ភ្នំពេញ ៖ អ្នកជំនាញបានអះអាងថា បច្ចុប្បន្ន បារីនាំចូលជាច្រើន មិនមានបិទតែមប្រិ៍ពន្ធរបស់អគ្គនាយកដ្ឋានគយ និងរដ្ឋាករមាន២៨ភាគរយនៃបារីនាំចូលទាំងអស់ ដែលកំពុងដាក់លក់នៅលើទីផ្សារក្នុងព្រះរាជាណាចក្រកម្ពុជា ។ បារីទាំងនោះមានបារីម៉ាក ESSE Hero Oris និងGold Seal ជាដើម។
នេះបើយោងតាមលទ្ធផលនៃការស្រាវជ្រាវរបស់សាកលវិទ្យាល័យភូមិន្ទភ្នំពេញកាលពីដើមឆ្នាំ២០២០ អំពីការត្រួតពិនិត្យផលិតផលថ្នាំជក់នៅកម្ពុជា។
យោងតាមកិច្ចសម្ភាសន៍របស់អង្គការចលនាដើម្បីសុខភាពកម្ពុជាជាមួយអាជីវករលក់បារីបានអោយដឹងថា បារីដែលមិនមានតែមប្រិ៍ពន្ធទាំងនោះ បានមកពីការចែកចាយដោយ ភ្នាក់ងារក្រុមហ៊ុនបារី និងបានមកពីការទិញផ្ទាល់នៅតាមដេប៉ូបោះដុំ។
អាជីវករលក់បារីបានប្រាប់ថាភ្នាក់ងារក្រុមហ៊ុនបារីតែងតែចែកចាយបារីដល់ពួកគាត់ជាប្រចាំ ហើយពេលដែលមិនមានភ្នាក់ងារក្រុមហ៊ុនមក គាត់ទៅទិញផ្ទាល់នៅដេប៉ូលក់ដុំ។
ទាក់ទងនឹងបញ្ហានេះ លោកវេជ្ជបណ្ឌិត. យ៉ិល ដារ៉ាវុធ មន្ត្រីបច្ចេកទេសត្រួតពិនិត្យផលិតផលថ្នាំជក់នៃអង្គការសុខភាពពិភពលោកបានមានមតិថា បារីដែលមិនមានបិទតែមប្រិ៍ពន្ធគឺជាបារីខុសច្បាប់។
បារីខុសច្បាប់គឺជាឧបសគ្គដ៏ធំមួយនៃកិច្ចការត្រួតពិនិត្យថ្នាំជក់នៅកម្ពុជា ព្រោះវាមិនត្រឹមតែធ្វើអោយខាតបង់ចំណូលពន្ធរដ្ឋនោះទេ ថែមទាំងធ្វើអោយប្រជាពលរដ្ឋប្រឈមនឹងជំងឺដែលបង្កពីការជក់បារីកាន់តែច្រើន ដោយសារតែការប្រើប្រាស់ថ្នាំជក់កើនឡើង។
ការស្រាវជ្រាវរបស់អង្គការ UNDP FCTC WHO និង RIT International បានបង្ហាញថា បារីដែលមិនបានបង់ពន្ធ បានរួមចំណែកធ្វើអោយបាត់បងចំណូលពន្ធរបស់រដ្ឋាភិបាល។
ប្រសិនបើរដ្ឋាភិបាល ទប់ស្កាត់បារីគេចពន្ធអោយមានប្រសិទ្ធភាព នោះកម្ពុជានឹងទទួលបានចំណូលពន្ធចំនួន ៧% បន្ថែមពីលើពន្ធដែលប្រមូលបានពីពន្ធថ្នាំជក់ក្នុងពេលបច្ចុប្បន្ន។
ការប្រើប្រាស់ថ្នាំជក់បង្កអោយមានគ្រោះថ្នាក់ធ្ងន់ធ្ងរដល់សុខភាពប្រជាពលរដ្ឋ និងបង្កអោយខាតបង់សេដ្ឋកិច្ចយ៉ាងធំធេង។
ក្នុងមួយឆ្នាំៗប្រជាពលរដ្ឋនកម្ពុជាប្រមាន ១៥០០០នាក់បានស្លាប់ដោយសារជំងឺបង្កពីការប្រើប្រាស់ថ្នាំជក់ ហើយថវិកាប្រមាណ៦៥៦លានដុល្លារអាមេរិកត្រូវបានខាតបង់៕
