ខេត្ដត្បូងឃុំ៖ នៅថ្ងៃពុធ ៣ កើត ខែមិគសិរ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី១៨ ខែវិច្ឆិកា ឆ្នាំ២០២០ ម៉ោង ០៧និង០០នាទីព្រឹក នៅចំណុចក្នុងផ្ទះមួយខ្នង ស្ថិតនៅភូមិមេមត់កណ្តាល ឃុំមេមត់ ស្រុកមេមត់ ខេត្ដត្បូងឃ្មុំ មានករណីគ្រោះថ្នាក់ឆ្លងចរន្តអគ្គិសនីឆក់ខ្សែភ្លើង មួយកើតឡើង លើជនរងគ្រោះចំនួន ០២នាក់ស្លាប់។
ជនរងគ្រោះចំនួន ០២នាក់មានឈ្មោះ៖
១.ឈ្មោះ ឡាង កុន ភេទប្រុស អាយុ ៣០ឆ្នាំជាតិខ្មែរ (ប្តី)
២.ឈ្មោះ ស្រី មុំ ភេទស្រី អាយុ ៣១ឆ្នាំជាតិខ្មែរ (ប្រពន្ធ)
ជនរងគ្រោះទាំងពីរ រស់នៅភូមិឃុំចំណុចកើតហេតុខាងលើ បានឆក់ខ្សែរភ្លើងបណ្តាលអោយស្លាប់ទាំងពីរនាក់តែម្តង ។
ប្រភពពីកន្លែងកេីតហេតុបានឲ្យដឹងថា ជនរងគ្រោះនៅពេលកំពុងលាងលៀស ជ្រាបទឹកសើម ហើយបានឆ្លងចរន្តអគ្គីសនីខ្សែភ្លើង។
ជនរងគ្រោះជាប្រពន្ធ បានដោតភ្លើងបូមទឹកលាងលៀស ក៏បណ្តាលឲ្យឆ្លងចរន្តឆក់ភ្លាមៗតែម្តង ។ ហើយជនរងគ្រោះជាប្តី ឃើញប្រពន្ធឆក់ខ្សែភ្លើង ក៏ទៅជួយ ប៉ុន្តែការជួយនោះខុសបច្ចេកទេស ទើបបណ្តាលឲ្យឆក់ស្លាប់ទាំងពីរនាក់តែម្តង ។
ករណីខាងលើនេះ មន្ត្រីជំនាញ បានចុះដល់កន្លែងកើតហេតុ និងបានធ្វើកោសល្យវិច័យ ឃើញថា ពិតជាស្លាប់ដោយសារឆ្លងចរន្តអគ្គិសនី ពិតប្រាកដមែន សពត្រូវបានមន្ត្រីជំនាញ ប្រគល់ជូនក្រុមគ្រួសារនៃសព យកទៅធ្វើបុណ្យតាមប្រពៃណី ។
សមត្ថកិច្ចសូមអំពាវនាវ សូមបងប្អូនប្រុងប្រយ័ត្នខ្ពស់ ក្នុងការប្រើប្រាស់ចរន្តអគ្គិសនី ត្រូវតភ្ជាប់ចរន្តតាមលក្ខណៈបច្ចេកទេស ប្រើប្រាស់ខ្សែចំលងឱ្យបានត្រឹមត្រូវ រៀបចំរន្ធដោតចរន្ត(ព្រីភ្លើង)ឱ្យបានខ្ពស់ផុតពីដៃក្មេង និងកុំទុកដាក់ចរន្តភ្លើង នៅកន្លែងមានសំណើម ៕
