ខេត្ដបាត់ដំបង ៖ ជនសង្ស័យដែលបានចាប់រំលោភនារីរងគ្រោះ រហូតបានសម្រេច នៅក្នុងកម្មវិធីជប់លៀងមួយ ហើយបានរត់គេចខ្លួនអស់រយៈពេល៥ខែមកហើយនោះ ត្រូវបានមម្លាំងការិយាល័យជំនាញ ចុះឃាត់ខ្លួនកាលពីម្សិលមុិញនេះ បន្ទាប់ពីនាងបានដាក់ពាក្យប្តឹងស្ទើរគ្រប់ច្រកល្ហក ប៉ុន្តែសមត្ថកិច្ចហាក់ដូចជាមិនសូវយកចិត្តទុកដាក់សោះ ដោយម្នាក់ៗគ្រាន់តែហៅជនបង្កឲ្យចូលខ្លួនមកចរចាររឿងសំណង ក្រោមការតិះដៀលពីស្ត្រីជាភរិយារបស់ជនបង្កថែមទៀតផង។
យោងតាមការរៀបរាប់ពីស្ត្រីរងគ្រោះ ឈ្មោះ ជ.ន.ត អាយុ៣៥ឆ្នាំ បច្ចុប្បន្នរស់នៅភូមិអណ្តូងពីរ ឃុំអង្គរបាន ស្រុកសំពៅលូន ខេត្តបាត់ដំបង បានរៀបរាប់ថា កាលពីល្ងាចថ្ងៃទី១៨ ខែមិថុនា ឆ្នាំ២០២០កន្លងទៅ នៅខាងមុខផ្ទះល្វែងជួល (ក្បែផ្ទះរបស់នាង) មានការរៀបចំពិធីជប់លៀងមួយ ដោយក្នុងនោះ រូបនាងក៏ត្រូវបានម្ចាស់កម្មវិធីអញ្ជើញឲ្យទៅចូលរួមនឹងគេដែរ។
ស្ត្រីរងគ្រោះបានបន្តថា លុះនៅប្រហែលជាម៉ោង១១និង២០នាទីយប់ គឺភ្ញៀវចាប់ផ្តើមរំសាយជិតអស់ហើយ គឺខណៈដែលនាងប្រុងដើរត្រឡប់ទៅផ្ទះវិញ ក៏ស្រាប់តែមានបុរសម្នាក់ បានមកចាប់អូសដៃនាងចូលទៅក្នុងបន្ទប់ជួលក្បែរនោះ ដោយគេបានបិទទ្វារ ហើយបានចាប់ផ្តួលនាងទៅលើការ៉ូដោយគម្រាមមិនឲ្យស្រែក ម្យ៉ាងពេលនោះ នាងក៏គ្មានកម្លាំងដែ រព្រោះនាងងើបពីឈឺ ម៉្យាងខ្លាចគេសម្លាប់ ទើបជននោះចាប់ស្រាតខោរបស់នាងផុតជើងម្ខាង(ខោខៅប៊យ) ហើយបានធ្វើសកម្មភាពរំលោភនាងទាំងកម្រោល ដោយភាពប្រញាប់ប្រញាល់ប្រហែលជា៥ទៅ៦នាទីប៉ុណ្ណោះ ក៏បានសម្រេចតែម្តង។
នាងបានបន្ថែមទៀតថា ក្រោយធ្វើសកម្មភាពបុរសរូបនោះ បានងើបឈរដោយទាញដៃនាងឲ្យឈរដូចគ្នា ព្រមទាំងបានឈរឲ្យនាងដោយបាននិយាយថា បើនាងចេញទៅក្រៅហើយប្រាប់រឿងនេះទៅអ្នកដទៃ គឺរូបគេប្រាកដជាមានបញ្ហាហើយ ដូច្នេះសុំកុំមាត់អីបើមានបញ្ហាគេជាអ្នកទទួលខុសត្រូវ។ គ្រាន់តែនិយាយចប់ គេក៏បានដើរចេញពីបន្ទប់យ៉ាងលឿន ព្រមទាំងបានបើករថយន្តចេញទៅបាត់ ឯនាងក៏បានចេញមកសួរម្ចាស់កម្មវិធីថា តើស្គាល់បុរសម្នាក់សខ្ពស់ដែរឬទេ ព្រោះគេបានចាប់រំលោភនាង ពេលនោះម្ចាស់កម្មវិធីបាននិយាយយ៉ាងខ្លីថា «ប្តីអាមុំ» ទើបគេនិយាយថា ចាំស្អែកទៅព្រោះយប់ហើយទៅប៉ូលិសក៏គេមិនធ្វើការដែរ។
តាមរយៈទូរសព្ទស្ត្រីរងគ្រោះបានសង្កត់ធ្ងន់ថា នៅប្រហែលម៉ោង៧ព្រឹក ថ្ងៃទី១៩ ខែឆ្នាំដដែល ស្រាប់តែបុរសដែលជាជនល្មោភកាមឈ្មោះ សុត វ៉ន អាយុ២៩ឆ្នាំ មានស្រុកកំណើតនៅភូមិអង្គតាសោម ឃុំអង្គតាសោម ស្រុកត្រាំកក់ ខេត្តតាកែវ ដែលបច្ចុប្បន្នរស់នៅស្រុកសំពៅលូន បាននាំភរិយាឈ្មោះ មុំ ទៅដល់ម្តុំបន្ទប់ជួល ដើម្បីសុំជួបជាមួយស្ត្រីរងគ្រោះរកដំណោះស្រាយ តែនាងមិនព្រមសុខចិត្តឲ្យច្បាប់ជួយរកយុត្តិធម៌ ព្រោះដោយសារតែស្ត្រីឈ្មោះ មុំ ប្រើសំដីអសុរសមកលើនាងខ្លាំងពេក។
ស្ថិតក្នុងភាពអស់សង្ឃឹម ស្ត្រីរងគ្រោះក៏បានបន្តទៅដាក់ពាក្យប្តឹងនៅប៉ុស្តិ៍អង្គរបានផង ហើយនាងក៏បានមកដាក់ពាក្យប្តឹងនៅអធិការដ្ឋាន នគរបាលស្រុកសំពៅលូនថែមទៀត ដើម្បីឲ្យជួយរកយុត្តិធម៌សម្រាប់នាង ប៉ុន្តែការរង់ចាំពីមួយថ្ងៃទៅមួយថ្ងៃ កាន់តែស្ងប់ស្ងាត់ ឯជនបង្កមិនដឹងជាទៅដល់ក្រហែងដីណាបាត់ទៅហើយ ហេតុដូច្នេះហើយ ទើបនាងបានសម្រេចចិត្តឡើងមកប្តឹងនៅការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្ត ដើម្បីរកយុត្តិធម៌សម្រាប់នាង។
ទីបំផុតនៅថ្ងៃទី១៧ ខែវិច្ឆិកា ឆ្នាំ២០២០ វេលាម៉ោង៥ល្ងាច កម្លាំងជំនាញបានធ្វើការឃាត់ខ្លួនជនសង្ស័ខាងលើ ទៅតាមអំណាចដីការបស់តុលាការ ដោយសារតែមានការកោះហៅច្រើនលើកច្រើនសារ តែជនរូបនេះមិនព្រមចូលខ្លួនដោយឃាត់បាននៅចំណុចឃុំតាស្តាស្រុកសំពៅលូន។
ដោយឡែក លោក ប៊ន វណ្ណារ៉ា ប្រធានការិយាល័យប្រឆាំងការជួញដូរមនុស្ស និងការពារអនីតិជន បានមានប្រសាសន៍យ៉ាងខ្លីថា ជនសង្ស័យរូបនេះ លោកកំពុងត្រៀមបញ្ជូនទៅកាន់សាលាដំបូងខេត្ត ដើម្បីចាត់វិធានការតាមផ្លូវច្បាប់ បន្ទាប់ពីគេបានរត់គេចខ្លួនចេញពីមូលដ្ឋានអស់រយៈពេល ៥ខែរួចមក៕
