លោក ម៉េត មាសភក្ដី អំពាវនាវដល់បងប្អូនប្រជាពលរដ្ឋទាំងអស់ក្នុងអំឡុងពេលឈប់សម្រាកសូមប្រុងប្រយ័ត្ន អនាម័យ និងការពារពីជំងឺកូវីដ១៩
ភ្នំពេញ ៖ ថ្ងៃចូលឆ្នាំថ្មីប្រពៃណីជាតិខ្មែកាន់តែខិតជិតមកដល់ ដែលបងប្អូនមន្រ្តីរាជការ បុគ្គលិកក្រុមហ៊ុន កម្មករកម្មការិនី បានឈប់សម្រាកចំនួន០៥ថ្ងៃ ដែលគិតចាប់ពីថ្ងៃទី១៧ ខែសីហា រហូតដល់ថ្ងៃទី២១ ខែសីហា ឆ្នាំ២០២០ខាងមុខនេះ ។
ទន្ទឹមនឹងនេះដែរ ក្រសួងសុខាភិបាល ព្រមទាំងក្រសួងស្ថាប័ន និងសមត្ថកិច្ចពាក់ព័ន្ធទាំងអស់បានសហការ និងពង្រឹងការអនុវត្តវិធានការការពារសុវត្ថិភាព វិធានការសុខាភិបាល និងអនាម័យ ព្រមទាំងបានធ្វើការផ្សព្វផ្សាយអប់រំ និងណែនាំប្រជាពលរដ្ឋ និងម្ចាស់អាជីវកម្មដោយតម្រូវឲ្យអនុវត្តដាច់ខាតតាមគោលការណ៍ណែនាំរបស់ក្រសួងសុខាភិបាល ដើម្បីកាត់បន្ថយហានិភ័យនៃការចម្លងរាលដាលជំងឺកូវីដ-១៩ នៅក្នុងអំឡុងពេលនៃថ្ងៃឈប់សម្រាកចំនួន៥ថ្ងៃ ក្នុងខែ សីហានេះ។
ក្នុងឳកាសដែលថ្ងៃឈប់សម្រាកខិតជិតមកដល់នេះដែរ លោក ម៉េត មាសភក្ដី អ្នកនាំពាក្យរដ្ឋបាលរាជធានីភ្នំពេញ ក៏បានអំពាវនាវដល់បងប្អូនប្រជាពលរដ្ឋទាំងអស់ ដែលធ្វើដំណើរកំសាន្តទីជិតទីឆ្ងាយ ឬទៅលេងស្រុកកំណើតជួបជុំគ្នា សូមធ្វើដំណើរដោយសុវត្ថិភាព ពិសេសប្រុងប្រយ័ត្ន អនាម័យ និងការពារពីជំងឺកូវីដ១៩។
លោក ម៉េត មាសភក្ដី បានបង្ហោះសារនៅលើហ្វេសប៊ុករបស់លោកកាលពីថ្ងៃទី១៤ ខែសីហា ឆ្នាំ២០២០ នេះថា ៖ អំឡុងពេលឈប់សម្រាកច្រើនថ្ងៃខាងមុខនេះ បងប្អូនយើងខ្លះនឹងធ្វើដំណើរកំសាន្តទីជិតទីឆ្ងាយ ឬទៅលេងស្រុកកំណើតជួបជុំគ្នា។ សូមធ្វើដំណើរដោយសុវត្ថិភាព បិទទ្វារចាក់សោរផ្ទះសម្បែង មើលភ្លើងទៀនធូប ហ្គាស អគ្គិសនី ពិសេសប្រុងប្រយ័ត្ន អនាម័យ និងការពារពីជំងឺកូវីដ១៩។ សូមបានរីករាយ និងសុខសប្បាយទាំងអស់គ្នា !
