្កាត់ផ្សារកណ្ដាល ក្រុងប៉ោយប៉ែត ដែលសរុបជាទឹកប្រមាណ ៤,០០០ (បួនពាន់) ដុល្លារអាមេរិក។
ក្នុងពិធីចែកអំណោយមនុស្សធម៌នេះ មានវត្តមានអញ្ជើញចូលរួមជាកិត្តិយសពីលោក ស្រិល អុិន ចៅសង្កាត់ នៃសង្កាត់ផ្សារកណ្តាល ព្រមទាំងលោកមេភូមិ ក្រុមការងារសកម្មជនគណបក្សភូមិ កម្លាំងប្រជាការពារភូមិ សប្បុរសជន បុគ្គលិកក្រុមហ៊ុនជាម្ចាស់ទានខាងលើ។ អំណោយមនុស្សធម៌នេះ បានរៀបចំឡើងនៅក្រុមហ៊ុន ហុក វណ្ណៈ អចលនទ្រព្យ ស្ថិតសង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។
ទន្ទឹមគ្នានេះ អំណោយមនុស្សធម៌ប្រកបដោយសមានចិត្តសប្បុរសរបស់លោក ហុក វណ្ណៈ ប្រធានក្រុមហ៊ុន ហុក វណ្ណៈ អចលនទ្រព្យ និងលោកស្រី ឈួយ សុគន្ធា ជាភរិយា និងក្រុមគ្រួសារ ព្រមទាំងសមាជិក សមាជិកានៃក្រុមហ៊ុន ប្រេនហ្រ្វេនស៊ីប (ផ្គត់ផ្គង់គ្រឿងមីហឹរ និងភីហ្សាគ្រប់បរភេទ) និងក្រុមហ៊ុនបេតុងលាយស្រេច ប៊ីស៊ីស៊ី រួមនឹងមិត្តភក្តិ ដៃគូវិនិយោគ ចាត់ទុកជាវិភាគទានមួយចំណែកដ៏មានសារៈសំខាន់បំផុតក្នុងការរួមចំណែកជាមួយរដ្ឋបាលក្រុងប៉ោយប៉ែត និងអាជ្ញាធរសង្កាត់ផ្សារកណ្ដាលក្នុងកាលៈទេសៈដ៏លំបាកនៃការរាតត្បាតជាសកលបង្កឡើងវីរុសកូវីដ-១៩ (COVID-19) ដែលបានអូសបន្លាយពេលជាង ៧ខែកន្លងទៅ ពោលគឺចាប់តាំងពីចុងឆ្នាំ២០១៩ នៃការផ្ទុះឡើងជំងឺកូវីដ-១៩។
សូមរម្លឹកថា ចាប់តាំងពីផ្ទុះការរីករាលដាលនៃវីរុសកូវីដ-១៩ រដ្ឋបាលក្រុងប៉ោយប៉ែត សហការជាមួយរដ្ឋបាលសង្កាត់ទាំងបី ព្រមទាំងមានការចូលរួមពីសប្បុរសជននៅគ្រប់ទិសទី បានកៀរគរជាសម្ភារៈ ថវិកា ច្រើនសន្ធឹកសន្ធាប់ និងបានចែកជូនដល់បងប្អូនប្រជាពលរដ្ឋមានជីវភាពខ្វះខាត បានចំនួនជាង ៧,២៣៥គ្រួសារមកហើយ ទោះបីជាខំចែកជូនយ៉ាងណាក្តី នៅតែមានប្រជាពលរដ្ឋជាច្រើនគ្រួសារជួបប្រទះនឹងការខ្វះខាតបន្តទៀត៕ ដោយ៖លោកចាន់ពុធ
