ខេត្តស្វាយរៀង៖នៅថ្ងៃអង្គារ ៩កើត ខែមិគសិរ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៤ ខែវិច្ឆិកា ឆ្នាំ២០២០
លោក តូច ប៉ូលីវ៉ា អនុប្រធាន សសយកខេត្ត តំណាងលោក ឌី វិជ្ជា ប្រធាន សសយកខេត្ត បាននាំយកក្រដាសរាមចែកជូនដល់ជូនដល់វិទ្យាល័យទាំង១៩ តាមរយៈប្រធានគណៈកម្មាធិការ សសយក ក្រុង ស្រុកទាំង៨ ក្នុងខេត្ត សម្រាប់ថតចម្លងឯកសារមេរៀនជូនសិស្សានុសិស្សដែលកំពុងសិក្សា ត្រៀមប្រឡងសញ្ញាបត្រមធ្យមសិក្សាទុតិយភូមិ នាសម័យប្រឡង ២១ ធ្នូ ២០២០ ខាងមុខនេះ។
ក្នុងនោះលោកក៏បាននាំយកនូវការផ្ដាំផ្ញើសួរសុខទុក្ខពីសំណាក់លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងលោក ឌី វិជ្ជា ប្រធាន សសយកខេត្ត មកជូនដល់គណៈកម្មាធិការ សសយក ទាំង៨ ក្រុង ស្រុក និងជូនដល់សិស្សានុសិស្ស លោកគ្រូ អ្នកគ្រូទាំង១៩ វិទ្យាល័យ។ បន្ថែមលើនោះលោកក៏បានផ្ដាំផ្ញើ សូមចូលរួមអនុវត្តតាមការណែនាំរបស់ក្រសួងសុខាភិបាល ក្រសួងអប់រំ យុវជន និងកីឡា និងរដ្ឋបាលខេត្តស្វាយរៀង ក្នុងការទប់ស្កាត់ ការពារការរីករាលដាលនៃជំងឺកូវីដ១៩ សូមថែរក្សាសុខភាពអោយល្អ អនុវត្តការសម្អាតអនាម័យអោយបានខ្ជាប់ខ្ជូន ចូលរួមគោរពច្បាប់ចរាចរណ៍រាល់ពេលធ្វើដំណើរ និងជៀសអោយឆ្ងាយពីគ្រឿងញៀន នឹងសូមលោកគ្រូ អ្នកគ្រូយកទៅប្រើប្រាស់ថតចម្លងឯកសារអោយចំគោលដៅ ជូនដល់សិស្សានុសិស្សអោយបានទាន់ពេលវេលា។
សូមបញ្ជាក់ផងដែរថា ក្រដាសរាម សរុប ៣៩កេស ក្នុងនោះក្រុងស្វាយរៀង ចំនួន ៥កេស ក្រុងបាវិត ចំនួន ៤កេស ស្រុករមាសហែក ចំនួន ៨កេស ស្រុកស្វាយជ្រំ ៧កេស ស្រុកកំពង់រោទិ៍ ៥កេស ស្រុកចន្ទ្រា ចំនួន ២កេស ស្រុកស្វាយទាប ចំនួន ២កេស និងស្រុករំដួល ចំនួន ៦កេស៕
