ក្រុងប៉ោយប៉ែត ៖ បុរសម្នាក់ធ្វើសកម្មភាពគាស់ដំបូលហាងជួសជុលទូរស័ព្ទ១កន្លែង ហើយ ចូលយកទូរស័ព្ទ និងគ្រឿងបន្លាស់បានជាច្រើនគ្រឿង ត្រូវបានម្ចាស់តូបឈ្មោះ ស្ងួន ពិសិដ្ឋ ភេទប្រុស អាយុ២៧ឆ្នាំ រស់នៅផ្សាររាត្រី ភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ដាក់ពាក្យបណ្តឹងទៅកងរាជអាវុធហត្ថ ក្រោយទទួលបានពាក្យបណ្តឹងហើយលោក វរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានដឹកនាំកម្លាំង១ក្រុមចុះស្រាវជ្រាវរហូតឈានដល់ការឃាត់ខ្លួនជន សង្ស័យបានចំនួន១នាក់ ឈ្មោះ គាត ពិសី ភេទប្រុស អាយុ២៧ឆ្នាំ រស់នៅមិនពិតប្រាកដក្នុងក្រុងប៉ោយប៉ែត ខេត្តបន្ទាយមានជ័យ នៅវេលាម៉ោង ៣ រសៀល ថ្ងៃទី៥ ខែសីហាឆ្នាំ ២០២០ កម្លាំងអាវុធហត្ថក្រុងប៉ោយប៉ែតបានធ្វើការដកហូតវត្ថុតាងសរុប ទូរស័ព្ទ និងអាយផែត ចំនួន១៦គ្រឿង និងគ្រឿងបន្លាស់មួយចំនួនទៀត។
លោក នួន នីណារ៉ូ បានប្រាប់ឲ្យដឹងបន្តទៀតថា : ជនសង្ស័យ និងវត្ថុតាងត្រូវបានកម្លាំងអាវុធហត្ថក្រុងប៉ោយប៉ែត បញ្ជូនមកទីបញ្ជាការកងរាជអាវុធហត្ថខេត្តដើម្បីចាត់ការបន្ត។
ជនសង្ស័យនៅមុខអាវុធហត្ថបានឆ្លើយសារភាព ថាខ្លួនពិតជាបានធ្វើសកម្មភាពគាស់ដំបូលហាងជួសជុលទូរស័ព្ទ១កន្លែង ហើយចូលយកទូរស័ព្ទ និងគ្រឿងបន្លាស់ពិតប្រាកដមែន។
ដោយផ្អែកលើចម្លើយសារភាពរួមទាំងមានវត្ថុតាងផងនោះកម្លាំងជំនាញអាវុធហត្ថខេត្តការិយាល័យបទល្មើសព្រហ្មទណ្ឌបានបញ្ជូនជនសង្ស័យ និងវត្ថុតាងបានទៅសាលាដំបូងខេត្តដើម្បីចាត់ការតាមនិតិវិធីច្បាប់ ៕
