ខេត្តស្វាយរៀង នៅរសៀលថ្ងៃទី១៤ខែតុលាឆ្នាំ ២០២០ឯកឧត្តមម៉ែនវិបុលអភិបាលខេត្តបានដឹកនាំកម្លាំងមន្ត្រីរាជការកងកម្លាំងប្រដាប់អាវុធប្រមាណជាង៣០០នាក់ចូលរួមដើម្បីទប់ទំនប់វៀងក្រុងត្រង់ចំណុចសង្កាត់គយត្របែកនិងសង្កាត់ពោធិ៍ធិហោដែលបច្ចុប្បន្នទឹកជំនន់ទឹកភ្លៀងកំពុងវាយលុកនិងគំរាមកំហែង។
ក្នុងឱកាសនោះដែរឯកឧត្តមម៉ែនវិបុលបានថ្លែងថាទឹកជំនាន់ដោយសារទឹកភ្លៀងពីមួយថ្ងៃទៅមួយថ្ងៃកើនឡើងជាលំដាប់ ហើយត្រង់ចំណុចដែលសមត្ថកិច្ចនិងក្រុមការងារចូលរួមទប់ថ្ងៃនេះឃើញថាទឹកឡើងខ្លាំងអាចនឹងឈានដល់ដាច់ទំនប់ប្រសិនបើយើងមិនបានទុបបង្ការទុកជាមុន។ក្នុងរយៈពេលប៉ុន្មានថ្ងៃនេះឃើញថាមានភ្លៀងធ្លាក់ជារៀងរាល់ថ្ងៃធ្វើអោយទឹកនៅក្នុងទន្លេវ៉ៃគោហក់ឡើងរហូតបណ្ដាលឱ្យលិចភូមិឋានបងប្អូនប្រជាពលរដ្ឋនៅក្នុងក្រុងស្វាយរៀងចំនួន២៨គ្រួសារ។
ឯកឧត្តមបានបញ្ជាក់ថាបច្ចុប្បន្នកងកំលាំងទាំងបីប្រភេទនិងមន្ត្រីរាជការព្រមទាំងសាខាកាកបាទក្រហមកម្ពុជាកំពុងត្រៀមលក្ខណៈជួយសង្គ្រោះដល់ប្រជាពលរដ្ឋដែលងាយនឹងរងគ្រោះដោយសារទឹកជំនន់។
ឯកឧត្តមក៏បានអំពាវនាវដល់បងប្អូនប្រជាពលរដ្ឋរស់នៅតាមដងទន្លេវ៉ៃកូនឹងតាមក្រុងស្រុកទាំងអស់ត្រៀមបង្ការនិងប្រុងប្រយ័ត្ននូវគ្រោះមហន្តរាយដោយសារទឹកជំនាន់ព្រោះប្រទេសយើងទទួលសម្ពាធខ្យល់ទាប ៕
