ខេត្ដបាត់ដំបង៖ចោរកាច់សោរកលួចម៉ូតូកណ្តាលក្រុងបាត់ដំបងអស់១គ្រឿងទៀតហើយ ខណះអ្នកជិះម៉ូតូចតនៅខាងលិចឈាងខាងជើងផ្សារធំបាត់ដំបង(ហៅផ្សារណាត់)ចូលទិញម្ហូបនៅក្បែរនោះ។
ករណីនេះបានកើតឡើងកាលពីវេលាម៉ោង១០និង៤០នាទីព្រឹក ថ្ងៃទី១១ ខែធ្នូ ឆ្នាំ២០២០ បង្កអោយមានការភ្ញាក់ផ្អើលដល់អ្នកលក់ដូរនិងអ្នកទៅទិញម្ហូបបើកភ្នែកធំៗងឿងឆ្ងល់ ថាក្រោយមានស្នងការថ្មីគឺលោកឧត្តមសេនីយ៍ត្រីសាត គឹមសានទើបចូលកាន់តំណែង សំបូរចោរឆក់ លួច គាស់ និងជាពិសេសចោរជំនាញកាច់សោរកម៉ូតូ កើតឡើងជាញឹកញាប់ គួរអោយបារម្ភយ៉ាងខ្លាំង។
ម្ចាស់ម៉ូតូឈ្មោះ៖អុី រដ្ឋា ភេទស្រី អាយុ២៩ឆ្នាំ មុខរបរ ជាងអ៊ុតសក់ នៅហាង១កន្លែងស្ថិតនៅផ្លូវលេខ២ ក្នុងសង្កាត់ស្វាយប៉ោ ក្រុងបាត់ដំបង។
ប្រភពព័ត៌មានពីប្អូនស្រី អុីលីហន ត្រូវជាប្អូនបង្កើតរបស់ នារីរងគ្រោះ(ម្ចាស់ម៉ូតូ)ម៉ាកClick ពណ៌ស សេរីឆ្នាំ2019 ពាក់ស្លាកលេខ បាត់ដំបង 1AG-0010 បានរៀបរាប់ថា៖មុនពេលកើតហេតុមានបងស្រីម្នាក់ មុខរបរ អ៊ុតសក់ដូចគ្នា មកពីខេត្តពោធិសាត់ខ្ចីម៉ូតូជិះទៅទិញម្ហូបនៅចំណុចផ្សាខាងលើស្រាប់តែងៀកមកវិញបាត់ម៉ូតូភ្ញាក់ខ្លួនព្រឺត។
ក្រោយពេលកើតហេតុនារីរងគ្រោះត្រូវបានកម្លាំងនគរបាលយាមនៅទីនោះណែនាំអោយទៅដាក់ពាក្យបណ្តឹងនៅអធិការដ្ឋាននគរបាលក្រុងបាត់ដំបងដើម្បីអោយជួយតាមរកម៉ូតូរបស់ខ្លួន។
ប្អូនស្រីអុី លីហន បានបញ្ជាក់ប្រាប់ក្រុមអ្នកយកព័ត៌មានយើងបន្ថែមយ៉ាងច្បាស់ថា៖នៅរសៀលថ្ងៃដដែល មានបុរសម្នាក់អះអាងថាខ្លួនជាមន្ត្រីនគរបាលខេត្តបាត់ដំបង បានទូរស័ព្ទទៅកាន់លេខដែលប្អូនបង្ហោះជាសាធារណៈនោះ សួរថាបើរកម៉ូតូឃើញវិញមានអ្វីតបស្នងទេ ពីព្រោះសមត្ថកិច្ចអាចនឹងរកឃើញម៉ូតូវិញក្នុងរយះពេល១សប្តាហ៍។
ដូច្នេះមានន័យថាសមត្ថកិច្ចនគរបាលប្រហែលជាកំពុងគ្រប់គ្រប់គ្រងមុខសញ្ញាជនសង្ស័យ ចំណែកប្អួនស្រីក៍នៅស្ងៀមមិនឆ្លើយតបរឿងលុយកាក់ដែរ។
សូមបញ្ជាក់ថាករណីចោរកាច់សោរក លួចម៉ូតូកំពុងរីកដុះដាលតាមបណ្តាស្រុកនានា ជាពិសេសក្នុងក្រុងបាត់ដំបងជាហេតុធ្វើអោយប្រជាពលរដ្ឋកំពុងអស់ជំនឿយ៉ាងខ្លាំងចំពោះអាជ្ញាធរនិងសមត្ថកិច្ចមូលដ្ឋាន៕
