ភ្នំពេញ ៖ ជនសង្ស័យ២នាក់ នាំគ្នាប្រព្រឹតបទល្មើសជួញដូរគ្រឿងញៀន ត្រូវនគរបាលប៉ុស្តិ៍គោកឃ្លាងឃាត់ខ្លួន នឹងចាប់យកវត្ថុតាងមួយចំនួន កាលពីវេលាម៉ោងម៉ោង១៨និង៣០នាទី ថ្ងៃទី២៤ ខែសីហា ឆ្នាំ២០២០ នៅចំណុចផ្លូវបេតុង ភូមិគោកឃ្លាង សង្កាត់គោកឃ្លាង ខណ្ឌសែនសុខ។
សមត្ថកិច្ចប៉ុស្តិ៍គោកឃ្លាង បានឲ្យដឹងថា ជនសង្ស័យទាំង០២នាក់ ទី១. ឈ្មោះ កែវ អឿន ភេទប្រុស អាយុ៤១ឆ្នាំ ជនជាតិខ្មែរ មុខរបរគ្មាន ស្នាក់នៅបន្ទប់ជួល ភូមិបន្លាស្អិត សង្កាត់ឃ្មួញ ខណ្ឌសែនសុខ, ទី២. ឈ្មោះ អូរ គៀង ភេទប្រុស អាយុ៣៥ឆ្នាំ ជនជាតិខ្មែរ មុខរបរ លក់ទឹកកក ស្នាក់នៅផ្ទះជួល ភូមិគោកឃ្លាង សង្កាត់គោកឃ្លាង ខណ្ឌសែនសុខ។
សមត្ថកិច្ចបញ្ជាក់ទៀតថា ការឃាត់ខ្លួនពួកគេទាំងពីរនាក់នេះ គឺកម្លាំងល្បាតបានប្រទះឃើញនៅតាមផ្លូវខាងលើ ហើយឆែកឃើញមានក្រាមសថ្លា០៣កូនថង់តូច ទើបឃាត់ខ្លួនតែម្តង។
បច្ចុប្បន្ន ជនសង្ស័យទាំងពីរនាក់ កំពុងឃាត់ខ្លួននៅអធិការដ្ឋាន នគរបាលខណ្ឌសែនសុខ ដើម្បីអនុវត្តតាមនិតិវិធីបន្ត៕
