រាជធានីភ្នំពេញ ៖ ក្រោយមានការចុះផ្សាយរបស់អង្គភាពសារព័ត៌មានជាច្រើនអង្គភាពមក ដោយយោងតាមពាក្យបណ្តឹងរបស់ប្រជាពលរដ្ឋ ដែលបានប្តឹងលោកឧកញ៉ាមកសមត្ថកិច្ចក្រសួងមហាផ្ទៃមានចំណងជើងថា៖ (អុញនោះ!ប្រជាពលរដ្ឋប្តឹងឧកញ៉ា នួន អក ទៅសមត្ថកិច្ចក្រសួងមហាផ្ទៃ)កាលពីថ្ងៃទី២៥ ខែវិច្ឆិកា ឆ្នាំ២០២០។
លោកឧកញ៉ា នួន អក បានឲ្យមេធាវីលោកចេញ លិខិតឆ្លើយបំភ្លឺ ដែលមានខ្លឹមសារថា ៖ ខ្ញុំបាទ នួន អក ជនជាតិខ្មែរ សញ្ជាតិខ្មែរ មានអាស័យដ្ឋានបច្ចុប្បន្នភូមិញរ សង្កាត់កណ្ដោលដុំ ក្រុងច្បារមន ខេត្តកំពង់ស្ពឺ សូមធ្វើការឲ្យឆ្លើយបំភ្លឺពាក់ព័ន្ធជាមួយសារព័ត៌មានមួយចំនួនដែលបានបង្ហោះជាប់ជាមួយរូបថតរបស់ខ្ញុំបាទថាខ្ញុំបាទជាម្ចាស់ភាគហ៊ុននៅក្រុមហ៊ុន អិមសុី នេតឈ័រ ផ្លេនីត ឯ.ក គឺមិនពិតនោះទេ។ ជាក់ស្តែងកន្លងមកខ្ញុំបាទពិតជាបានចូលរួមជួយផ្សព្វផ្សាយឱ្យក្រុមហ៊ុន អិមសុី នេតឈ័រ ផ្លេនីត ឯ.ក នេះពិតប្រាកដមែនប៉ុន្តែខ្ញុំបាទពុំមានភាគហ៊ុនឬចំណែកណាមួយក្នុងក្រុមហ៊ុននោះទេ។ ហើយខ្ញុំបាទនិងចូលរួមសហការជាមួយផ្លូវច្បាប់ជានិច្ចពីព្រោះខ្ញុំបានមិនបានពាក់ព័ន្ធនឹងអំពើដូចសារព័ត៌មានយកទៅចុះផ្សាយនោះទេ។
ដោយការផ្សព្វផ្សាយព័ត៌មានខាងលើនេះ បានធ្វើឱ្យប៉ះពាល់ដល់សេចក្ដីថ្លៃថ្នូរកិត្តិយសនិងធ្វើឲ្យមហាជនមានការភាន់ច្រឡំមកលើរូបខ្ញុំបាទ ជាពិសេសបានធ្វើឱ្យប៉ះពាល់ដល់ផលប្រយោជន៍អាជីវកម្មរបស់ខ្ញុំបាទយ៉ាងធ្ងន់ធ្ងរផងដែរ។
ដូច្នេះស្នើសុំសារព័ត៌មានទាំងអស់មេត្តាធ្វើការលុបរូបថតនិងព័ត៌មានដែលពាក់ព័ន្ធជាមួយខ្ញុំបាទចោលទាំងអស់និងបញ្ឈប់ជាបន្ទាន់នូវរាល់សកម្មភាពទាំងឡាយណាដែលធ្វើឲ្យប៉ះពាល់ដល់រូបខ្ញុំបាទ ក្នុងករណីមិនព្រមបញ្ឈប់ ខ្ញុំបាទនិងចំណាត់ការតាមផ្លូវច្បាប់ដោយមិនមានការលើកលែងឡើយ។ អាស្រ័យដូចបានជម្រាបជូនខាងលើសូមសារព័ត៌មានទាំងអស់ទទួលជ្រាបជាព័ត៌មាននិងទទួលនូវការគោរពរាប់អានអំពីខ្ញុំបាទ។
គួររំលឹកផងដែរថា៖ សមត្ថកិច្ចបន្ទាប់ពីទទួលតាមបណ្ដឹងចុះថ្ងៃទី ១៣ ខែវិច្ចិកា ឆ្នាំ២០២០ ប្រជាពលរដ្ឋ បានសហការជាមួយស្ថាប័នពាក់ព័ន្ធមានសមត្ថកិច្ច និងអាជ្ញាធរមូលដ្ឋាន ដឹកនាំសម្របសម្រួលដោយលោកសឿ ឡងឌីព្រះរាជអាជ្ញារងអមសាលាដំបូងរាជធានីភ្នំពេញបានចុះត្រួតពិនិត្យទីតាំងលក់គ្រឿងសម្អាង នៅព្រឹកថ្ងៃទី២៥ ខែវិច្ឆិកា ឆ្នាំ២០២០ ស្ថិតនៅអគារលេខ៤Z ផ្លូវ103 ភូមិ៤ សង្កាត់ផ្សារដើមថ្កូវ ខណ្ឌចំការមនរាជធានីភ្នំពេញ។
ដោយឡែកទីតាំងខាងលើត្រូវបិទជាបណ្តោះអាសន្ន ដើម្បីចាត់ការតាមនីតិវិធីច្បាប់៕
